ހ.ޝީރީން ވިލާގައި އަނިވާވެރި ގޮތަކަށް މަރާލާފައި އޮތްވާ ފެނުނު ޝިއާއު މުހައްމަދު ސައީދުގެ މަރާއި، ގެއްލިގެން ހޯދަމުން ދަނިކޮށް މަރުވެފައި އޮތްވާ ފެނުނު މުހައްމަދު އަޒުހާނުގެ މަރާއި އެއްވެސް ގުޅުމެއް ނެތްކަމަށް ފުލުހުން ހާމަކޮށްފިއެވެ. 

ފުލުހުން މިފަދައިން ހާމަކޮށްފައިވަނީ އެ މަރުތަކާއި ގުޅޭގޮތުން މައުލޫމާތުދިނުމަށް ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ނުރި ސުވާލަށް ޖަވާބުދެއްވަމުންނެވެ. 

ޝިއާއުއާއި އަޒުހާނާއި ދެމީހުންނަކީވެސް މެރާކީ ރެސްޓޯރެންޓުގައި މަސައްކަތް ކުރަމުން ދިޔަ ދެ ޒުވާނުންނަށް ވުމުން، ގާތް ގާތުގައި ހިނގައިދިޔަ އެ ދެ ހާދިސާއާއި ގުޅިގެން އާންމުންގެ މެދުގައި ގިނަ ސސުވާލުތަކެއް އުފެދިފައިވާއިރު، އެކަމާއި ގުޅިގެން މިއަދު ކުރިއަށް ގެންދިޔަ ނޫސްވެރިންގެ ބައްދަލުވުމުގައި ނޫސްވެރިއަކީ ވަނީ ޝިއާއު އާއި އަޒުހާނުގެ މަރާއި އެއްވެސް ގުޅުމެއް އޮތްކަމަށް ފާހަގަކުރެވިފައިވޭތޯ ފުލުހުންގެ އަރިހުން އަހާފައެވެ. 

Advertisement

އެ ސުވާލަށް ޖަވާބުދެމުން ފުލުހުން ބުނީ މިހާތަނަށް ބެލި ބެލުމުން އެ ދެ ހާދިސާއާއި އެއްވެސް ގުޅުމެއް އޮތްކަމަށް ފާހަގަކުރެވިފައި ނުވާކަމަށެވެ. އަދި އެ ދެ މައްސަލަ ތަހުގީގުކުރަމުންދަނީ ވަކި މައްސަލަތަކުގެ ގޮތުގައި ކަމަށެވެ. 

ޝިއާއުގެ މަރުގެ މައްސަލައިގެ ތަހުގީގު ގާތްގަނޑަކަށް ފުރިހަމަވުމާއި ހަމަޔަށް އައިސްފައިވާކަމަށް ފުލުހުން ވަނީ ބުނެފައެވެ. އަދި އެ މަރާއި ގުޅިގެން ތުހުމަތުކުރެވޭ އަލީ ޝާހިލްގެ މައްޗަށް ގަސްދުގައި މީހަކު މެރިކަމުގެ ކުށް ސާބިތުވާވަރަށް ހެކި ހުރިކަންވެސް ފުލުހުން ވަނީ ހާމަކޮށްފައެވެ. 

އެހެން ނަމަވެސް އަޒުހާނުގެ މަރާއި ގުޅިގެން މިހާތަނަށް އެއްވެސް މީހަކަށް ތުހުމަތު ނުކުރެވޭކަމަށް ފުލުހުން ވަނީ ހާމަކޮށްފައެވެ. 

އެ ދެ މައްސަލައިގެ ތަހުގީގުވެސް ފުލުހުން ކުރަމުންދަނީ ހުޅުވާލެވިފައިވ ދެ މައްސަލައިގެ ގޮތުގައި ކަމަށާއި، މައްސަލައިގެ ވަށައިގެން ފެންނަން ހުރި ހުރިހާކަމަކަށް ރިއާޔަތް ކުރާނެކަމަށް ފުލުހުން ވަނީ ބުނެފައެވެ. 

އެހެން ނަމަވެސް މިހާތަނަށް ބެލި ބެލިމުން، އެ ދެ ޒުވާނުންގެ މަރާއި އެއްވެސް ގުޅުމެއް އޮތްކަން ދެނެގަނެވިފައި ނުވާކަން ފުލުހުން ވަނީ ހާމަކޮށްފައެވެ.