ޔޫއޭއީގެ ބަޖެޓް އެއާލައިނެއް ކަމަށްވާ "ވިޒް އެއާ" އިން މާދަމާ ރާއްޖެއަށް ދަތުރު ފަށަން ހަމަޖެހިއްޖެއެވެ. 

މާދަމާ ހަވީރުގެ ވަގުތެއްގައި ވިޒް އެއާ ގެ ދަތުރުތައް ފަށަން ހަމަޖެހިފައިވާ އިރު މި ދަތުރުތައް ރާއްޖެއަށް ފެށުމުގެ ކުރިން ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި ހާއްސަ ރަސްމިއްޔާތެއް ބާއްވާނެ އެވެ. މި ރަސްމިއްޔާތުގައި އެ އެއާލައިންނަށް މަރުހަބާ ކިޔުމުގެ ގޮތުން ވޯޓާ ސެލިއުޓެއް ދިނުން އޮންނާނެއެވެ. އަދި އޭގެ އިތުރުން ސަގާފީ ހަރަކާތްތަކެއް ހުށަހެޅުން ވެސް ކުރިޔަށް ގެންދާނެ އެވެ.

ވިޒްއެއާއިން އަލަށް ރާއްޖެއަށް ދަތުރތައް ފަށާއިރު, އެ އެއާލައިން އިން ހަފުތާއަކު ތިން ފްލައިޓް ރާއްޖެއަށް އަންނާނެއެވެ. މި ފްލައިޓްތައް އޮންނާނީ އާދީއްތަ ދުވަހާއި އަންގާރަ އަދި ބުރާސްފަތި ދުވަހު އެވެ. އަދި މި ބަޖެޓް އެއާލައިން އިން ކުރާ ދަތުރު ތަކުގެ ޓިކެޓުގެ އަގުތައް ހުރީ ގާތްގަނޑަކަށް 200 ޑޮލަރުން ފެށިގެން ދަށުގަ އެވެ. 

Advertisement

އެގޮތުން، އެ އެއާލައިން އިން އިއުލާނުކުރި ގޮތުގައި ޔުއޭއީގެ ވެރިރަށް އަބޫދާބީން ރާއްޖެ އަށް ދަތުރުކުރަން ހަމަޖެހިފައި ވަނީ ކޮޅަކަށް 319 ދިރުހަމް އަށެވެ. ދިވެހި ރުފިޔާ އިން އެއީ 1،333 ރުފިޔާއެވެ.

ވިޒް އެއާލައިންގެ ދަތުރުތައް އެންމެ ފުރަތަމަ ފަށާފައިވަނީ 2004 ވަނަ އަހަރުއެވެ. އަދި އޭރުން ފެށިގެން 2019 ވަނަ އަހަރާއި ހަމައަށް 200 މިލިއަން ފަސިންޖަރުން އެ އެއާލައިން އިން ދަތުރުކޮށްފައިވާކަން އެ އެއާލައިން އިން ވަނީ ފާހަގަކޮށްފައެވެ. ވިޒް އެއާއިން މިއަހަރުގެ ފިނި މޫސުމާއި ދިމާކޮށް ރާއްޖޭގެ އިތުރުން ކުވައިތަށްވެސް ދަތުރުތައް ފެށުމަށް ވަނީ ނިންމާފަ އެވެ.
ރާއްޖެ އަދި ކުވައިތަށް ވިޒް އެއާލައިންގެ ދަތުރުތައް ފެށުމުން އެ އެއާލައިނުން ދަތުރުކުރަމުން އަންނަ މަންޒިލްތަކުގެ އަދަދު 34 އަށް އިތުރުވެގެންދާނެ އެވެ.