މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަނުގެ އެއްވެސް ރިސޯޓެއްގެ ހެޑްލީސް ވިއްކާލުމުގެ މުއާމަލާތެއް ކުރިއަށްނުދާކަމަށް އެކުންފުނިން ބުނެފިއެވެ.
އެމްޓީޑީސީގެ ބައެއް ރިސޯޓްތަކުގެ ހެޑްލީސް ވިއްކާލަން އުޅޭކަމަށް ދެކެވެމުންދާ ވާހަކަތަކާ ގުޅިގެން މިއަދު އެކުންފުނިން ނެރުނު ބަޔާނުގައި ބުނެފައިވަނީ، އެކުންފުނިން ރިސޯޓް ތަރައްޤީކޮށް ހިންގުމަށް ސަބްލީސް ކޮށްފައިވާ އެއްވެސް، ރަށެއްގެ ހެޑްލީސް ޙައްޤެއް ވިއްކާލުމަށް ނިންމާފައި ނުވާ ކަމަށެވެ. އަދި އެފަދަ މަޝްވަރާ އެއްވެސް، ކުރިއަށްނުދާކަން އެމަ.ޓީޑީސީގެ މެނޭޖްމަންޓް އަދި ޑިރެކްޓަރުންގެ ބޯޑުން ކަށަވަރުކޮށްދޭކަމަށް ވަނީ ބުނެފައެވެ.
އެމްޓީޑީސީން ބުނީ ރިސޯޓް ތަރައްޤީކުރުމަށް ސަރުކާރުން އެކުންފުންޏަށް ދީފައިވާ އެއްވެސް ރަށެއް އެއްވެސް ފަރާތަކަށް ވިއްކާނުލާކަމަށެވެ. އެގޮތުން ހދ ނާގޯށި، ގދ މަގުއްދުވާ އަދި ބ ކިހަވައްހުރަވަޅި މި ތިން ރަށުގެ ހެޑްލީސް އާ ގުޅޭ އެންމެހާ ހައްޤުތަކުގެ މިލްކުވެރި ފަރާތަކީ އަދިވެސް އެކުންފުނި ކަމަށެވެ.
އެމްޓީޑީސީން ވަނީ ބައެއް މީޑިއާތަކުގައި އެކުންފުނީގެ ހަރުމުދާ ވިއްކަންއުޅޭ ވާހަކަތައް ދޮގުކޮށްފައެވެ. އެމްޓީޑީސީގެ މުއާމަލާތްތަކުގެ އެންމެހާ މައުލޫމާތުތައް ހިއްސާދާރުންނަށް ހިއްސާކުރަމުންދާނޭކަމުގެ ޔަގީންކަން ދެމުން އެކުންފުނިން ވަނީ، ލިސްޓުކުރުމުގެ ގަވާއިދުގައި ބަޔާންކޮށްފައިވާ ހުރިހާ ކަމެއް އެކުންފުނިން ކުރަމުންދާނީ ހާމަކަމާއެކުގައިކަމަށް ބުނެފައެވެ.
އެމްޓީޑީސީއަކީ ފަތުރުވެރިކަމުގެ މަންފާ ދިވެހި ރައްޔިތުންނަށް ސީދާ ގޮތެއްގައި ހޯދައިދިނުމަށް ރައީސް މައުމޫން ވެރިކަމުގައި 2006 ވަނަ އަހަރު ވުޖޫދަށް ގެނައި ކުންފުންޏެކެވެ.
Advertisement
This content is created and paid for by advertisers and does not involve Voice Journalists
