މިއަދަކީ 1965 ވަނަ އަހަރުން ފެށިގެން ކޮންމެ އަހަރަކު ފާހަގަކުރަމުން އަންނަ ދިވެހިރާއްޖޭގެ ގައުމީ ދުވަސް އަނެއްކާވެސް އަޅުގަނޑުމެންނާއި ބައްދަލުކުރި ދުވަހެވެ. 

މި ދުވަސް މިހާރު ފާހަގަކުރަމުން ދަނީ ޕޯޗުގީޒުންގެ އަނިޔާވެރިކަމާއި އަޅުވެތިކަމުން ދިވެހިން ސަލާމަތްވިކަމުގެ ހަނދާން އާކުރުމަށެވެ.

މި ދުވަސް ނިސްބަތްވެވަޑައިގަންނަވަނީ ޕޯޗުސީޒުންގެ އަތްދަށުން ދިވެހިރާއްޖެ މިނިވަންކުރެއްވުމަށް އިސްކޮށް ހުންނަވާ ގާތްގަނޑަކަށް 17 އަހަރު ހަނގުރާމަ ކުރެއްވި އުތީމު މުހައްމަދު ތަކުރުފާނަށެވެ. އަދި މި ދުވަހުގެ ހަނދާންތައް އާކުރާއިރު، އެ ތަކުރުފާނުންގެ އަހިރުގައި މިނިވަންކަން ހޯދުމަށް މަސައްކަތްޕުޅު ކުރެއްވި ހުރިހާ ބޭކަލުންގެ މަތިވެރި ގުރުބާނީ ހަނދާން އާކުރެއެވެ. 

ހިންދު ކަނޑުގައި އޮތް ކުޑަ މި ޖަޒީރާ ގައުމަކީ ދުނިޔޭގެ ބާރުތަކުން އޭރުވެސް ލޯއަޅަމުން ދިޔަ ގައުމެއްކަން ތާރީހުގެ ފަތްފުށްތަކުން ފެންނަން އެބަ އޮތެވެ. އެ ހަގީގަތާއެކު، ދިވެހިންނަކީ ކުޑަ ގައުމެކޭ ކިޔާފައި ބޭރުގެ ބާރުތަކުގެ ކުރިމަތީ އެއްވެސް އިރެއްގައި ކުޑަ ކަކޫ ޖަހާ އަޅުވެތިކަމަށް ރުހިގެން ތިބި ބައެއް ނޫންކަންވެސް ތާރީހު ބުނެދެއެވެ. 

ޕޯޗުގީޒުންގެ އަތްދަށުން ގައުމު ސަލާމަތްކުރުމަށް ތަކުރުން ކުރި ހިތްވަރާއި، ދުނިޔެއަށް ދެއްކި މިސާލުތައް މިކަމަށް ފުދެއެވެ. 

އެ ބޭކަލުން އެކަން ކުރެއްވީ ފަހަރެއްގައިވެސް، އެއީ ގައުމުގެ ސަލާމަތީ ކަންކަން ބެލެހެއްޓުމުގެ ޒިންމާ ގާނޫނަކުން ނުވަތަ އުސޫލަކުން މަތިކޮށްފައިވާ ބަޔަކަށް ވާތީއެއް ނޫނެވެ. 

ނުވަތަ އެ މަސްއޫލިއްޔަތު އަދާކުރުމަށް އެމީހުންނަށް އުޖޫރަދީ، އެމީހުންނަށް އިނާޔަތްތަކާއި އިނާމުތައް ލިބޭތީއެއްވެސް ނުމެ ނޫނެވެ. އަދި މާ ވަރުގަދަ އަސްކަރީ ޓްރެއިނިންތަކެއްވެސް އެ ހުރިހާ ބޭކަލުންނަށް ލިބިފައެއް ނެތެވެ. ނުވިތާކަށް ގައުމު ސަލާމަތް ކުރުމަށް ނިކުމެދެއްވުމަށް ރައްޔިތުން އެއިން ބޭކަލަކަށް އަރިހުން އެދިލައްވާފައެއްވެސް ނުވެއެވެ. 

މުހައްމަދު ތަކުރުފާނާއި، އެ ތަކުރުފާނުންގެ އަރިހުގައި ވަޑައިގެންނެވި ބޭކަލުން "ޖިހާދުގެ ކަމަރު" ބަނީ ގައުމަށްޓަކައެވެ. ހަމައެކަނި ގައުމުގެ މިނިވަންކަމާއި އިސްތިގުލާލު ހިމާޔަތް ކުރުމުގެ މަތިވެރި އަޒުމުގައެވެ. މިނިވަން ގައުމެއްގެ ގޮތުގައި ރާއްޖެ ބޭއްވުމަށް އޮތް ޝައުގުވެރިކަމެއްގެ ބޮޑުކަމުންނެވެ. 

ގައުމިއްޔަތުގެ އެންމެ މާތް ރުކުން ކަމަށްވާ އިސްލާމްދީން ހިމާޔަތްކޮށް، ރާއްޖޭގެ ޖައްވުން ބަންގީގެ އަނޑު ކެނޑިގެން ދިޔަ ނުދިނުމަށް ކަނޑައެޅި އަޒުމެއްގެ ވަރުގަދަކަމުންނެވެ. 

އެ އަޒުމުގައި ބެންނެވި "ކަޅޯއްމުންމީގައި" ވެހޭހާއި ވާރޭއެއްގައި، ދޭހާ އަތްވެއްގައި އެ ތަކުރުން ދަތުރުކުރައްވަމުން ގެންދެވީ، މާދަމާވެސް އެއިން ބޭކަލަކު ޝަހީދުކޮށްލައިފިނަމަ އަނބިދަރީންނަށް ވާނެ އެއްޗެއްވާން ދޫކޮށްލާފައެވެ. މިއީ ގައުމީ ލޯބި އޭގެ އެންމެ މަތީ ދަރަޖައިން ދައްކުވައިދިން އަލި ގަދަ މިސާލެއް ނޫންތޯއެވެ. 

މުހައްމަދު ތަކުރުފާނު އެދުނީ ގައުމުގެ މިނިވަންކަމެވެ. އެ ތަކުރުންގެ ޖިހާދަކީވެސް މިނިވަންކަން ހޯއްދެވުމަށް ކުރެއްވި ޖިހާދެކެވެ. އަމިއްލަ މަންފާއަކަށް ނޫނެވެ. އެމަނިކުފާނަ ފަދަ ދިވެހި ރައްޔިތުންނަށެވެ. 

މިއީ މިފަދަ ދުވަހެއް ފާހަގަކުރަމުންދާއިރު ވިސްނާލުން މުހިންމު ކަމެކެވެ. 

އަޅުވެތިކަމުގެ ރަހަ ދިވެހިންގެ އަރުތެރެއިން ފިލާ ހިނގައްޖެއެވެ. އަޅުގަނޑުމެންގެ ތެރޭގައި ގިނައީ އެއްވެސް ސިފައެއްގައި ބޭރުގެ އަސްކަރީ ބާރެއްގެ އަޅުވެތިކަން ތަޖުރިބާކޮށްފައި ނުވާ، ނުވަތަ އެފަދަ ބާރެއްގެ އަނިޔާވެރިކަން ތަޖުރިބާ ކުރަން ޖެހިފައިވެސް ނުވާ މީހުންނެވެ. 

ޒަމާންވެސް މި އޮތީ ބަދަލުވެފައެވެ. މިއީ ކަނޑި ބަޑި ހިފައިން، ޕޯޗުގީޒުން މީގެ އަހަރުތަކެއް ކުރިން އައިސް އަޅުގަނޑުމެން އަޅުވެތި ކުރި ގޮތަށް އަޅުވެތި ކުރާ ޒަމާނެއް ނޫނެވެ.

އެހެން ނަމަވެސް މި ޒަމާނުގައި އެއްވެސް ގައުމަކުން އަނެއް ގައުމަކަށް ހަމަލާ ނުދޭނެކަމަށް ވިސްނުމަކީވެސް އުނި ވިސްނުމެވެ. މިވާހަކަ ދެކެވޭއިރުވެސް ދުނިޔޭގެ އެކި ހިސާބުތަކުގައި ހުއްޓުމެއްނެތި ހަމަލާތައް އެގެންދަނީ ބަދަލުކުރެވެމުންނެވެ. އެންމެ ޒަމާނީ ވަސީލަތްތަކުގެ އެހީތެރިކަމާއެކުގައެވެ.

ޒަމާނަށް މިއައި ބޮޑު ބަދަލާއެކު އަޅުގަނޑުމެންވެސް މިތިބީ ކުރިއާއި ޚިލާފަށް މި ގައުމަށް ފާރެވެރިވާ ލޯތަކުން ސަލާމަތްވުމަށް ގައުމީ ދިފާއީ ބާރުތައް އުފައްދައިގެންނެވެ.

ބާރުތައް އުފެއްދީ އެކަންޏެއް ނޫނެވެ. އެ ބާރުތަކަށް އެތައް ޚަރަދެއް ދިވެހިރައްޔިތުންގެ ޖީބުތަކުން ކުރެއެވެ. އެ ބޭކަލުންނަށް ކާން ދީ، ބޯންދީ އަދި ބަލިވެއްޖެނަމަ ބޭސްފަރުވާ ކޯށްދެވީވެސް އަޅުގަނޑުމެންގެ ޖީބުތަކުން ސަރުކާރަށް ދައްކާ ޓެކްސް ފައިސާއިންނެވެ.

އެ ނިމުނީއެއް ނޫނެވެ. އެ ބޭކަލުން ތިއްބަވަނީ އެންމެ ޒަމާނީ ޔުނީފޯމު ލައްވާފައެވެ. އެއީ ފަޚުރުވެރި ބައެއްގެ ގޮތުގައި ރައްޔިތުން ގަބޫލުކުރާތީއެވެ. އެއާއެކު އެ ބޭކަލުންގެ ކޮނޑުގައި އެޅިފައިވާ މަސްއޫލިއްޔަތުގެ ބޮޑުކަމާވެސް އެކުގައެވެ. 

އެހިސާބުންވެސް ނިންމައެއް ނުލައެވެ. ރައްޔިތުންނާއި ގައުމުގެ ސަލާމަތާއި ރައްކާތެރިކުރުމަށް އެބޭކަލުންގެ ގާބިލު އިތުރުކުރުމަށް ދުނިޔޭގެ އެންމެ ތަހުޒީބު ގައުމުތަކުން ޓްރއިނިންވެސް ހަދުވައެވެ. ހަމަ ރައްޔިތުންގެ ޓެކްސް ފައިސާއިންނެވެ. 

ދިފާއީ ބާރުތަކަށް ކުރާ ޚަރަދަކީ ރައްޔިތުން ލޮލުން ބޮލުން ރުހި ގަބޫލު ޚަރަދުތަކެކެވެ. ރައްޔިތު މީހާ ނިދަން އޮށޯންނަނީ އޭނާގެ ދިފާއުގައި އަމަން ބަލަހައްޓާ ބޭކަލުން ނުނިދާ ފޯރިމަރަން ތިއްބަވާނެކަން ގަބޫލުކުރެވޭތީއެވެ.  

އެހެން ނަމަވެސް މި ހުރިހާ ކަމަކާއެކު، އަދުގެ ހާލުގެ ދުލުން ބުނާ ވާހަކަ ވަރަށް ތަފާތެވެ. 

އިވެނީ ގައުމީ ދިފާއީ ބާރުގެ އިސް ބޭކަލުން ގައުމާއި ރައްޔިތުންގެ ހިމާޔަތުގައި ވީ ވައުދު ހަނދާން ނައްތާލާ، އެމީހުން ގަބޫލުކުރާ ވަކި ސިޔާސީ ފިކުރެއް ޕްރޮމޯޓުކުރުމަށް މަސައްކަތް ކުރާ ވާހަކައެވެ. 

ގޮތް ނޭނގޭ އެއްބަސްވުންތަކެއް ހަދާ ރާއްޖޭގެ އެއްގަމާ ކަނޑާއި އައްސޭރި ބޭރު ގައުމެއްގެ ބާރުވެރިކަމުގެ ދަށުވާން ދޫކޮށްލާފައިވާ ވާހަކައެކެވެ. އަދި އެކަން ދެނެ ތިއްބަވާ ރައްޔިތުންނަށް ހަގީގަތް ފޮރުވުމަށް މަސައްކަތް ކުރަމުންދާ ވާހަކައެކެވެ. 

ސިޔާސީ މީހުން ކުޅުއްވާ "ޑާޓީ ގޭމް" ތަކުގައި އެމީހުނަށް އަތް ގާތްކޮށްދިނުމަށް ދިފާއީ ބާރުގެ ވެރިން ތިއްބަވާ މަންޒަރު ފެނުމަކީވެސް، ނުވަތަ އެފަދަ ވާހަކައެއް އަޑުއިވުމަކީވެސް މިފަދަ މުނާސަބާއެއް ފާހަގަކުރާއިރު ހިތްތައް ނުތަވަސްކުރުވާނެ ކަމަކަަށް ވާނެއެވެ. 

ދިފާއީ ބާރުތަކުގެ ތާރީހަކީ ގައުމީ ދުވަސް އެބޭކަލަކަށް ނިސްބަތްވެ ވަޑައިގަންނަވާ މުހައްމަދު ތަކުރުފާނާއި ގުޅި ލާމެހިފައިވާ ތާރީހެކެވެ. އެމަނިކުފާނު ރާއްޖެ މިނިވަންކުރެއްވުމަށްފަހު ވެރިކަމަށް ވަޑައިގެން ކުރެއްވި މުހިންމު ކަންތައްތަކުގެ ތެެރެއިން އެއްކަމަކީ ހަގުބޭކަލުން އުފެއްދެވުމެވެ. އެއީ މިހާރުގެ ގޮތުން ނަމަ ސިފައިންގެ ބޭކަލުންނެވެ. 

ޕޯޗުގީޒުންނަށްފަހުވެސް، ރާއްޖެއަށް މަކަރުވެރިކަމާއެކު ކަޅި އަޅާނެ ލޯތައް ތިއްބަވާނެކަން އެނގިވަޑައިގެން ރާއްޖޭގެ ދިފާއުގައި މޭ އައްޑަނައަކަށް ހައްދަވައިގެން ނިކުންނަން ކެރޭނެ ފައުޖެއް ތައްޔާރުކުރެއްވުމަކީ މުހިންމު ކަމެއްކަމަށް އެ ތަކުރުފާނު ދެކެވަޑައިގަތެވެ. 

އެހެން ނަމަވެސް އެ ތަކުރުފާނުގެ ތާރީޚާއި ގުޅިފައިވާ ގައުމީ ދިފާއީ ބާރުތަކުން މިއަދު އެމީހުންގެ ކޮނޑުގައި އެޅިފައިވާ މި ގައުމީ ވާޖިބަށް ޣާފިލުވެފައިވާކަމަށް ދަންނަވަން ޖެހެނީ ފެންނަމުންދާ މަންޒަރުތަކުގެ ސަބަބުންނެވެ. ދިފާއީ ބާރު މިއަދު ބޭނުން ކުރެވެމުންދަނީ ސިޔާސީ ލީޑަރުންނަށް ކުރުނީސް ކުރުމަށެވެ. އެމީހުންގެ އަސްލު މަސްއޫލިއްޔަތުތަކާއި ވާޖުބިތަކާއި ފެޔަށް ޖެހި، ބޭރު ބައެއްގެ މަސްލަހަތު ހިމާޔާތްކުރުމަށް މަޖުބޫރުކޮށްގެން ނަމަވެސް، އުޅުއްވާތީ ފެނުމަކީ ލަދުވެތި ކަމެކެވެ. 

މި މަންޒަރުތައް ބައްލަވަން މުހައްމަދު ތަކުރުފާނު މިއަދު ދުނިޔޭގައި ހުންނެވި ނަމަ އެ ތަކުރުފާނުގެ ހިތްޕުޅަށް ހާދަހާވާ ތަދުފުޅު ވާނެތާއޭ އަޅުގަނޑު ހިތަށް އަރައެވެ. އަދި މި ގައުމު އެ ތަކުރުފާނުން އަދުގެ ޖީލާއި ހަމަޔަށް ގެނެސްދިނުމަށް ވީ މައތިވެރި ގުރުބާނީ ގެ އަގަކީ ސިޔާސީ ކަސްތޮޅެއްގައި ދިފާއީ ބާރު ބަނދެލުން ބާއޭ ހިތްޕުޅަށް ހިތަށް އަރާވަޑައިގަންނަވާނެކަން ކަށަވަރެވެ. 

އަމަން ބަލަހައްޓަވާ ބޭފުޅުންނަށް އެއްވެސް ބުރައެއް ނުވަތަ ތަކުލީފެއް އުފުއްލަވަން ޖެހިވަޑައިނުގެން، މިނިވަންކަމާއެކު އެ ތިއްބެވެނީ މުހައްމަދު ތަކުރުފާނު ގައުމަށްޓަކައި ވީ މަރިވެރި ގުރުބާނީގެ ސަބަބުންނެވެ. މިނިވަންކަމާއެކު މި ގައުމު އެ ތަކުރުފާނަށްފަހު ދެން އަންނަން އޮތް ޖީލުތަކާއި ހަވާލުކޮށްދެއްވުމަށް އުމުރުގެ އެންމެ ޒުވާން ދުވަސްވަރު ކުރެއްވި ޖިހާދުގެ ސަބަބުންނެވެ. 

އެޒިންމާ އަމިއްލަފުޅަށް ކޮނޑުގައި އެޅުއްވީ ފަހަރެއްގައިވެސް މަތިން އޯޑަރެއް އައިސްގެނެސް ނޫނެވެ. 

އެހެންކަމަށްވާއިރު، މިއަދު މުހައްމަދު ތަކުރުފާނު ދުނިޔޭގައި ހުންނެވި ނަމަ ޔަގީނުންވެސް ގައުމީ ދިފާއީ ބާރުގެ އިސް ބޭކަލުންގެ ކަންފަތްޕުޅުގައި ހިތްޕަވާ ގައުމަށް އިހުމާލު ނުވުމަށް ނަސޭހަތްތެރި ވާނެއެވެ. ރާއްޖޭގެ ޖައްވު އަޅުވެތިކަމުގެ ކަޅު ސާލަކުން ފޮރުވާލުމަށް މަސައްކަތް ކުރަމުންދާކަމުގެ ނުރައްކާތެރި ރަނގަބީލުތައް އިންޑިއާ ކަނޑުގެ އެކި ދިމާލުން ގުގުމާލާފައިވާއިރު، އެ އަޑު އިވިނުލައްވަނީ ތޯ ސުވާލު ކުރައްވާނެއެވެ. އަދި އެ އަޑުތަކަށް ގާފިލުވެ ގައުމާ މެދު އިހުމާލުވާން ދިފާއީ ބާރު ދޫކޮށެއް ނުލައްވާނެއެވެ. 

ގައުމުގެ ހައްގުގައި ކުރެވޭ މަސައްކަތް ކުރުމަށް މަތިން އޯޑަރު އާދޭތޯ ނާދޭތޯ ބައްލަވަން ތިއްބެވުމަށް ވާގިވެރިއެއް ނުވާނެއެވެ. އަދި އެ ޒިންމާ ކުރިއެކޭވެސް އެއްގޮތަށް އެ ތަކުރުފާނު ނަންގަވާނެއެވެ. އަރިހުގައި ހަމަ އެކަކު ނެތް ނަމަވެސް ފަރުވާލެއް ނުބަހައްޓަވާނެކަން ޔަގީނެވެ. 

މިއީ ދިފާއީ ބަރުތަކުގެ އިސްވެރިން ގައުމީ ދުވަހުގެ މި އުފާވެރި ހަފްލާގައި ވިސްނަވާލުން މުހިންމު ކަމެކެވެ. 

މުހައްމަދު ތަކުރުފާނު ދުނިޔޭގައި ނެތްކަމަވެސް އެތަކުރުފާނުގެ ވަސިއްޔަތް އެވަނީ ތާރީހުގެ ތެރެއަށް ދޫކުރައްވާފައެވެ. އެއީ، ގައުމައި ރައްޔިތުން ހިމާޔަތްކުރުމުގެ މަސްއޫލިއްޔަތު ކޮނޑުގައި އަޅުއްވައިގެން ނިކުންނަ ހަމަ ކޮންމެ ދިވަހި ދަރިއަކަށް އެ ތަކުރުފާނު ކުރައްވާފައިވާ ވަސިއްޔަތެކެވެ. 

އެމަނިކުފާނު ދުނިޔޭ ދޫކުރެއްވީ ގައުމާއި ދީން އެހެން ހުރިހާ ކަމަކަށްވުރެ އިސްކުރުމަށް ވަސިއްޔަތްކޮށް އެ މިސާލު ދައްކަވާފައެވެ. 

ގައުމީ ދުވެހގެ މުނާސަބާ އުފާވެރި އީދެއްގެ ސިފައިގައި ފާހަގަކޮށް، ކުލަގަދަ ހަފްލާތައް ބެއްވިކަމުގައި ވީނަމަވެސް ހަގީގީ މާނައިގައި އެ ތަކުރުފާނުގެ ޒިކުރާ އާކުރެވުނު ކަމަށްވާނީ އެ ތަރުކުފާނު ދޫކުރެއްވި ފިލާވަޅުތަކުން ފިލާވަޅު ނަންގަވާ އެތަކުރުފާނުންގެ ވަސިއްޔަތުގައި ހިފައި ގައުމަށްޓައި އޮތް މަސްއޫލިއްޔަތު އަދާކޮށްގެން ނޫން ތޯ އެވެ.