ބޯހިމެނުމުގެ ފީލްޑް މަސައްކަތް ރާއްޖޭގެ ހުރިހާ ރަށެއްގައި ވެސް މިހާރު ނިންމާލާފައިވާއިރު ބޯހިމެނުމަށް މާލެ ސަރަހައްދުގައި މައުލޫމާތު ނުލިބޭ 900 އަށް ވުރެ ގިނަ ތަންތައް އަދިވެސް އެބަހުރި ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް އިން ބުނެފި އެވެ.

އެ ބިއުރޯ އިން މިއަދު ނެރުނު ނޫސްބަޔާނެއްގައި ބުނީ، ބޯހިމެނުމުގެ ފީލްޑް މަސައްކަތް ރާއްޖޭގެ ހުރިހާ ރަށެއްގައި ވެސް މިހާރު ނިންމާލާފައިވާކަމަށެވެ.  އެހެންނަމަވެސް، މާލެ ސަރަހައްދުން މައުލޫމާތު ނުލިބޭ 900 އަށް ވުރެ ގިނަ ތަންތަން އަދިވެސް އެބަހުރި ކަމަށާ، ވުމާއެކު އެފަދަ ތަންތަނުން މީހުންނާ ގުޅޭނެ ގޮތް ފަހިވޭތޯ ބެލުމަށް މަސައްކަތް ކުރަމުން އަންނަ ކަމަށް ބަޔާނުގައި ވެއެވެ.

އަދި އެ މައުލޫމާތު ނުލިބި ހުރި ތަންތަނުގެ ތެރޭގައި، ތަޅުލާފައި ހުރުމުންނާއި ގުޅޭނެ ގޮތެއް ނުވުމާއި މައުލޫމާތު ދޭނެ މީހަކާ ދިމާނުވުމާއި ރަށުން ބޭރުގައި އުޅުމާއި އެޕޮއިޓްމަންޓް ދިން ނަމަވެސް އެ ގަޑި އަށް ޓީމުތަކަށް ނުދެވި ހުރި ތަންތަން ވެސް ހިމެނޭ ކަމަށް ބިއުރޯ އޮފް ސްޓެޓިސްޓިކްސް އިން ފާހަގަކޮށްފައި ވެއެވެ. އަދި އޭގެ އިތުރުން، އެތަން ތަނުގެ ތެރޭގައި ބޭނުންނުކުރާ ތަންތަނާއި މީހުން ދިރިނޫޅެ ތަންތަން ހުރުން އެކަށީގެންވާ ކަމަށް ވެސް އެ ބިއުރޯއިން ބުނެއެވެ.

Advertisement

"އެހެންކަމުން މިހާތަނަށް ބޯހިމެނިފައި ނުވާ ތަންތަނާއި، ލޭބަރ ކުއާޓާ އަދި ރެޖިސްޓްރީ ކޮށްގެން ހިންގާ އިގްތިސާދީ މަސައްކަތް ހިންގާ ތަންތަނުން، އަދި ބޭނުން ނުކުރާ ތަންތަނުން ވެސް ވީވަރަކުން ފާހަގަކޮށްދެއްވައި މި ބިއުރޯއަށް އަންގަވާލަ ދެއްވަމުން ގެންދިޔުމަށް އާއްމުންގެ ކިބައިން މި ބިއުރޯއިން އެދެމެވެ." ނޭޝަނަލް ބިއުރޯ އޮފް ސްޓެޓިސްޓިކްސް އިން ނެރުނު ބަޔާނުގައިވެއެވެ. 

އެގޮތުން ބޯހިމެނުމަށް މައުލޫމާތު ނުދެވި ތިބި މީހުން އެ ބިއުރޯގެ ހޮޓްލައިން ނަންބަރު 1423 އަށް ގުޅައި، މައުލޫމާތު ހިއްސާކުރުމަށް އެދުނެވެ. ނުވަތަ އެ އޮފީހުގެ ވެބްސައިޓުގައިވާ އެ ކަމަށް ހާއްސަ ފޯމު މެދުވެރިކޮށް ވެސް އެންގޭނެ ކަމަށް ބިއުރޯ އޮފް ސްޓެޓިސްޓިކްސް އިން ބުންޏެވެ.

މީގެ އިތުރުން، ބޯހިމެނުމުގެ މައުލޫމާތު އިތުރަށް ފުރިހަމަކުރުމުގެ މަސައްކަތް ކުރަން ޖެހޭތީ ވަގުތީ ނަތީޖާ އިއުލާންކުރާ ދުވަހަށް ވެސް ބަދަލު ގެނެސްފައިވާ ކަމަށް އެ ބަޔާނުގައި ވެއެވެ. އެގޮތުން ވަގުތީ ނަތީޖާ އިއުލާންކުރާ ގޮތަށް ކުރިން އަންނަ ބުރާސްފަތި ދުވަހު އޮތް ނަމަވެސް، ތާރީހެއް ނެތް ގޮތަށް މިހާރު ވަނީ އެކަން ފަސްކޮށްފަ އެވެ.
ވަގުތީ ނަތީޖާ އިއުލާންކުރާ ތާރީހަށް ބަދަލު ގެނަޔަސް، ކުރިން އޮތް ގޮތަށް މި މަހުގެ 20 ގައި ދާއިމީ ނަތީޖާ އިއުލާންކުރާނެ ކަމަށް އެ ބަޔާނުގައި ބުންޏެވެ.