އައްލައުޙުލް މަޙްފޫޘުގައި ލިޔުއްވާފައިވާ ގޮތަށް ލަސްވުމެއް، އަވަސްވުމެއް ނެތި، އެމީހެއްގެ އަޖަލު އެމީހަކާ ބައްދަލު ކުރާނެކަމަށް މިއަދު ހުކުރުޚުތުބާގައި ބުނެފިއެވެ.

"މަރަށް ތައްޔާރުވުން" މައުޟޫއަށް މިއަދު އިއްވު ޚުތުބާގައި ބުނީ، ﷲ ސުބުހާނަހޫ ވަތަޢާލާ ޚަލްޤުކުރައްވައި، ފުރާނަ އަޅުއްވާފައިވާ ކޮންމެ މަޚުލޫޤަކީ، މަރުގެ ރަހަ ދެކި، ފަނާވެދަނަވި އެއްޗެއް ކަމަށެވެ. އަދި ﷲގެ ޛާތުފުޅު މެނުވީ، އެހެން ހުރިހާ ތަކެއްޗެއް ފަނާވެދާނެ ކަމަށެވެ.

މިއާއެކު ޚުތުބާގައި ބުނީ، މާތްﷲ ވަނީ އެކަލާނގެ އަޅުތަކުންގެ އަޖަލު ކަނޑައަޅުއްވައި، އައްލައުޙުލް މަޙްފޫޘުގައި ލިޔުއްވާފައި ކަމަށާ، އެ ލިޔުއްވާފައިވާ ގޮތާ ކުޑަކޮށް ވެސް ތަފާތެއްނެތި، އަދި ލަސްވުމެއް، އަވަސްވުމެއް ނެތި، އެމީހެއްގެ އަޖަލު އެމީހަކާ ބައްދަލު ކުރާނެކަމަށެވެ. 

Advertisement

"އިންސާނުންގެ ތެރެއިން ޤަތުލުވާ މީހުންނާއި، ޣަރަޤުވާ މީހުންނާއި، އެކްސިޑެންޓްތަކުގައި މަރުވާ މީހުންނާއި، އަލިފާނުގެ ޙާދިޘާތަކާއި، އެހެނިހެން ސަބަބުތަކާ ހެދި މި ދުނިޔެއިން ވަކިވެގެންދާ މީހުން ވެސް، ވަކިވެގެން އެދަނީ އޭނާގެ އަޖަލުފުރިހަމަ ކޮށްފައެވެ." ޚުތުބާގައި ބުނެފައިވެއެވެ.

ހުތުބާގައި އިތުރަށް ބުނީ، އިންސާނާގެ ގާތަށް މަރު އަންނާނީ ކޮން ވަގުތަކުކަމެއް އެނާއަކަށް ނޭނގޭނެ ކަމަށާ، އެކަން ދެނެވޮޑިގެންވަނީ ހަމައެކަނި މާތްﷲ ކަމަށެވެ. އެހެނީ ޣައިބުގައިވާ ކަންކަމުގެ ތަޅުދަނޑި މިލްކްވެވޮޑިގެންވަނީ، ހަމައެކަނި އެކަލާނގެއަށް ކަމަށްވެސް ޚުތުބާގައި ބުނެފައިވެއެވެ. 

މަރަށް ޙާޟިރުވެފައިވާ ކޮންމެ އިންސާނަކަށް ވެސް މަރުގެ ވޭނާ ކުރިމަތިލާންޖެހޭނެ ކަމަށާ، އަހަރެމެންގެ ނަބިއްޔާ މުހައްމަދު ޞޢވ ވެސް އެ ވޭނާ ކުރިމަތި ލެއްވި ކަމަށް ހުތުބާގައި ބުންޏެވެ.

"މާތްﷲ ވަހީ ކުރެއްވި ބަސްފުޅެއްގެ މާނަގައިވެއެވެ. : “އަދި މަރުގެ ވޭން ޙައްޤު ގޮތުގައި އަންނަ ހުއްޓެވެ. އެއީ ތިބާ އެޔަށް ފިލަންއުޅޭ ކަމުގައިވީ މަރެވެ.”  ޚުތުބާގައި ބުނެފައިވެއެވެ. 

އެހެންކަމުން އަހަރެމެންނަކީ ދުނިޔޭގެ ޒީނަތްތެރިކަމުގެ އަވައިގައި ޖެހި، އާހިރަތް ހަނދުމަނެތި ކުރާ ބަޔަކަށް ނުވުމަށާއި، ލޯތަކަށް ފެންނަން އޮތް އެންމެ ބޮޑު ހަގީގަތް ކަމުގައިވާ މަރާމެދު ގާފިލުވާ ބަޔަކަށް ނުވުމަށް ހުތުބާގައި ނަސޭހަތްތެރިވެފައިވެ އެވެ.