މިއަދު ދިވެހިރާއްޖޭގައި ތިބި ސިޔާސީ ލީޑަރުންގެ ތެރެއިން ބޮޑު ތަކުރުފާނުގެ ޢަޒުމް ދައްކަވާ ހަމައެކަނި ސިޔާސީ ލީޑަރަކީ އިދިކޮޅު ކޯލިޝަންގެ ލީޑަރ އަދި ކުރީގެ ރައީސް ޔާމީން އަބްދުލްގައްޔޫމް ކަމަށް އެމަނިކުފާނުގެ ފުރަތަމަ ނާއިބު ރައީސް ޑރ މުހައްމަދު ޖަމީލް އަހުމަދު ވިދާޅުވެއްޖެއެވެ. 

ގައުމީ ދުވަހުގެ މުނާސަބާތުގައި ޑރ. ޖަމީލް ކުރެއްވި ޓްވީޓެއްގައި ވިދާޅުވީ، މިއަދު އާލާކުރަންވީ ގައުމީ ބަޠަލް ދެއްކެވި ހިތްވަރުގަދަ ޢަޒުމް ކަމަށެވެ. އަދި ޤަމިއްޔަތުގެ އަސާސް މިމިންވަރަށް ފުނޑިފައިވާ ޤައުމީ ދުވަހެއް މިއިން ޒަމާނަކުވެސް ނުދެކޭ ކަމަށް ވިދާޅުވެ ޑރ.ޖަމީލް ވަނި ކަންބޮޑުވުން ފާޅުކޮށްފައެވެ.

"ބޮޑު ތަކުރުފާނުގެ ޢަޒުމް ދައްކަވާ ހަމައެކަނި ސިޔާސީ ލީޑަރަކީ ރ.ޔާމީން. ގައުމިއްޔަތު ދިފާޢުކުރަން ތެދުވާން ވީވަގުތު މިއޮތީ ޖެހިފައި." ޑރ. ޖަމީލް ވިދާޅުވިއެވެ. 

އަދުގެ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ މި ސަރުކާރުން އިންޑިއާ އާކި އެކު ބާއްވަމުންދާ ގާތް ގުޅުމަށް އިދިކޮޅުން އަބަދުވެސް އަންނަނީ ފާޑުކިޔަމުންނެވެ. އެގޮތުން ދިވެހިރާއްޖެއަކީ މިނިވަން ގައުމެއް ކަމަށް ދުލުން ކިޔާލާ ނަމަވެސް، މިއަދު ދިވެހިރާއްޖެއަކީ އިންޑިއާ ގެ އަޅުވެތި ކަމުގެ ދަށުގައިވާ ގައުމެއް ކަމަށް ބުނެ އިދިކޮޅުން އަންނަނީ ކަންބޮޑުވުން ފާޅުކުރަމުންނެވެ. އޭގެ ސަބަބެއްގެ ގޮތުގައި އިދިކޮޅު ކޯލިޝަންގެ މެންބަރުން ދައްކަވަނީ ދިވެހިރާއްޖެއިން އިންޑިއާ އާއި އެކީ ހަދާފައިވާ ގޮތް ނޭނގޭ އެއްބަސްވުންތަކާއި، ޚާއްޞަކޮށް އުތުރު ތިލަފަޅު އެއްބަސްވުމެވެ.
އެފަދަ އެއްބަސްވުންތަކުގެ ސަބަބުންނާއި އިންޑިއާ ސިފައިން ދިވެހިރާއްޖޭގައި ގާއިމްވެ ތިބުމުގެ ސަބަބުން، ދިވެހިރާއްޖޭގެ މިނިވަންކަމާއި އިސްތިގުލާލަށް ބުރޫ އަރާ ކަމަށް ބުނެ އިދިކޮޅުން ވަނީ "އިންޑިއާ އައުޓް" ނަމުގައި ކެންޕެއިނެއް ވެސް ފަށާފައެވެ.