ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއަކީ ކުރިން ވަރަށް ރަނގަޅު ބޭފުޅެއްކަމަށާއި، އެމަނިކުފާނު ހަލާކުކޮށްލީ ހުޝާމަތުކޮށްގެންކަމަށް މަޖިލީހުގެ މައިނޯރިޓީ ލީޑަރު އަދި ބ. އޭދަފުށީ ދާއިރާގެ މެމްބަރު އަހުމަދު ސަލީމު ވިދާޅުވެއްޖެއެވެ.
ސަލީމު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ ތިން ވަނަ ދައުރުގެ 23 ވަނަ ޖަލްސާގައި، ކައުންސިލްތަކުގެ އިންތިޚާބަށް ހުށައަޅާފައިވާ އިސްލާހަށް ބަހުސްކުރައްވަމުންނެވެ.
އެ ބިލަށް ބަހުސްކުރައްވަން ފައްޓަވަމުން ސަލީމު ވިދާޅުވީ އެ ބިލަކީ މަޖިލީހުގެ 87 މެމްބަރުން ބަހުސްކުރުމަށް މަޖިލީހަށް ހުށައަޅާވަރަށްވުރެ މާ ކުޑަ އިސްލާހެއްކަމަށެވެ. އަދި އެއީ ރައީސުލްޖުމްހޫރިއްޔާގެ ގަރާރަކުންވެސް ނިންމަވާލެއްވޭނެ ވަރުގެ ކަމެއްކަމަށެވެ.
އެއަށްވުރެ ބާ ބޮޑެތި ކަންކަން ރައީސް ސޯލިހު ގަރާރު ނެރުއްވައިގެން ތަންފީޒުކުރަމުންދާކަމަށް ސަލީމު ވިދާޅުވިއެވެ. ބޮޑުކަންކަމުގެ ގޮތުގައި ސަލީމު އިޝާރަތްކުރެއްވީ އިންޑިއާ ސިފައިން ތިބުމާއި ދެކޮޅަށް އިިދިކޮޅުން ކުރިއަށް ގެންދާ އިންޑިއާ އައުޓު ކެމްޕެއިން ހުއްޓުވުމަށް ރައީސް ސޯލިހު ނެރުއްވި ގަރާރަށްކަމަށް ބެލެވެއެވެ.
އެކަން ފާހަގަކުރައްވާ ސަލީމު ވިދާޅުވީ ރައީސް ސޯލިހުއަކީ މަޖިލީހުގައި ގިނަ ދުވަސްތަކެއް ވަންދެން މަސައްކަތްޕުޅު ކުރެއްވި ބޭފުޅެއްކަމަށެވެ. އަދި މަޖިލީހުގައި މަސައްކަތްޕުޅު ކުރެއްވިއިރު އެމަނިކުފާނަކީ ވަރަށް ރަނގަޅު ބޭފުޅެއްކަން ސަލީމު ފާހަގަކުރެއްވިއެވެ. އަދި ވިދާޅުވީ ބަޔަކު ރައީސް ސޯލިހު ހަލާކުކޮށްލެއްވީ އެމަނިކުފާނަށް ހައްދެއް ނެތް މިންވަރަށް ހުޝާމަތުކުރައްވައިގެންކަމަށެވެ.
"އިއްޒަތްތެރި ރައީސުލްޖުމްހޫރިއްޔާ މިތާ އަޅުގަނޑުމެންނާއި އެކީގައި ވަރަށް ގިނަ ދުވަހު މަސައްކަތް ކުރެއްވި. ވަރަށް ރަނގަޅު ބޭފުޅެއް. އެހެން ނަމަވެސް ހުށާމަދުކޮށްގެން އެމަނިކުފާނުވެސް މުޅިން ހަލާކޮށްލައިފި"
މައިނޯރިޓީ ލީޑަރު ސަލީމު
ސަލީމުގެ ވާހަކައިގައި ވަނީ ކީރިތި ރަސޫލާގެ ސިޔަރަތުން މިސާލު ނަންގަވައި ހުޝާމަދތުކުރުމުގެ ނުބައިކަމަށްވެސް އަލިއަޅުވާލައްވާފައެވެ.
އޭގެ އިތުރުން އޭނާ ވިދާޅުވިގޮތުގައި ސިޔާސީ މައިދާނަށް ނިކުން ކޮންމެ މީހެއްގެވެސް ހުންނަނީ ކުރު މުއްދަތެއްގެ ތެރޭގައި އާރާއި ބާރު ހޯދުމުގެ ނުބައި ވިސްނުމެވެ. އިއްޔެ މިނިސްޓަރުކަން ކުރައްވާފައިވާ ބޭފުޅުން މިއަދު ވެރިކަމަށް ފައިންނަގަވާއިރު، ވެރިކަން ލިބުމުން މާދަށް އެއަށްވުރެ ބޮޑު ބާރެއް ހޯދުމުގެ ދަހިވެތިކަންވެސް ހުރެދާނެކަމަށް އޭނާ ފާހަގަކުރެއްވިއެވެ.
އެފަދަ ފަރާތްތަކުގެ ތަބީއަތު ސަލީމު ވަނީ ފިރުއަނުގެ މިސާލުން މިސާލު ނަންގަނާ ބަޔާންކުރައްވާފައެވެ. އަދި އެފަދަ ފަރާތްތަކުގެ އެ ސިފަތަކާއި ދޭތެރޭގަައި ފުންކޮށް ވިސްނަން ޖެހޭކަންވެސް އޭނާ ފާހަގަކުރެއްވިއެވެ.
ރައީސް ސޯލިހު ހަލާކުވެގެން ދިޔައީ ހުޝާމަތުކުރުމުގައި ހައްދުފަހަނައަޅައި ދިއުމުންކަމަށް ސަލީމު ވިދާޅުވެފައިވާއިރު، މި ސަރުކާރުގެ ހޯމް މިނިސްޓަރު އިމްރާނު ވަނީ މި ވެރިކަމަކީ ކީރިތި މާތް ނަބިއްޔާ ކުރެއްވި ފަދަ ވެރިކަމެއްގެ ގޮތުގައި ސިފަކުރައްވާފައެވެ. އަދި އެކަމާއި ގުޅިގެން ގިނަ ބަޔަކު ނުރުހުން ފާޅުކޮށް އިމްރާނަށް ފާޑުކިޔުންތައްވެސް ވަނީ އަމާޒުކޮށްފައެވެ.
Advertisement
This content is created and paid for by advertisers and does not involve Voice Journalists
