ކުރިއަށް އޮތް ރިޔާސީ އިންތިޚާބުގައި ޕީޕީއެމް-ޕީއެންސީ ކޯލިޝަންގެ ރިޔާސީ ކެނޑިޑޭޓް އަދި ކުރީގެ ރައީސް ޔާމީން ރިޔާސީ އިންތިޚާބުގައި ވާދަނުކުރެއްވޭނަމަ އިންތިޚާބު ބޭއްވިޔަ ނުދޭނެ ކަމަށް ޕީއެންސީގެ ނައިބު ރައީސް މުހައްމަދު ހުސެއިން ޝަރީފް (މުންދު) ވިދާޅުވެއްޖެއެވެ.

ރޭ ސަންގު ޓީވީއިން ގެނެސްދިން ޕްރޮގްރާމެއްގައި ވާހަކަދައްކަވަމުން މުންދު ވިދާޅުވީ ރިޔާސީ އިންތިހާބުގައި ވާދަނުކުރެވޭ ގޮތް ހަދައިގެން ޔާމީނަށް އަނިޔާކުރަން އުޅުމުގެ ބޭނުމެއް ނެތް ކަމަށާއި، ރައްޔިތުންގެ ތެރެއިން ގިނަ ބަޔަކު އެމަނިކުފާނު ވެރިކަމަށް ގެންނަން ބޭނުންވާ ކަމަށެވެ.

އަދި އެމަނިކުފާނުގެ ނަންފުޅު ވޯޓު ކަރުދާހުގައި ނެތް ނަމަ އެއަރައިގަނެވެނީ ގިނަ ބައެއްގެ ހައްގަށް ކަމަށްވެސް މުންދު ވިދާޅުވިއެވެ. 

Advertisement

"ދިވެހި ރައްޔިތުންގެ ތެރެއިން މެޖޯރިޓީ ބަޔަކު ބޭނުންވޭ ރައީސް ޔާމީން ވެރިކަމަށް ގެންނަން. އެހެން ކަމަށް ވަންޏާ ރައީސް ޔާމީންގެ ނަންފުޅު އޮންނަންޖެހޭނެ. އެހެން ނޫނީ ވަރަށް ގިނަ ބައެއްގެ ހައްގަށް ދެއްތޯ އެއަރައިގަނެވެނީ. އެބަޔަކު ނުތިބޭނެ ދެއްތޯ ބަލަހައްޓައިގެން ފަސް އަހަރު މި ލިބުނު އަނިޔާ އިތުރު ފަސް އަހަރު ލިބޭކަށް" މުންދު ވިދާޅުވިއެވެ.

މުންދު ވިދާޅުވީ މި ފަސް އަހަރު ލިބުނު އަނިޔާ އިތުރު ފަސް އަހަރު ލިބެން ބަލަހައްޓައިގެން އެ ރައްޔިތުން ނުތިބޭނެ ކަމަށާއި އެކަން ވިޔަނުދޭނެ ކަމަށެވެ.