ބާޒާރުގައި ތަކެތީގެ އަގު ބޮޑުވެއްޖެއޭ ކިޔައިގެން އިދިކޮޅު ސިޔާސީ ފަރާތްތަކުން ވާހަކަތައް ދައްކަނީ އެއްވެސްކަހަލަ އަސާސެއްގެ މައްޗަށް ބިނާކޮށް ނޫންކަމަށް ސަރުކާރުގެ އިގްތިސާދީ ވަޒީރު މުހައްމަދު ސައީދު ވިދާޅުވެއްޖެއެވެ.

ބާޒާރުގައި ތަކެތީގެ އަގުބޮޑުވެ ރައްޔިތުންނަށް ތަކްލީފަކަށް ވެއްޖެކަން ފާހަގަކޮށް އިދިކޮޅު އެމްޑީޕީއަށް ނިސްބަތްވާ އެކި ފަރާތްތަކުން ސޯޝަލް މީޑިއާގައި ފަތުރަމުންގެންދާ ވާހަކަތަކާ ގުޅޭގޮތުން މިނިސްޓަރު ސައީދު ވިދާޅުވީ، ބާޒާރުގައި ތަކެތި އަގުބޮޑުކަމަށް އިދިކޮޅު ބައެއް ފަރާތްތަކުން ދައްކަމުންގެންދާ ވާހަކަތައް ސާފް ނުވާކަމަށެވެ. އެގޮތުން މިނިސްޓަރު ސައީދު ވަނީ ބައެއް ފަރާތްތަކުން އަގުބޮޑުަކަމަށް ފާހަގަކުރި ބައެއް ތަކެތި ބާޒާރުގައި އެފަރާތްތަކުން ފާހަގަކުރި އަގުތަކަށްވުރެ ހެޔޮއަގުގައި ލިބެންހުރިކަމާއި ލިބެންހުރި ތަންތަންވެސް ކިޔާދެއްވާފައެވެ.

މީގެ އިތުރުން ބައެއް ޤައުމުތަކަށްވުރެ މިއަދުވެސް ރާއްޖޭގައި ނިސްބަތުން ހަކަތައިގެ ގޮތުގައި ބޭނުންކުރާ ތެލުގެ އަގުހެޔޮކަމަށް ވިދާޅުވެ މިނިސްޓަރު ވަނީ އިންޑިއާ، ޔޫއޭއީ އަދި ސިންގަޕޫރުގައި ތެލުގެ އަގުތައް ލިބެންހުރި މިންވަރާއި ރާއްޖޭގައި އާންމުނަށް ތެއޮ ވިއްކާއަގާ ގުޅޭގޮތުން ވހަކަ ދައްކަވާފައެވެ. އެގޮތުން ސިންގަޕޫރު އަދި އިންޑިއާއަށްވުރެ ރާއްޖޭގައި ޕެޓްރޯލްގެ އަގު ހެޔޮކަން މިނިސްޓަރު ސައީދު ވިދާޅުވިއެވެ.

ސިންގަޕޫރުގައި މިއަދު ޕެޓްރޯލް ލީޓަރެއް 40.09 ރުފިޔާއަށް އުޅޭއިރު އިންޑިއާގައި ޕެޓްރޯލް ލީޓަރެއްގެ އަގު މިހާރު ހުރީ 18.8 ލާރިއަށް ކަމަށާއި އެކަމަކު ރާއްޖޭގައި 16.1 ރުފިޔާއަށް ޕެޓްރޯލް ލީޓަރެއް ލިބެން ހުރިކަން ވަޒީރު ވަނީ ފާހަގަކުރައްވާފައެވެ.

މިނިސްޓަރު ސައީދު ވިދާޅުވީ އިދިކޮޅު އެމްޑީޕީގެ ވިސްނުމަކީ އޮގަސްޓް 12 އަދި 13 މި ދެ ދުވަހު ޤައުމު ހަލަބޮލިކުރުން ކަމަށާއި މިއީ ކޮންމެ އަހަރަކުވެސް އެފަރާތްތަކުން ކުރަމުން އަންނަ ކަމެއްކަމަށެވެ. ސަރުކާރުގެ އިގްތިސާދީ ކަންކަމަށް އިދިކޮޅުފަރާތްތަކުން ހަޖޫ ޖަހަމުންދާއިރު، ކަންކަނ ްކުރަންވީ ރަނގަޅު ގޮތުގެ ވާހަކަ އެފަރާތްތަކަށް ބުނެ ނުދެވޭކަން މިނިސްޓަރު ވަނީ ފާހަގަކުރައްވާފައެވެ.