ސެޕްޓެމްބަރު 26 ވަނަ ދުވަހު އަވަހާރަވި އިސްލާމް ދީނުގެ މަޝްހޫރު އިލްމުވެރިޔާ އަލްޢައްލާމާ ޑރ.ޔޫސުފުލް ޤަރަޟާވީގެ މައްޗަށް މާދަމާގެ ހުކުރު ނަމާދަށްފަހު މުޅި ރާއްޖޭގައި ޣައިބުގައި ކަށު ނަމާދުކުރަން ހަމަޖެހިފައިވާކަން އިސްލާމިކް މިނިސްޓްރީން ހާމަކޮށްފި އެވެ.
އިސްލާމިކް މިނިސްޓްރީން ރާއްޖޭގެ ހުރިހާ ކައުންސިލް ތަކަކަށް ފޮނުވާފައިވާ ސާކިއުލާއެއްގައި ބުނީ، ޤަރަޟާވީ އަކީ މި ޒަމާނުގެ ޝަރީއާގެ ފުންނާބު އުސް އިލްމުވެރިޔެއް ކަމަށާއި އިސްލާމީ ފިކުރު ފެތުރުމާއި އިޖުތިހާދު ކުރުމުގެ އިސް މޭސްތިރިޔެއް ކަމަށެވެ.
އެހެންކަމުން، މާދަމާގެ ހުކުރު ނަމާދަށް ފަހު ރާއްޖޭގެ މީހުން ދިރިއުޅޭ ހުރިހާ ރަށެއްގެ ހުކުރު ކުރާ މިސްކިތެއްގައި ޤަރަޟާވީގެ މައްޗަށް ޢައިބުގައި ކަށުނަމާދު ކުރުމަށް ނިންމާފައިވާ ކަމަަށް އިސްލާމިކް މިނިސްޓްރީން ބުނެފައިވެއެވެ.
ޑރ.ޤަރަޟާވީ ދުނިޔެ ދޫކުރެއްވިއިރު އޭނާގެ އުމުރުފުޅަކީ 96 އަހަރެވެ. އޭނާއަކީ އިސްލާމީ ދުނިޔޭގައި ޝަރީޢަތާއި ފިޤުހުގެ އިލްމަށް އެންމެ މަޝްހޫރު އިލްމުވެރިންގެ ތެރޭގައި ހިމެނިވަޑައިގަންނަވާ މިޞްރަަށް ނިސްބަތްވެވަޑައިގަންވާ އަޒްހަރު ޔުނިވާސިޓީން ކިޔަވައިވިދާޅުވި ޤަޠަރުގެ ރައްޔިތެކެވެ.
ޢައްލާމާ ޤަރަޟާވީއަކީ މިޞްރުގެ އަލްޣަރުބިއްޔާއޭ ކިޔާ ޕްރޮވިންސްގެ ކުޑަ އަވަށެއް ކަމުަގއިވާ ޞިއްފަތު އަވަށަށް އުފަންވެވަޑައިގެންނެވި ބޭފުޅެކެވެ.
2008 ވަނަ އަހަރު ފޮރިން ޕޮލިސީ ނޫހާއި ޕްރޮސްޕެކްޓު މަޖައްލާއިން އެކުލަވައިލި ދުނިޔޭގެ އެންމެ ނުފޫޒުގަދަ ޝަޚުޞިއްޔަތުގެ ލިސްޓުގައި އެންމެ ނުފޫޒުގަދަ 20 ބޭފުޅުންގެ ތެރޭގައި ޤަރަޟާވީގެ ނަންފުޅު ހިމެނުނެވެ.
އާލާސްކަންފުޅު ބޮޑުވުމާ ހަމައަށްވެސް ކޮންމެ ހަފުތާއަކު އެއް ދުވަހު އަލްޖަޒީރާ ޢަރަބި ޗެނަލް މެދުވެރިކުރައްވައި ޤަރަޟާވީ ގެންދެވީ އައްޝަރީއާ ވަލްޙަޔާތުގެ ނަމުގައި ފަތުވާ ޕްރޮގުރާމެއް ގެނެސްދެއްވަމުންނެވެ.
ޤަރަޟާވީ ވަނީ 170 އަށްވުރެ ގިނަ ފޮތް ލިޔުއްވާފައެވެ. އެކި ކަހަލަ ކޮންފަރެންސްތަކާއި ޓީވީ ޕްރޮގުރާމުތަކާއި ނަދުވާތަކުގައި ދީނީ އިލްމު ފެތުރެއްވުމުގެ މަސައްކަތް ޤަރަޟާވީ ކުރެއްވިއެވެ.
Advertisement
This content is created and paid for by advertisers and does not involve Voice Journalists
