މިސަރުކާރުން މަރުގެ މައްސަލަތަކުގައި ދައްކަނީ ސިޔާސީ ވާހަކަތަކެއްކަމަށާއި، ސަރުކާރަށް ހަތަރު އަހަރު ވެގެންދާއިރު ފެނިގެން ގޮސްފައިވަނީ ސިޔާސީ މަގުސަދެއްގައި ހުސްވާހަކަތަކެއް ދެއްކި މަންޒަރުކަމަށް ރައްޔިތުންގެ މަޖިލީހުގެ މައިނޯރިޓީ ލީޑަރު އޭދަފުށީ ދާއިރާގެ މެމްބަރު އަހުމަދު ސަލީމް ވިދާޅުވެއްޖެއެވެ.
ސަލީމް މިހެން ވިދާޅުވީ، މިދިޔަ މަހުގެ 18 ވަނަ ދުވަހުން ފެށިގެން ގެއްލިގެން ހޯދަމުންދިޔަ ހ.ބޮނޑިކަނދޮޅުގޭ މުޙައްމަދު އަޒްހާންގެ ހަށިގަނޑު ކަމަށް ބެލެވޭ ހަށިގަނޑު މިމަހުގެ 2 ވަނަ ދުވަހު ހުޅުމާލެއިން ފެނިފައިވާއިރު، މިކަމުގައި ފުލުހުންނަށާއި ކަމާއި ގުޅުންހުރި އިދާރާތަކަށް އެކަށީގެންވާ މަސައްކަތް ކުރެވިފައިނުވާތީ ކަންބޮޑުވުން ފާޅުކޮށް އާދަމް ޝަރީފް ހުށަހެޅި މައްސަލާގައި ވާހަކަ ދައްކަވަމުންނެވެ.
ސަލީމް ވިދާޅުވީ، ރައީސް އިބްރާހީމް މުހައްމަދުގެ ސަރުކާރަށް ހަތަރު އަހަރުގައިވެސް ދައްކަމުންދަނީ މުޅިންވެސް ސިޔާސީ ވާހަކަތަކެއް ކަމަށާއި، އަމިއްލަ އެޖެންޑާ ހާސިލްކުރުން ފިޔަވައި ވީ އެއްކަމެއްވެސް ނެތް ކަމަށެވެ.
އާދަމް ޝަރީފް ހުށަހެޅެއްވި މައްސަލައާ ގުޅިގެން ވާހަކަ ދައްކަވަމުން ސަލީމް ވިދާޅުވީ، މިސަރުކާރުން ވެރިކަމަށް އައުމަށް އެންމެ ބޮޑަށް ބޭނުން ކުރީ ރިޞުވާނުގެ މަރުގެ މައްސަލަކަމަށެވެ. އެހެން ނަމަވެސް މި ސަރުކާރުގައި އެއްވެސް ހެޔޮ ނިޔަތެއް ނެތް ކަމަށް ވިދާޅުވެ ސަލީމް ވަނީ މި ސަރުކާރަށް ވަރަށް ބޮޑަށް ފާޑުވިދާޅުވެފައެވެ.
"މިސަރުކާރުން މިހާތަނަށް ރިޞުވާނުގެ އެހެން މީހުންގެ މައްސަލައެއްވެސް ބަލަން އެއްވެސް ހިޔޮ ނިޔަތެއްނެތް. މިކަންކަމަށް ފަންޑު ކުރި މީހުންވެސް ތިބޭނެ. މިިމީހުން ހޯދޭނެ. މަނިކުފާނު މަރާލަން އުޅުނު މީހުންނާއި ފަންޑުކުރި މީހުން ނުހޯދެނީ ކީއްވެތޯ." ސަލީމް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
