ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ހަރަކާތްތައް އިތުރަށް ވަރުގަދަކޮށް އެ ޕާޓީއަށް މެމްބަރުން އިތުރުކުރުމަށް ޕީޕީއެމްގެ ރައީސް އަދި އެ ޕާޓީގެ 2023 ވަނަ އަހަރުގެ ރިޔާސީ ކެންޑިޑޭޓް ޔާމީން އަބްދުލްގައްޔޫމު ދ.ކުޑަހުވަދޫއަށް ވަޑައިގެންފިއެވެ. 

ދާދި ދެންމެ އަކު ރައީސް ޔާމީން އާއި އިދިކޮޅު އިއްތިހާދުގެ ޓީމު ކުޑަހުވަދޫއަށް ވަޑައިގެންފައިވާއިރު ގިނަ އަދަދެއްގެ މީހުން ވަނީ އެމަނިކުފާނަށް މަރުހަބާ ދެންނެވުމަށް ގޮސްފައެވެ. 

ރައީސް ޔާމީންގެ މި ދަތުރުފުޅުގައި، ކުޑަހުވަދޫގެ ރައްޔިތުންނާއި ބައްދަލުކުރައްވައި ޕީޕީއެމްގެ ހަރަކާތްތައް އިތުރުކޮށް ޕާޓީއަށް މެމްބަރުން އިތުރުކުރުމުގެ މަސައްކަތް ކުރައްވާނެކަމަށް އިދިކޮޅުން ބުނެފައިވެއެވެ. 

އަދި ހަމައެހެންމެ ރައީސް ޔާމީން ބައިވެރިވެވަޑައިގަންނަވާ ވަރަށް ޚާއްސަ ޖަލްސާއެއް ވެސް މިރޭ ކުޑަހުވަދޫގައި ބޭއްވުމަށް ހަމަޖެހިފައިވާ ކަމަށް އިދިކޮޅު ޕީޕީއެމުން ބުނެއެވެ. 

ރައީސް ޔާމީން ކުޑަހުވަދޫއަށް ވަޑައިގެންފައިވާއިރު، އެމަނިކުފާނުގެ މި ދަތުރުފުޅަށް ތައްޔާރުވުމަށް ޕީޕީއެމްގެ އެޑްވާންސް ޓީމެއް މިވަގުތު ތިއްބެވީ ކުޑަ ހުވަދޫގައެވެ.

2023 ވަނަ އަހަރުގެ ރިޔާސީ އިންތިޚާބަށް ޕީޕީއެމުންވެސް މިހާރު ވަނީ ތައްޔާރުވާން ފަށައިފައެވެ. އެގޮތުން ޕީޕީއެމްގެ ހިންގުން ހަރުދަނާކޮށް ޕާޓީއަށް މެމްބަރުން އިތުރުކުރުމަށް މިހާރުވެސް އެ ޕާޓީއިން ގިނަ ހަރަކާތްތަކެއް ކުރަމުންދާކަން ފާހަގަކޮށްލެވެއެވެ.