މަސްވެރިންނަށް ދިމާވެފައިވާ ވަރަށް ގިނަ މައްސަލަތަށް ވެރިކަމުގައި ހައްލުކޮށްދެއްވާފައިވާނެކަމަށް ކުރީގެ ރައީސް އަދި 2023 ވަނަ އަހަރުގެ ޕީޕީއެމްގެ ރިޔާސީ ކެންޑިޑޭޓް ޔާމީން އަބްދުލްގައްޔޫމު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވެފައިވަނީ ކުޑަ ހުވަދޫގައި އޮތް ޚާއްސަ ޖަލްސާއެއްގައި ވާހަކަފުޅުދައްކަވަމުންނެވެ.
ރައީސް ޔާމީން ވިދާޅުވީ އެމަނިކުފާނުގެ ވެރިކަމުގައި މަސްވެރިންނަށް ދިމާވެފައިވާ މައްސަލަތައް ހައްލުކޮށްދެއްވުމަށް ގިނަ މަސައްކަތްޕުޅުތަކެއް ކުރައްވާފައިވާނެކަމަށެވެ.
އޭރުވެސް މަސްވެރިކަން ތިޔާގިވާ މޫސުންތަކުގައި ބާނާ ހުރިމާ ކިރުމުގައި ދަތިތަކެއް ހުރިކަމަށް ރައީސް ޔާމީން ވިދާޅުވިއެވެ. އަދި ވިދާޅުވީ އެ ދަތިތައް ހައްލުކޮށްދިނުމަށް ގިނަ ހައްލުތަކެއް އެމަނިކުފާނުގެ ވެރިކަމުގައި ހޯއްދަވާދެއްވާފައި ވާނެކަމަށެވެ.
އޭގެ ތެރޭގައި މަސްވެރިން ބާނާ މަސްކޮޅު ކިރުމަށްފަހު، އެޔަށްވާ ފައިދާ ހޯދުމަށް ބިލު ކަރުދާސްކޮޅު ހިފައިގެން ދާން ޖެހޭ އުސޫލު ނިމުމަކަށް ގެނެސްދެއްވާފައިވާނެކަމަށް ރައީސް ޔާމިން ވިދާޅުވިއެވެ.
"ކުޑަ ސިޓީ ހިފައިގެން ނޫނީ ބިލު ކަރުދާސްކޮޅު ހިފައިގެން ޖީބަށް ލައިގެން އެޔަށް ފައިސާ ލިބޭނީ ކޮން ދުވަހަކުތޯ އެ ދިގު އިންތިޒާރުގައި ތިބެން ޖެހޭ ތިބުން އަޅުގަނޑުމެން ނިމުމަކަށް ގެނައިން"
ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން
ރައީސް ޔާމީން ވިދާޅުވީ މަސްވެރިންނަށް ކްރެޑިޓް ކާޑު ތައާރަފުކޮށްދިނުމުގެ އިތުރުން، އެ މީހުންގެ ރަށްރަށުގައި ހުންނަ ސަރުކާރު ކުންފުނިތަކުން ލޭންދޭނަށް ވިޔަފާރި ކުރެވޭނެ އިންތިޒާމުތައްވެސް ހަމަޖައްސާދެއްވާފައިވާނެކަމަށެވެ.
އޭގެ އިތުރުން މަސްވެރިންނަށް ތެލުގެ އަގު ހެޔޮކޮށްދީފައިވާނެކަންވެސް އެމަނިކުފާނު ފާހަގަކުރެއްވިއެވެ. އެއާއެކު، މަހުގެ އަގު 22 ރުފިޔާގައި ހިފަހައްޓާފައިވާނެކަމަށް ރައީސް ޔާމީން ވަނީ ވިދާޅުވެފައެވެ.
އެކަންކަން ފާހަގަކުރައްވާ ރައީސް ޔާމީން ވިދާޅުވީ، މިއަދު އެމަނިކުފާނު ރަށްތަކަށް ވަޑައިގަތުމުން މަސްވެރިން ގިނަ ކަންބޮޑުވުންތަކެއް އަދި ގިނަ ހުށައެޅުއްވުންތަކެއް ހުށައަޅާކަމަށެވެ.
މަސްވެރިންގެ ފަރާތުން ހުށައަޅުއްވާ ކަންކަމަކީ އުފަލާއެކު ބަލައިގަންނަ ހުށައެޅުންތަކެއްކަމަށް އެމަނިކުގާނު ވިދާޅުވިއެވެ. އެއާއެކު ވިދާޅުވީ ޕީޕީއެމްގެ ވެރިކަމެއްގައި މިހާރު މަސްވެރިން އުފަލަމުންދާ ތަކުލީފުތައް ޔަގީނުންވެސް އުފުލަން ނުހެޖޭގޮތަށް ކަންކަން ބައްޓަންކުރައްވަމުން ގެންދަވާނެކަމަށެވެ.
މަސްވެރިންނަކީ ޕީޕީއެމް މެނިފެސްޓޯގައި ޚާއްސަ އަހަންމިއްޔަތުކަމެއް ދީފައިވާ ބައެއްކަމަށާއި، މަސްވެރިންނަށް ދިމާވެފައިވާ މައްސަލަތައް ހައްލުކުރުމަށް ދިރާސާތައް ކުރުމަށްފަހު މެނިފެސްޓޯގައި އެކަންކަން ހިމަނުއްވާނެކަމުގެ ޔަގީންކަން ރައީސް ޔާމީން ވަނީ ދެއްވާފައެވެ.
Advertisement
This content is created and paid for by advertisers and does not involve Voice Journalists
