އިންޖީނުލީ އެއްގަމު އުޅަނދު ރަޖިސްޓްރީ ކުރުމުގައި އަމިއްލަ ފަރާތެއްގެ ގަރާޖެއްގައި އެ އުޅަނދު ބާއްވަން ލާޒިމުނުވާ ގޮތަށް ހަދަން އެއްގަމު ދަތުރުފަތުރުގެ ގާނޫނަށް ހުށަހެޅި އިސްލާހު މަޖިލީހުން ބޭރުކޮށްލައިފިއެވެ.
މިއީ މި އިސްލާހު މަޖިލީހުން ބޭރުކޮށްލި ދެވަނަ ފަހަރެވެ. މި އިސްލާހު މަޖިލީހަށް ހުށައަޅުއްވާފައިވަނީ މަޖިލީހުގެ ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބްދުﷲ (މޮސްޓާ) އެވެ.
މޮސްޓާ ހުށަހެޅުއްވި ބިލުގައި ބުނެފައިވަނީ އެއްގަމުގައި ދުއްވާ އިންޖީނުލީ އުޅަނދުފަހަރު ރަޖިސްޓްރީ ކުރާ އިރު، ދެ ފުރޮޅަށް ވުރެ ގިނަ ފުރޮޅުލީ އުޅަނދު ގަރާޖެއްގައި ރަޖިސްޓްރީ ކުރާ ގޮތަށް މިހާރު އޮންނާތީ އެކަމުގެ ނާޖާއިޒް ފައިދާ ނަގައި ބޮޑެތި އަދަދުތަކުން ގަރާޖު ކުލި ނަގަމުންދާ ކަމަށެވެ.
ގަރާޖުގައި އޮންނަ ޖާގައަށް ވުރެ ގިނަ އުޅަނދު ގަރާޖުގައި ރަޖިސްޓްރީކޮށްދީ، އެފަދަ އަމަލުތައް ބައެއް ފަރާތްތަކުން ހިންގަމުން ގެންދާތީ އަދި އެކަން ރަނގަޅަށް މޮނީޓާ ކުރެވޭ ތަން ނުފެންނާތީ އެ ކަމަށް ހުއްޓުމެއް ގެންނަން ޖެހޭ ކަމަށާއި، ވެހިކަލް ރަޖިސްޓްރީ ކުރަން ބޭނުންވާ ފަރާތްތަކަށް ބޮޑު ތަކުލީފަކަށްވެ، އެކަމުން ސަރުކާރުން ހާސިލުކުރަން ބޭނުންވާ މަގުސަދު ހާސިލު ނުވެ، ގިނަ ރައްޔިތުންގެ ކަންބޮޑުވުން އޮތް މައްސަލައެއްކަންވެސް މޮސްޓާ ވަނީ ފާހަގަކުރައްވާފައެވެ.
އެ ބިލުގެ އިބްތިދާއީ ބަހުސްގައި ގިނަ މެމްބަރުން ވަނީ ވެހިކަލް ރަޖިސްޓްރީ ކުރުމުގައި ސަރުކާރުގެ ކަމާ ބެހޭ މުއައްސަސާތަކުން ކޮރަޕްޝަން ހިންގާކަމުގެ ތުހުމަތު ކުރައްވާފަ އެވެ.
އެ ބިލަށް މަހުސް ކުރުން މިއަދު ނިންމާލާ ވޯޓު ނަގާފައިވާއިރު، އެ ބިލު ބަލައިގަތުމށް ވޯޓު ދެއްވީ އެންމެ މެމްބަރެކެވެ. ވޯޓުގައި ބައިވެރިވި 36 މެމްބަރުން ވަނީ އެ ބިލު ބަލައިގަންނަން ނުފެންނަކަމަށް ވޯޓު ދެއްވާފައެވެ.
އެއާއެކު މޮސްޓާގެ އެ ބިލު މަޖިލީހުން ވަނީ ބޭރުކޮށްލާފައެވެ.
Advertisement
This content is created and paid for by advertisers and does not involve Voice Journalists
