ރިސޯޓް ތަކުގައި ކަސީނޯ އެޅުމާއިމެދު މަޝްވަރާ ކުރަންޖެހޭ ކަމަށް ބުނެ ޔޫތު މިނިސްޓަރު އަހުމަދު މަހުލޫފް އިއްޔެ އޮތް ރައްޔިތުންގެ މަޖިލީހުގެ ޖަލްސާގައި ދެއްކެވި ވާހަކަފުޅުތަކާއި ގުޅިގެން ދީނީ ޢިލްމުވެރިންގެ ހޫނު ރައްދުތަކެއް އޭނާއަށް ދެއްވައިފިއެވެ. 

ރައްޔިތުންގެ މަޖިލީހުގެ އިއްޔެގެ ޖަލްސާގައި ވަޒީރުންނާ ސުވާލު ކުރުމުގެ ވަގުތުގައި، ކާށިދޫ ދާއިރާގެ މެންބަރު ޖާބިރު ވަނީ، ރިސޯޓުތަކުގައި ޕްރޮފިޓް ނުލިބޭ ކުޅިވަރުތައް ހިންގުމުގެ ބަދަލުގައި ކެސިނޯ ލައިސަންސް ދޭންޖެހޭ ކަމަށް ވިދާޅުވެ ޖާބިރު ސުވާލު ކުރެއްވީ، ކެސިނޯ އެޅުމަށް ޓޫރިޒަމް އިންޑަސްޓްރީއަށް ބޭނުންވާ ފައިސާ ހޯދުމަށް ޔޫތު މިނިސްޓްރީން ކުރަނީ ކިހާވަރެއްގެ މަސައްކަތެއްތޯ އާއި އެކަން ކުރުން މަނާކުރަނީ ކޮންތާކުންތޯ ސުވާލުކުރައްވާފައެވެ. 

ޖާބިރު ކުރެއްވި ސުވާލާ ގުޅިގެން މަހުލޫފު ވިދާޅުވީ ކެސިނޯގެ ނަން ބުންޏަސް އަދި އެ ވާހަކަ ދައްކަވަން ފެއްޓެވިއަސް އެ ވާހަކަދައްކަވާ ބޭފުޅުން ގޯސްވެ ކުށްވެރިވާ ކަމަށެވެ.

".. މިއިން ތަނެއްގައިވެސް އަޅުގަނޑުމެންނަށް ކެސިނޯއޭ ބުންޏަސް، ވާހަކަ ފެށިޔަސް ގޯސްވޭ. އެ ނަން ކިޔަސް ވެސް ގޯސްވާ ހިސާބުގައި. އެހެންވީމަ އުޅެންޖެހެނީ އެންމެން ބޮޑު ބިރުވެރިކަމެއްގައި، މިއިން ކަމަކާ ގުޅިގެން މަޝްވަރާ ކޮށްލާނެ ޖާގަވެސް އޮންނަ ކަމަކަށް ނުވޭ" މަހުލޫފް ވިދާޅުވިއެވެ.

މަހުލޫފު އިތުރަށް ވިދާޅުވީ ޖާބިރުގެ ވާހަކަފުޅުގައި ފާހަގަކުރެއްވި ފަދައިން ބަރާބަރަށް ރާ ވިއްކައި ހުރިހާ ސަކަރާތެއް ރިސޯޓުތަކެއްގައި ޖަހާ ކަމަށެވެ. އަދި ރާ ވިއްކުން ހަރާމްކޮށްފައި ކެސީނޯ ހިންގުން ހަރާމްނުކުރެވޭނެ ކަމަށްވެސް މަހުލޫފު ވިދާޅުވިއެވެ.

"ބަރާބަރަށް ރާ ވިއްކާ. އެހެން ހުރިހާ ސަކަރާތެއްވެސް އެތަންތަނުގައި ޖަހާ. ކެސިނޯގެ ވާހަކަ ފަށާފައި ހަމަ ބުނާއިރަށް ބުނޭ ހަރާމޭ. ރާ ވިއްކުން ހަރާމެއް ނޫނޭ، ކެސީނޯގެ މަސައްކަތް ފަށާ ވާހަކަދައްކާއިރަށް އެ ހަރާމެއް ނުކުރެވޭނޭ،" މަހުލޫފު ވިދާޅުވިއެވެ.

މަހުލޫފްގެ މިވާހަކަތަކަށް ރައްދު ދެއްވައި، ދީނީ ޢިލްމުވެރިޔާ އައްޝައިޚް މުހައްމަދު ލަތީފު ވިދާޅުވީ، އިސްލާމްދީނުގައި ޙަރާމްކުރައްވާފައިވާ ޖުވާކުޅުންފަދަ ކަމެއް ކުރުމަށް މަޝްވަރާ ކުރެވެންޖެހޭނެކަމަށް ފާޅުގައި ބުނެ، އެކަލާނގެ ޙުކުމަކަށް ގޮންޖަހާލާ މީހާ، އޭނާގެ ޙާލުގެ ދުލުން އެ ބުނެވެނީ އެކަލާނގެ ޢިލްމުފުޅަށްވުރެ ތިމަންނާއަށް ލިބިގެންވާ ޢިލްމު މާ މަތިވެރި ކަމަށާ، އަޅުތަކުންގެ މަޞްލަޙަތު ހުރި ކަންކަން ބޮޑަށް އެނގެނީ ތިމަންނާއަށް ކަމަށެވެ.

މީގެ އިތުރުން، މަހުލޫފްގެ އެ ވާހަކަތަކަށް ރައްދު ދެއްވައި، ދީނީ ޢިލްމުވެރިޔާ ޝެއިޚް ސައުދާން ކުރެއްވި ޓުވީޓެއްގައި ވަނީ، ކެސީނޯ ހުޅުވުމަށްޓަކައި، ރަލާއި ރިބާ ހުއްޖަތަކަށް ހަދާފަ ވާހަކަދެއްކުމަކީ، އިސްލާމަކަށްވެހުރެ ކުރުން ހުއްދަ ވާނެކަމެއްނޫން ކަމަށެވެ.  

މީގެ އިތުރުން ވެސް ގިނަ އަދަދެއްގެ ޢިލްމުވެރިންނާއި ޢާއްމުންގެ ނުރުހުން މަހްލޫފް ގެ މިވާހަކަތަކަށް ވަނީ އަމާޒުވެފައެވެ.