ފަހުގެ މަރުތަކާއި ބެހޭ އެންމެ ފަހުގެ މައުލޫމާތު ހިއްސާކުރުމަށް ފުލުހުން މިއަދު ނޫސްވެރިންގެ ބައްދަލުވުމެއް ބޭއްވުމަށް ނިންމައިފިއެވެ.

ފުލުހުން ނޫސްވެރިންނަށް މައުލޫމާތު ދިނުމަށް ހަމަޖެހިފައިވަނީ މިއަދު ހެނދުނު 10:15 ހާއިރު އިސްކަންދަރު ކޮށީގައެވެ.

މި ބައްދަލުވުމުގައި މައުލޫމާތު ދިނުމަށް ހަމަ ޖެހިފައިވާ ފަރާތްތަކުގެ ތެރޭގައި ފެމިލީ އެންޑް ޗައިލްޑް ޕްރޮޓެކްޝަން ޑިޕާޓްމެންޓް ހެޑް, ޗީފް ސްޕިރިންޓެންޑެންޓް އޮފް ޕޮލިސް މުހައްމަދު ބަޝީރު އާއި ސީރިއަސް އެންޑް އޮގަނައިޒްޑް ކްރައިމްގެ ހެޑް, ސްޕިރިންޓެންޑެންޓް އޮފް ޕޮލިސް ހަސަން ސައީދު އާއި ޑެތް އެންޑް ހޮމިސައިޑް އިވްވެސްޓިގޭޝަން ޔުނިޓުގެ ހެޑް, އިންޕެކްޓަރ އޮފް ޕޮލިސް މުހައްމަދު ސާމިޙްއެވެ.

ހ. ޝީރީން ވިލާ ގޭގެ ނުވަ ވަނަ ބުރީގައި ހުންނަ އެޕާޓްމަންޓުގެ ތެރޭގައި 22 އހަރުގެ ޝިއާއު، މަރާލާފައި އޮއްވާ ފެނުނީ މިދިޔަ އޮގަސްޓު މަހުގެ 6 ވަނަ ދުވަހުގެ ރޭގެ ވަގުތެއްގައެވެ.

އޭނާގެ ހަށިގަނޑު ފެނުނު އިރު އޮތީ ތޫނު އެއްޗެއް ބޭނުންކޮށްގެން ގުނަވަންތަކަށް ބޮޑެތި ގެއްލުންތަކެއް ދީފައިއެވެ. އޭނާގެ ހަށިގަނޑު ޕޯސްމޯޓަމް ހެދުމަށްފަހު އޭނާގެ ޖަޒާނާ ވަނީ ބާއްވާފައެވެ.

މި މަރަށް ދެމަހެއްހާ ދުވަސްވީއިރު އަދި މިހާތަނަށް ފުލުހުންގެ ފަރާތުން މާ ބޮޑު ތަފްސީލެއް ހިއްސާ ނުކުރެ އެވެ.

27 އަހަރުގެ އަޒުހާން، މިދިޔަ މަހުގެ 18 ވަނަ ދުވަހުގެ ހެނދުނު 6 އިން ފެށިގެން ހަބަރެއް ނުވެ، ގެއްލިފައިވާ ކަމަށް ބުނެ، އޭނާގެ އާއިލާ އިން ފުލުހަށް ރިޕޯޓުކުރީ ޖެހިގެން އައި ދުވަހުގެ ރޭ 7 ހާއިރު އެވެ. އޭނާ ގެއްލިގެން ހޯދަމުން ދަނިކޮށް، މަރުވެފައިވާ މީހެއްގެ ހަށިގަނޑު ހުޅުމާލޭ، ވޯޓާ ތީމް ޕާކް ކުރިމަތީ އޮންނަ ބޯ ގަސްތަކުގެ ތެރެއިން ފެނުނީ މި މަހުގެ 2 ދުވަހުއެވެ. އިއްޔެ ވަނީ އޭނާގެ ޕޯސްމޯޓަމް ހެދުމަށްފަހު ވަޅުލާފައެވެ.