ދައުލަތަށް ޖީއެސްޓީ އާއި ގްރީން ޓެކްސް އަދި ވިތުހޯލްޑިން ޓެކްސް ނުދައްކާ ފަރާތްތަކާއި ޓެކްސް ބަޔާން ހުށަނާޅާ މީހުންގެ ވަނަވަރު މީރާއިން މިއަދު ހާމަކޮށްފައިވާއިރު އޭގެ ތެރޭގައި އިންޑިޔާގެ ޖީއެމްއާރު ކުންފުނިވެސް ހިމެނިއްޖެއެވެ. 

މީރާއިން އާންމު ކޮށްފައިވާ ޓެކްސް ފައިސާ ނުއްދަކާ ފަރާތްތަކުގެ ލިސްޓަކީ މިދިޔަ އަހަރުގެ ޑިސެމްބަރު މަހުގެ 31 ވަނަ ދުވަހާހަމައަށް މުއަދަތު ދީގެންވެސް ޓެކްސް ފައިސާ ދައްކާފައި ނުވާ ފަރާތްކުގެ މައުލޫމާތެވެ.

އެގޮތުން މީރާއިން އާއްމު ކުރި ފަރާތްތަކުގެ ތެރޭގައި ދައުލަތަށް ޓެކްސް ނުދައްކާ 140 ފަރާތަކާއި ޓެކްސް ބަޔާން ހުށަހަޅާފައިނުވާ 256 ފަރާތެއް ހިމެނެއެވެ. އޭގެތެރޭގައި ޖީއެމްއާރު ކުންފުނިވެސް ހިމެނެއެވެ. 

ކުރީގެ ރައީސް މުހައްމަދު ނަޝީދު ގެ ވެރިކަމުގައި މިހާރުގެ ވެލާނާ އިންޓަރނޭޝަނަލް އެއަރޕޯޓް ޖީއެމްއާރު އާއި ވަނީ ހަވާލުކޮށްފައެވެ. އެހެން ނަމަވެސް އެ ކުންފުންޏާއެކު ރައީސް މުޙައްމަދު ނަޝީދުގެ ސަރުކާރުން އެކުލަވައިލި އެއްބަސްވުން އެމަނިކުފާނުގެ ވެރިކަން ވެއްޓުމާއެކު ރައީސް މުހައްމަދު ވަހީދުގެ ވެރިކަމުގައި 2012 ވަނަ އަހަރު އުވާލި އެވެ. އަދި އޭގެ ބަދަލުގައި އެ ކުންފުންޏަށް 270 މިލިއަން ޑޮލަރުވެސް ދައުލަތުން ދައްކަން ޖެހުނެވެ. އެ ފައިސާ ދައްކާފައިވަނީ 2016 ވަނަ އަހަރު، ރައީސް ޔާމީންގެ ވެރިކަމުގައެވެ. 

ދައުލަތަށް ދައްކަންޖެހި ނުދައްކައިވާ ޓެކުހާއި އެހެނިހެން ފައިސާ ހޯދުމުގެ ގޮތުން އެ ނުދައްކާ ފަރާތްތަކުގެ ވަނަވަރު މީރާއިން އާއްމު ކޮށްފައިވާއިރު, މީރާގެ އެންފޯސްމަންޓް ޕޮލިސީގެ ދަށުން އެޅުމަށް ކަނޑައަޅައިފައިވާ އިތުރު ފިޔަވަޅުތައް އަޅަން މިހާރު ފަށައިފައިވާ ކަމަށް މީރާއިން ބުންޏެވެ.
ޓެކްސް ނުދައްކާނަމަ ދެން މީރާއިން އެ މައްސަލަ ހުށަހަޅާނީ ސިވިލް ކޯޓަށެވެ.