ހުޅުމާލޭ ދެވަނަ ފިޔަވަހިން ގެއްލުނު މުހައްމަދު އަޒުހާން ހޯދުމުގައި ފުލުހުން އެދެވޭ ވަރަށް މަސައްކަތް ކޮށްފައި ނުވާ ކަމަށްބުނެ އެމްޑީޕީ ބައެއް މެންބަރުން ކަންބޮޑުވުން ފާޅުކޮށްފި އެވެ. 

ފަހަކަށް އައިސް ގޮތްނޭނގޭ މަރުތައް ގިނަވެފައިވާތީ އެކަމާއި ކަންބޮޑުވުން ފާޅުކޮށް މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފު އުމަރުވަނީ މިއަދުގެ މަޖިލީހަށް ކުއްލި މައްސަލަ އެއް ހުށަހަޅުއްވާފައެވެ. 

މެންބަރު ޝަރީފު ހުށަހެޅުއްވި އެ މައްސަލަ ބަލައިގަންނަން މަޖިލީހުގައި ތިއްބެވި 25 މެމްބަރުން ވޯޓު ދެއްވާފައިވާއިރު 11 މެމްބަރަކު ވަނީ އެ މައްސަލަ ބަލައިގަންނަން ނުފެންނަކަމަށް ވޯޓުދެއްވާފައެވެ. އަދި އެގޮތުން ވޯޓު ދެއްވާފައިވަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މިސަރުކާރަށް ތާއީދު ކުރައްވާ އެމްޑީީޕީ މެންބަރުން ކަން ފާހަގަކޮށްލަންޖެހެއެވެ.

އެކަމާއި ގުޅިގެން އެމްޑީޕީގެ ކުރީގެ ޗެއާޕާސަން އަދި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވީ ގޮތް ނޭނގޭ މަރަކާއި ގުޅިގެން މަޖިލީހަށް ކުއްލި މައްސަލައެއް ހުށައެޅީމާ އެ މައްސަލަ ބަލައިނުގަތުމަށް އެމްޑީޕީގެ ޕީޖީ ގުރޫޕުގެ ލީޑަރޝިޕުން ވިޕްލައިން ނެރުމަކީ ކަންބޮޑުވާ ކަމެއްކަމަށެވެ. އަދި އެކަމަށްޓަކައި ލަދުގަންނަކަމަށް އޭނާ ވިދާޅުވިއެވެ.

ހަސަން ލަތީފުގެ ވާހަކައިގައި ވަނީ ހުޅުމާލެއިން ގެއްލުނު ޒުވާނާ ހޯދުމުގެ މަސައްކަތް އެކަށީގެންވާ ވަރަށް ކޮށްފައިވާކަމަށް ފުލުހުން ބުނެފައިވީ ނަމަވެސް އެކަން ގަބޫލުނުކުރައްވާކަމަށް ވިދާޅުވެފައެވެ. އެހެން ކަމުން އެ މައްސަލައާއި ގުޅިގެން މަޖިލީހަށް ކުރެވެން ހުރި މަސައްކަތަކީ ކޮބައިތޯ ބެލުން މުހިންމުކަމަށާއި، އިހުމާލު ވާ ފަރާތްތަކާއި މެދު ފިޔަވަޅު އަޅަން ޖެހޭކަމަށް ހަސަން ލަތީފު ވިދާޅުވިއެވެ.

މީގެ އިތުރުން، އަޒުހާން ގެއްލުނު މައްސަލާގައި ފުލުހުން އެދޭވޭ މަސައްކަތް ތަކެއް ކޮށްފައި ނުވާކަމަށާ، އަދި ތަހުގީގުގެ ފުރިހަމަ ހިސާބަށް ނުދަނީސް ފުލުހުން ބަޔާންނެރެ, އެ ބަޔާނުގައި އަޒުހާން މަރާލާފައިވާ ކަމުގެ ހެއްކެއް ފެނިފައިނުވާކަމަށް ވިދާޅުވެފައިވާތީ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން، މާފަންނު އުތުރު ދާއިރާގެ މެންބަރު އަދި އެމްޑީޕީގެ ކުރީގެ ތަރުޖަމާނު އިމްތިޔާޒު ފަހުމިީ (އިންތި) ވިދާޅުވީ، އެކަން އެހާ އަވަހަށް ނިންމާލައިގެން ނުވާނެ ކަމަށެވެ.

ޝަރީފުގެ މައްސަލައަށް ބަހުސް ކުރައްވަމުން އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ވެސް ރާއްޖެ ފަދަ ކުޑަކުޑަ އާބާދީއެއްގައި ގޮތްނޭނގޭ މަރުތައް ހިނގުމަކީ އާދައިގެ ކަންކަން ކަމުގައި ދެކެވޭ ދެކެވުން އެއީ ނުރައްކާތެރި ކަމެއް ކަމަށް ވިދާޅުވެ ކަންބޮޑުވުންފާޅުކޮށްފައެވެ. 

އަދި އެފަދަ މައްސަލައެއް މަޖިލީހަށް ހުށަހެޅުއްވުމުން އެކަން މާ ބޮޑު ކަމަކަށް ނުހަދައި މައްސަލަ ބޭރުކޮށްލުމަށް އެމްޑީީޕީ ބައެއް މެންބަރުން ވޯޓު ދެއްވާފައިވައިރު، އެފަދަ މަރު ތަކުގެ މައްސަލަ އަކީ ރައްޔިތުންނަށް ކުޑަ ކަމެއް ނޫން ކަމަށްވެސް ވައްޑެ ވިދާޅުވިއެވެ. އަދި އަޒުހާން ގެއްލުނުތާ 14 ދުވަސްވެ، ހަށިގަނޑު ކުނިވެގެން އެހާވަރު ވީއިރު އެތަން ބަލައި ނުލެވުމަކީ އިންތިހާއަށް އިހުމާލު އޮތް މައްސަލަ އެއް ކަމަށްވެސް ވައްޑެ ވިދާޅުވިއެވެ. 

އަޒްހާން ހޯދަން ފުލުހުން ކުރި މަސައްކަތައް ފާޑުކިޔުންތަކެއް އަމާޒުވެފައި ވަނިކޮށް އޭނާ ހޯދަން ފުލުހުން ކުރި މަސައްކަތް ތައް ދިފާއުކޮށް ފުލުހުން ރޭ ނެރުނު ބަޔާނެއްގައި ބުނީ، އެ މައްސަލާގައި އަޒުހާން އެންމެ ފަހުން ބައްދަލުވި މީހުންނާއި ސުވާލުކޮށް، އެމީހުން ފޯރުކޮށްދިން މައުލޫމާތާއި، ފުލުހުންގެ ސީސީޓީވީ ފޫޓޭޖް ތަކާއި، އާއްމުންގެ ސީސީޓީވީ ފޫޓޭޖް ތަކާއި، އަދިވެސް އެހެނިހެން ގޮތްގޮތުން މައުލޫތު ތައް ހޯދާފައިވާ ކަމަށެވެ. އަދި އޭގެ އިތުރުން، އަޒުހާން މާލެއަށް ގޮސްފައިވޭތޯ ބެލުމަށް މާލޭގެ ސީސީޓީވީ ފޫޓޭޖް ތައްވެސް ބެލި ކަމަށާ، އަދި އެއްވެސް ރަށަކަށް ފުރައިގެން ދިޔަތޯވެސް ބަލާފައިވާ ކަމަށެވެ. 

އެގޮތުން ކުރި މަސައްކަތުން ސެޕްޓެމްބަރު މަހުގެ 18 ވަނަ ދުވަހު ފަތިހު ޓެކްސީއެއްގައި ހުޅުމާލޭ ފޭސް އެކެއް ގައި ހުންނަ ގެސްޓް ހައުސް އަކަށް އޭނާ ދިޔަ ކަމަށް މައުލޫތު ލިބުނު ކަމަށާ، އެ ގެސްޓް ހައުސް އާއި އެ ސަރަހައްދުގައި ހުރި ސީސީޓީވީ ފޫޓޭޖް ތައް އެނަލައިޒް ކޮށް، އެ ސަރަހައްދުގައި ހަރަކާތްތެރިވާ އަވައްޓެރި ފުލުހުންގެ އެހީގައި މައުލޫތު އެއްކޮށްފައިވާ ކަމަށް އެ ބަޔާނުގައި ވެއެވެ.

އެގޮތުން ލިބުނު މައުލޫމާތަކަށް ބިނާކޮށް ސެޕްޓެމްބަރު 26 ވަނަ ދުވަހު ނިރޮޅުމަގުގައި ހުންނަ ސްކޭޓްޕާކު ސަރަހައްދާއި، ވޯޓާ ތީމް ޕާކު އަޅަން ބިން ދޫކޮށްފައިވާ ސަރަހައްދު ބަލައި ފާސްކުރެވުނު ކަމަށް ފުލުހުން ބުނެފައިވެއެވެ.

އަދި އެ މަސައްކަތުގެ ތެރެއިން ސެޕްޓެމްބަރ 30 ވަނަ ދުވަހު ފުލުހުންނަށް ލިބުނު އިތުރު ސީސީޓީވީ ފުޓޭޖްތަކެއްގެ އެހީގައި ލިބުނު މައުލޫމާތުތަކުން ސެޕްޓެމްބަރު 18 ވަނަ ދުވަހުގެ ހެނދުނު ސްކޭޓް ޕާކާ ދިމާ އަތިރި މައްޗަށް އަޒްހާން ފައިބާ މަންޒަރާއި އެއަށްފަހު އަތިރިމަތިން އެއްގަމަށް އަރައިގެން އައިސް ސްކޭޓް ޕާކާ ދިމާއިން ނިރޮޅުމަގަށް ނުކުންނަކަން އެނގިފައިވާ ކަމަށްވެސް ބަޔާނުގައި ވެއެވެ. 
އެ މައުލޫމާތުތަކާއެކު ދެން އަޒުހާން ފެންނާނެ ކަމަށް ބެލެވުނު ތަނާ އެންމެ ކައިރިން ލިބެން ހުރި ސީސީޓީވީ ފޫޓޭޖް ނަގައި ބެލި އިރު، އެ ފޫޓޭޖް ތަކުން އޭނާ ފެނިފައި ނުވާތީ، އަނެއްކާވެސް ސްކޭޓްޕާކު ހިމެނޭ ސަރަހައްދު ބެލުމަށް ތަހުގީގު ކުރާ ޓީމުން ނިންމި ކަމަށް ފުލުހުންގެ ބަޔާނުގައި ބުނެފައިވެއެވެ. 

އަދި އެގޮތުން އެ ސަރަހައްދުގައި ހިންގުނު އޮޕަރޭޝަނެއްގެ ތެރެއިން އޮކްޓޯބަރ 2 ވަނަ ދުވަހު، ވޯޓާ ތީމް ޕާކު ހެދުމަށް ދޫކޮށްފައިވާ ސަރަހައްދާ ދިމާ، ނިރޮޅުމަގުގެ ހުޅަނގު ފަރާތް ބަލައި ފާސްކުރިއިރު، އެ ސަރަހައްދުގެ ވެޔޮ ތަކުގެ ތެރެއިން އަޒުހާންގެ ހަށިގަނޑު ކަމަށް ބެލެވޭ މީހެއްގެ ހަށިގަނޑު ޑީކޮމްޕޯސްވެފައި ވަނިކޮށް ފެނިފައިވާކަމަށް ފުލުހުން ބުންޏެވެ. 

މީގެ އިތުރުން އެ ބަޔާނުގައި ބުނީ، އެ ހަށިގަނޑު އިތުރު ތަހުލީލުތައް ހެދުމަށް ރާއްޖެއިން ބޭރަށް ފޮނުވުމުގެ މަސައްކަތް ކުރަމުންދާ ކަމަށާ، އަޒުހާންގެ ފޯނުވެސް މިހާރު ފުލުހުން ހޯދާފައިވާ ކަމަށެވެ. އެހެންނަމަވެސް އެ ފޯނު ފެނުނު ތަނެއް ފުލުހުން ނުބުނެއެވެ. އަދި މިހާތަނަށް ހޯދި ހޯދުންތަކުން އަޒްހާން މަރާލާފައިވާ ކަމަށް ބެލެވޭނެ އެއްވެސް ހެއްކެއް ނުވަތަ ގަރީނާއެއް ވެސް ލިބިފައި ނެތް ކަމަށް ބުނެފައިވެއެވެ.