ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ހަރަކާތްތައް ވަރުގަދަކޮށް އެ ޕާޓީއަށް މެމްބަރުން އިތުރުކުރުމަށް ޕީޕީއެމްގެ ރައީސް އަދި އެ ޕާޓީގެ 2023 ވަނަ އަހަރުގެ ރިޔާސީ ކެންޑިޑޭޓް ޔާމީން އަބްދުލްގައްޔޫމު ދ.ކުޑަހުވަދޫއަށް ވަޑައިގަތުމަށް ނިންމަވައިފިއެވެ. 

އެކަން އިދިކޮޅު ކޯލިޝަންގެ ތަރުޖަމާނު ހީނާ ވަލީދު ވަނީ މީޑިއާއަށް ކަށަވަރުކޮށްދެއްވާފައެވެ. 

ރައީސް ޔާމީން ކުޑަހުވަދުއަށް ވަޑައިގަތުމަށް ނިންމަވާފައިވަނީ މި މަހުގެ 29 ވަނަ ދުވަހުގައެވެ. 

އިދިކޮޅުން ބުނީ އެމަނިކުފާނުގެ މި ދަތުރުފުޅުގައި ކުޑަހުވަދޫގެ ރައްޔިތުންނާއި ބައްދަލުކުރައްވާނެކަމަށެވެ. 

އޭގެ އިތުރުން ޕާޓީގެ ހަރަކާތްތައް އިތުރުކުމާއި ޕާޓީއަށް މެމްބަރުން އިތުރުކުރުމުގެ މަސައްކަތްޕުޅުވެސް ކުރައްވާނެކަމަށް ހީނާ ވިދާޅުވިއެވެ. 

އަދި ހަމައެހެންމެ ރައީސް ޔާމީން ބައިވެރިވެވަޑައިގަންނަވާ ވަރަށް ޚާއްސަ ޖަލްސާއެއް ބުރާސްފަތި ދުވަހުގެ ރޭ ކުޑަހުވަދޫގައި ބޭއްވުމަށްވެސް ވަނީ ހަމަޖެހިފައެވެ. 

2023 ވަނަ އަހަރުގެ ރިޔާސީ އިންތިޚާބަށް ޕީޕީއެމުންވެސް ވަނީ ތައްޔާރުވާން ފަށައިފައެވެ. އެގޮތުން ޕީޕީއެމްގެ ހިންގުން ހަރުދަނާކޮށް ޕާޓީއަށް މެމްބަރުން އިތުރުކުރުމަށް މިހާރުވެސް އެ ޕާޓީއިން ގިނަ ހަރަކާތްތަކެއް ކުރަމުންދާކަން ފާހަގަކޮށްލެވެއެވެ. 

ރައީސް ޔާމީން ކުޑަހުވަދޫއަށް ވަޑައިގަންނަވަން ނިންމަވާފައިވާއިރު، މި ދަތުރުފުޅަށް ތައްޔާރުވުމަށް ޕީޕީއެމްގެ އެޑްވާންސް ޓީމެއް މިވަގުތު ތިއްބެވީ ކުޑަ ހުވަދޫގައެވެ.

ކުޑަހުވަދޫއަށް ވަޑައިގެން ޕީޕީއެމްގެ ޓީމަށް އެރަށުން ހޫނު މަރުހަބާއެއް ކިޔާފައިވާއިރު، ރައީސް ޔާމީން އެރަށަށް ވަޑައިގަންނަވާނެ ދުވަހަކށް ރައްޔިތުން އިންތިޒާރު ކުރަމުންދާކަމަށް އެ ޓީމުގައި އިސްކޮށް ހުންނެވި އިދިކޮޅުގެ އެކްޝަން ޑިޕާރޓުމަންޓުގެ ޗެއަރ އަދި މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއިލް ވަނީ ވިދާޅުވެފައެވެ.