މިއުޒިކަކީ އިސްލާމް ދީނުގައި ޙަރާމް އެއްޗެއްކަން ރަސޫލާ ޞޢވ ގެ ސައްހަ ހަދީޘުން ސާބިތުވާއިރުވެސް މިއަދު އެކަން ހަދާފައި ވަނީ މީހާގެ އިސްލާމްކަން "މެދުމިނަށް" ފެއްތުމަށް ކޮންމެހެން ކުރަން ޖެހޭ ކަމެއް ކަމަށް މަޝްހޫރު ދީނީ އިލްމުވެރިޔާ އައްޝައިޚް އަޙްމަދު ސަމީރު ވިދާޅުވެއްޖެއެވެ.
ޝެއިޚް ސަމީރު މިއަދު ކުރެއްވި ޓްވީޓެއްގައި ވިދާޅުވީ، މިޔުޒިކު ކުޅުމަކީ ޙަރާމްކަމެއް ކަމަށް ޞައްޙަ ޙަދީޘުގެ އަލީގައި ޞަޙާބީންނާއި ތާބިޢީންނާއި ހަތަރު މަޒުހަބުގެ އިމާމުވެރި ބޭކަލުންގެ އަރިހުން ވާރިދުވެގެން އައިސްފައިވާ ކަމަށެވެ.
އެހެންނަމަވެސް، އަދުގެ މުޖުތަމަޢު ގައި މިއުޒިކު ކުޅުން ހަދާފައި މިވަނީ މީހާގެ އިސްލާމްކަން "މެދުމިނަށް" ފެއްތުމަށް ކޮންމެހެން ކުރަން ޖެހޭ ކަމެއް ކަމަށް ކަން ވިދާޅުވެ ޝެއިޚް ސަމީރު ވަނީ ކަންބޮޑުވުން ފާޅުކުރައްވާފައެވެ.
މިއުޒިކު ކުޅުމާއި، އެ އަޑުއެހުމާއި އެކަމާއި ގުޅުންހުރި އެންމެހައި ކަންކަމަކީ ދީނުގައި ހަރާމް ކަމެއް ކަމަށް ބުނެ ދީނީ ޢިލްމުވެރިން ތަކުރާރުކޮށް ނަސޭހަތް ތެރިވަމުންދާއިރުވެސް، ސުކޫލް ތަކުގަޔާއި އެނޫންވެސް އެހެން ހަފްލާތަކުގައި މިއުޒިކު ކުޅުމަކީ ކޮންމެހެން ކުރަންޖެހޭ ކަމެއް ކަމަށް އަދު ވަނީ ވެފައެވެ. އަދި ޚާއްސަކޮށް ސުކޫލުގައި ހިންގާ މިއުޒިކާއި ގުޅުންހުރި ކަމެއްގައި ބައިވެރި ނުކުރުވާ ކުއްޖާ އާއި ބެލެނިވެރިޔާ އަކީ ހަރުކަށި ފިކުރުގެ ކުއްޖެއްގެ ގޮތުގައި އަންނަނީ ލޭބަލް ކުރަމުންނެވެ. މިކަމާއި ގުޅިގެން ދީނަށް ލޯބިކުރާ ގިނަ ބަޔަކު އަންނަނީ ކަންބޮޑުވުން ފާޅުކުރަމުންނެވެ.
Advertisement
This content is created and paid for by advertisers and does not involve Voice Journalists
