ގެއްލިގެން ހޯދަމުން ދަނިކޮށް މިދިޔަ މަހުގެ 18 ވަނަ ދުވަހު ހުޅުމާލޭގައި ނިޔާވެފައި އޮއްވާ ފެނުނު މުހައްމަދު އަޒުހާންގެ ހަށިގަނޑު ކަމަށް ބެލެވޭ މީހާގެ ހަށިގަނޑު އިންޑިއާއަށް ފޮނުވައި ޕޯސްޓްމޯޓަމް ހެދުމަށްފަހު އެއީ އޭނާކަން ކަށަވަރު ކުރެވިފައިވާކަމަށް ފުލުހުން ހާމަކޮށްފިއެވެ. އޭނާ މިއަދު ވަނީ ރާއްޖެ ގެނެސްފައިކަމަށްވެސް ފުލުހުން މައުލޫމާތު ދެއްވައެވެ.

މި ދިޔަ މަހުގެ 18 ވަނަ ދުވަހުގެ ހެނދުނުން ފެށިގެން އަޒުހާންގެ ހަބަރެއް ނުވެގެން އެރޭ އާއިލާއިން ފުލުހަށް ރިޕޯޓު ކުރުމާއެކު އޭނާ ހޯދުމުގެ މަސައްކަތް ފުލުހުން ވަނީ ފަށާފައެވެ.

އެއަށްފަހު އަޒްހާންގެ ހަށިގަނޑު ފެނިފައިވަނީ ހުޅުމާލެ ސްކޭޓް ޕާކް ސަރަހައްދުގެ ގަސްތަކުގެ ތެރެއިންނެވެ. ފެނުނު އިރު އަޒްހާނުގެ ހަށިގަނޑު ވަނީީ ވަރަށް ބޮޑަށް ކުނިވެފައެވެ.

Advertisement

ފުލުހުން ބުނީ އަޒްހާންގެ ހަށިގަނޑު ޕޯސްޓްމޯޓަމް ހެދުމަށްފަހު މިއަދުގެ ވަގުތެއްގައި މާލެ ގެނެސްފައިވާ ކަމަށެވެ. އަޒްހާންގެ ކަށުނަމާދު މާދަމާ ހުކުރު ނަމާދަށް ފަހު ބާއްވަން ވަނީ ނިންމާފައެވެ. ކަށު ނަމާދު އޮންނާނީ މާދަމާ ހުކުރު ނަމާދަށް ފަހު އާސަހަރާ މިސްކިތުގައެވެ.