އދ. މަހިބަދޫގައި ކުރިއަށްދިޔަ ސްޓެލްކޯ މަހިބަދޫ އިންޓަ އޮފީސް ވޮލީބޯޅަ މުބާރާތުގެ ފިރިހެން ޑިވިޝަނުގެ ޗެމްޕިއަންކަން ސްޓެލްކޯ ކޭ-38 ޓީމުން ހޯދައިފިއެވެ.

ރޭ ކުޅުނު ފޯރިގަދަ ފައިނަލް މެޗުގައި ސްޓެލްކޯ ކޭ-38 ޓީމުން ޗެމްޕިއަންކަން ހޯދީ ހޮސްޕިޓަލް އޭ ޓީމާ ވާދަކޮށް ސީދާ ތިން ސެޓުން މެޗު ކާމިޔާބުކޮށްގެންނެވެ.

މި މެޗުގެ ފުރަތަމަ ސެޓު 19-25 އިން ސްޓެލްކޯ ކޭ-38 ޓީމު ކާމިޔާބުކުރިއިރު، ދެވަނަ ސެޓު އެ ޓީމުން ގެންދިޔައީ 11-25 ގެ ބޮޑު ތަފާތަކުންނެވެ. އަދި ވާދަވެރި ކުޅުމަކަށްފަހު މެޗުގެ ތިންވަނަ ސެޓު 18-25 އިން ކާމިޔާބުކޮށް އެ ޓީމުން ވަނީ މުބާރާތުގެ ތަށި އުފުލާލާފައެވެ. ފައިނަލް މެޗުގެ މޮޅު ކުޅުންތެރިޔާގެ މަގާމު ހޯދީ ސްޓެލްކޯ ކޭ-38 ޓީމުގެ ޖާޒީ ނަންބަރު 14 އަޒުހާން ފައްޔާޒެވެ.

މި މުބާރާތުގެ ފިރިހެން ޑިވިޝަނުގެ އެންމެ މޮޅު 6 ކުޅުންތެރިންގެ ތެރޭގައި ހިމެނެނީ:

އަބްދުލް ބާޝިތު (ސްޓެލްކޯ ކޭ-38)

އަލީ ސާލިމް (ހޮސްޕިޓަލް އޭ)

އަހުމަދު އަމީން (ރޯޑް އެސްއެސްއޭ)

ހުސައިން ރަޝީދު (ސްޓެލްކޯ ކޭ-38)

މުހައްމަދު ޖަޒީލް (ހޮސްޕިޓަލް އޭ)

މުހައްމަދު މުޒައްފަރު (ސްޓެލްކޯ ކޭ-38)

މަހިބަދޫގައި ހުންނަ ސަރުކާރުގެ މުއައްސަސާތަކާއި އޮފީސްތަކުގެ މެދުގައި އެކުވެރިކަން އާލާކޮށް ބަދަހިކުރުމުގެ މަގްސަދުގައި ސްޓެލްކޯ މަހިބަދޫ އިންޖީނުގެއިން މި މުބާރާތް އިންތިޒާމުކޮށްގެން ބާއްވާ މިއީ 3 ވަނަ އަހަރެވެ.

ވޭތުވެދިޔަ ދެ އަހަރާ ޚިލާފަށް، މިއަހަރުގެ މުބާރާތް ފިރިހެން އަދި އަންހެން ޑިވިޝަން ހިމަނައިގެން ކުރިއަށްގެންދިޔައިރު، މަހިބަދޫގެ 14 މުއައްސަސާއަކުން ޖުމްލަ 19 ޓީމަކުން ވަނީ ބައިވެރިވެފައެވެ. އޭގެ ތެރޭގައި ހިމެނެނީ ފިރިހެން 10 ޓީމާއި އަންހެން 9 ޓީމެވެ. މި މުބާރާތުގައި 222 ކުޅުންތެރިންނާއި 86 އޮފިޝަލުންނާއެކު ޖުމްލަ 308 ފަރާތަކުން ބައިވެރިވެފައިވެއެވެ.