ކުރިއަށް އޮތް 2023 ވަނަ އަހަރުގެ ރިޔާސީ އިންތިޚާބަކީ ރާއްޖޭގައި ގައުމިއްޔަތު އޮންނާނެ ތޯ ނުވަތަ ނޫން ތޯ ކަނޑައަޅާ އިންތިޚާބަކަށް ހައދަވާދެއްވުމަށް ވާދަވެރި ސިޔާސީ ލީޑަރު އަދި ކުރިއަށް އޮތް ރިޔާސީ އިންތިޚާބުގައި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު އެދިވަޑައިގެންފިއެވެ.
އެމަނިކުފާނު މިފަދައިން ވިދާޅުވެފައިވަނީ ކުޑަ ހުވަދޫގައި ބޭއްވި ޖަލްސާއެއްގައި ވާހަކަދައްކަވަމުންނެވެ.
ކުޑަހުވަދޫއަށް ރައީސް ޔާމީން ކުރެއްވި ދަތުރުފުޅަކީ ޕީޕީއެމްގެ ރިޔާސީ ޓިކެޓު އެމަނިކުފާނަށް ލިބިވަޑައިގެންނެވުމަށްފަހު އަތޮޅުތެރެއަށް ކުރެއްވި އެންމެ ފުރަތަމަ ދަތުރުފުޅެވެ.
މިދަތުރުފުޅުގައި ކުޑަ ހުވަދޫއިން އެމަނިކުފާނަށް ހޫނު މަރުހަބާއެއް ކިޔާފައިވާއިރު، އެރަށުން ގިނަ އަދަދެއްގެ ބަޔަކު ވަނީ ޕީޕީއެމްއާއި ގުޅިފައެވެ.
އެމަނިކުފާނު އެރަށަށް ވަޑައިގަތުމާއި ގުޅިގެން ކުރިއަށް ގެންދިޔަ ޚާއްސަ ޖަލްސާއެއްގައި ވާހަކަދައްކަވަމުން ރައީސް ޔާމީން ވިދާޅުވީ 2023 ވަނަ އަހަރުގެ ރިޔާސީ އިންތިޚާބަކީ ފަހަރެއްގައިވެސް ސިޔާސީ ޕާޓީގެ ވާދަވެރިކަން ފެނިގެންދާނެ އިންތިޚާބެއް ނޫންކަމަށެވެ. އަދި އެއީ ސިޔާސީ ޕާޓީއާއި ލީދަރުންނަށް އޮތް ތާއީދު ދައްކުވައިދޭނެ އިންތިޚާބެއްވެސް ނޫންކަމަށެވެ.
އެ އިންތިޚާބަކީ ރާއްޖޭގެ މިސްތަގުބަލުގައި މި ގައުމުގައި ގައުމިއްޔަތު އޮންނާނެތޯ ނުވަތަ ނޫންތޯ ކަނޑައެޅިގެންދާނެ އިންތިޚާބެއްގެ ގޮތުގައި ރައީސް ޔާމީންގެ ވާހަކަފުޅުގައި ވަނީ ސިފަކުރައްވާފައެވެ.
"މިއަންނަ އަހަރުގެ އިންތިޚާބަކީ އެއީ ޕީޕީއެމްގެ އިންތިޚާބެއް ނޫން. މިއަންނަ އަަހަރުގެ އިންތިޚާބު ތިޔަ ބޭފުޅުން ހައްދަވައިދެއްވަންވީ ގައުމިއްޔަތު އޮންނާނެތޯ ނޯންނާނެތޯ؟ ދިވެހިރާއްޖޭގެ އިސްލާމްދީނަށް އޮންނަ ޝައުގުވެރިކަމާއި މި ހިދާޔަތުގައި އަޅުގަނޑުމެން ތިބޭނެ ތޯ ނޫންތޯ؟ ދިވެހިވަންތަ ސިފަތަކާއި ދިވެހިރާއްޖޭގައި އަޅުގަނޑުމެންގެ ސަގާފަތާއި، އަޅުގަނޑުމެންގެ އާދަކާދައަށް އަޅުގަނޑުމެން ލޯބިކުރާނެ ތޯ ނުވަތަ ނޫންތޯ، ދިވެހި ބަހުގެ ތެރޭގައި މިހިރަ ގައުމިއްޔަތުގެ ވާހަކަ އެންމެ ބޮޑަށް ދެކެވޭކަމުގައި ވަންޏާ، މިއީ ގައުމިއްޔަތެއް އޮތުމާއި ގައުމިއްޔަތެއް ނެތުމާއި ދޭތެރޭ ނެގޭ ވޯޓަކަށް ހައްދަވާ"
ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން
އެއާއެކު ރައީސް ޔާމީން ވިދާޅުވީ ކުރިއަށް އޮތް ރިޔާސީ އިންތިޚާބުގެ ވޯޓަކީ ރައީސް ޔާމީންއާއި ވާދަވެރި ކެންޑިޑޭޓަކާއި ދެމެދު ނެގޭ ވޯޓަކަށް ވުރެ ބޮޑަށް، ރާއްޖޭގައި ރައްޔިތުން ހިފަހައްޓަން ބޭނުންވާ ހަމަތަކާއި އުސޫލުތައް ހިފެހެއްޓުމާއި، ނައްތާލުމާއި ދެމެދުގައި ނެގޭ ވޯޓެއްކަމަށް ހައްދަވާދެއްވުމަށް އެދިލައްވާފައެވެ.
އެމަނިކުފާނު މިފަދައިން އިލްތިމާސްކުރައްވާފައިވަނީ މި ވެރިކަމުގެ ފަސް އަހަރުގައި ދިވެހިރާއްޖޭގެ ގައުމިއްޔަތަށް ވަރަށް އިހާނެތިކޮށް ކަންކަން ކޮށްފައިވާކަން އިޝާރާތްކުރައްވާ އެކަންކަން އިތުރަށް ހިންގުމަށް ފުރުސަތު ނުދިނުމަށް ރިޔާސީ އިންތިޚާބުގެ ބޭނުން ހިތްޕެވުމަށް އެދިވަޑައިގަންނަވަމުންނެވެ.
2023 ގެ އިންތިޚާބަށް ފައި ނަގާއިރު، ކޮންމެ ރަށަކުންވެސް މި ކަންކަމާއި ދޭތެރޭ ވިސްނަވާ، އެއްބަޔަކު އަނެއްބަޔަކަށް މިކަންކަމަށް ނަސޭހަތްތެރިވުމަށްވެސް ރައީސް ޔާމީންގެ ވާހަކަފުޅުގައި ވަނީ އިލްތިމާސްކުރައްވާފައެވެ.
Advertisement
This content is created and paid for by advertisers and does not involve Voice Journalists
