މަސްވެރިންނަށް ދިމާވެފައިވާ ދަތިތަކާއި ގުޅިގެން އިދިކޮޅު ޕީޕީއެމްގެ ތަފާތު ހަރަކާތެއް މިރޭ ބޭއްވުމަށް ހަމަޖެހިފައިވާ ކަމަށް އެ ޕާޓީން ބުނެފިއެވެ. 

ޕީޕީއެމް އިން މިއަދު ބުނީ، މަސްވެރިންނަށް ދިމާވެފައިވާ ދަތިތަކާއި ގުޅިގެން އިދިކޮޅު ޕީޕީއެމްގެ ތަފާތު ހަރަކާތެއް މިރޭ އެ ޕާޓީގެ އޮފީސް ކުރިމަތީގައި އޮންނާނެ ކަމަށެވެ. އަދި މި ހަރަކާތް ފެށުމަށް ހަމަޖެހިފައިވަނީ މިރޭ 8:45 ގައި ކަމަށްވެސް ބުނެފައިވެއެވެ. ނަމަވެސް މި ހަރަކާތާއިގުޅޭ އިތުރު ތަފްސީލެއް އެ ޕާޓީން ދީފައެއް ނުވެއެވެ. 

ދައުރު ނިމެން ކައިރިވެފައިވާއިރު، މަސްވެރިންނަށް އަދުގެ ސަރުކާރުން ވެފައިވާ ވައުދުތަށް ފުއްދިފައި ނުވާކަމަށް ބުނެ އިދިކޮޅުން އަންނަނީ ތަކުރާރުކޮށް ސަރުކާރަށް ފާޑުކިޔަމުންނެވެ.

އެގޮތުން، މަސްވެރިކަން ތިޔާގިވެފައިވާއިރު، މަސް ނުކިރޭކަމަށާއި، މަސް ރައްކާކުރުމަށް ބޭނުންވާ އައިސް އެކަށީގެންވާ މިންވަރަކަށް ނުލިބޭކަމަށް ބުނެ މަސްވެރިން ޝަކުވާ ކުރަމުންދާ ކަމަށާ، ސަރުކާރުން ވެފައިވާ ގޭދޮށު މަސްފެކްޓަރީގެ ވައުދާއި، ހަމަ އަގު ކަނޑައެޅުމުގެ ވައުދު އަދިވެސް ނުފުއްދޭ ކަމަށް އިދިކޮޅުން ބުނެއެވެ. އަދި މަސްވެރިންގެ ހައްގުތައް ހޯދުމަށް އަޑުއުފުލުމަށް މަގުމައްޗަށް ނުކުންނަށްވެސް އިދިކޮޅުން މީގެ ކުރިން ވަނީ ގޮވާލާފައެވެ. 

މަސްވެރިކަން ތިޔާގިވެފައިވާ މޫސުމުގައި މަސްވެރިންގެ ޝަކުވާތަކާއި ގުޅިގެން ފިޝަރީޒް މިނިސްޓަރު މަޖިލީހަށް ހާޒިރުކޮށް ކުރި ސުވާލުތަކަށް ޖަވާބުދެއްވަމުން މިނިސްޓަރު ޑރ. ހުސެއިން ރަޝީދު ހަސަން ވަނީ މަސްވެރިކަން ރަނގަޅުވާ މޫސުމާއި ދިމާކޮށް ސަރުކާރުން ގަންނަން މަސައްކަތްކުރި ބޯޓުތައް ގަނެވިފައި ނުވާކަމަށް ވިދާޅުވެފައެވެ.