މީގެ 35 އަހަރުކުރިން 1986 ވަނަ އަހަރުގައިވެސް ދިވެހި ދައުލަތުން ރައްޔިތުންނަށް ވޯލްޑްކަޕް ދެއްކި ކަމަށާއި، އެހެން ނަމަވެސް މިއަދު އެކަން ކުރާނެ ގޮތެއް ސަރުކާރުގެ ނެތްކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެއެވެ.
ޝިޔާމު މިފަދައިން ވިދާޅުވީ ވަކި ބަޔަކަށް މަންފާ ލިބޭގޮތަށް އެކުލަވާލާފައިވާ ރީ-ބްރޯޑްކާސްޓުކުރުމުގެ ގަވައިދު ބާތިލްކުރުމަށް ގޮވާލާ ހުށައެޅި ގަރާރަށް ވާހަކަދައްކަވަމުންނެވެ.
އޭނާ ވިދާޅުވީ މިހާރު ބްރޯޑްކޮމްއިން ހަދާފައިވާ ގަވައިދުއަގައި ވާ ގޮތުން ހުރިހާ ރައްޔިތުންނަށް ވޯލްޑްކަޕް ބެލުމުގެ ފުރުސަތު ނެތްކަމަށެވެ. އަދި އެ ފުރުސަތު އޮތީ މީޑިއާނެޓު ބޭނުންކުރާ ފަރާތްތަކަށް އެކަނިކަމަށެވެ. އެއާއެކު އޭނާ ވަނީ ދައުލަތުގެ މީޑިއާ ބޭނުންކޮށްގެން ދިވެހި ޒުވާނުންނަށް ވޯލްޑްކަޕް ބެލުމުގެ ފުރުސަތު ހޯދާ ނުދިނީ ކީއްވެގެންތޯ އައްސަވާ ސުވާލު އުފައްދަވާފައެވެ.
އަދި މިކަމަކީ ކަނޑައެޅިގެން ވަކި ބަޔަކަށް ބޮޑު މަންފާއެއް ހޯދާދިނުމަށް ރޭވިގެން ހިންގާފައިވާ ކަމެއްކަމަށް ޝިޔާމު ވިދާޅުވިއެވެ.
"މީޑިއާނެޓު މި ދިނީ ރާއްޖެ ޓީވީއަށް، ރާއްޖެ ޓީވީއަކީ ކޮން ބައެއްކަން އަޅުގަނޑުމެންނަށް އެބަ އެނގޭ، މި ދައްކަނީ ނޫސްވެރިންގެ ވާހަކައެއް ނޫން. ރާއްޖެ ޓީވީއަށް މި އޮތީ ދީފަ އެކްސްކުލޫސިވިޓީ، މި ކުރާ ކަމަކީ ރާއްޖޭގައި ހުރިހާ ރައްޔިތުން ހިއްސާވާ ކުންފުނިތަކާއި، ހުރިހާ އެސްއޯއީތަކެއްގެ ސްޕޮންސަރ މި ލެބެނީ ރާއްޖެ ޓީވީއަށް، ރާއްޖެ ޓީވީއަށް 50 މިލިއަން 60 މިލިއަންގެ ސްޕޮންސާ ހަމަވީމަ ދެން މި އިންނަ ކުޑަ ވިންޑޯގެ ތެރެއިން ރައީސުލްޖުމްހޫރިއްޔާގެ ހެޔޮފުޅުކަމުން ޕީއެސްއެމުން އަނެއްކާ 7 ލައްކަ ޑޮލަރު ދީގެން ރައްޔިތުންނަށް ދައްކާގޮތަށް، މި އޮތީ"
ނައިފަރު ދާއިރާގެ މެމްބަރު އަހުމަދު ޝިޔާމު
ޝިޔާމު ވިދާޅުވީ އެންމެ މި ކުރި ކަމަކީ ރައްޔިތުންގެ ފައިސާ "ސްޕޮންސާ" ގެ ނަމުގައި ވަކި ދިމާލަކަށް އެޅުންކަމަށެވެ. ދައުލަތުގެ މީޑިއާ މެދުވެރިކޮށް ވޯލްޑްކަޕް ދެއްކުމަށް ވިސްނަން ފެށީވެސް ރާއްޖެ ޓީވީއިން ކަނޑައަޅައިވާ އަދަދަށް އެމީހުންނަށް ސްޕޮންސަރ ނުވަތަ ފައިސާ ލިބުމުންކަމަށް ޝިޔާމު ވިދާޅުވިއެވެ.
ޝިޔާމު ވިދާޅުވީ މިއީ ކަނޑައެޅިގެން ރޯމާ ރޯ ދުވާލު ކުރާ ވައްކަންކަމަށެވެ.
ވަކި ބަޔަކަށް މަންފާ ލިބޭގޮތަށް ބްރޯޑްކާސްޓިން ކޮމިޝަނުން ހަދާފައިވާ ގަވައިދާއި ދެކޮޅަށް ގަރާރު ހުށައަޅުއްވަން ޖެހުނީ މިފަދަ އެ ގަވައިދުގައި ނިވަލުގައި ތިބެގެން މިފަދަ ޖަރީމާތައް ހިންގަމުންދާތީކަން އޭނާ ފާހަގަކުރެއްވިއެވެ.
އެއާއެކު ޝިޔާމު ވިދާޅުވީ، ބޮޑެތި އިންވެސްޓުތައް ކޮށްގެން ރީބްރޯޑްކާސްޓު ކުރުމުގެ ޚިދުމަތް ދެމުންދާ ފަރާތްތައް ތިބިއިރު، ގާނޫނާއި ޚިލާފަށް ބްރޯޑްކޮމްއިން އެކުލަވާލި އެ ގަވައިދުގެ ސަބަބުން އެ ފަރާތްތައްވެސް އިދަޖެހިގެން ދާނެކަމަށެވެ.
ޝިޔާމު ވިދާޅުވީ ބްރޯޑްކާސްޓިން ކޮމިޝަނުގައި ތިބި 7 މެމްބަރުންނަކީ މީޑިއާނެޓުގެ ވަޒީފާގައި ތިއްބެވި ފަރާތްތަކެއް ނޫންކަމަށެވެ. އެ ކޮމިޝަނަކީ މިނިވަން މުއައްސަސާއެއްކަމަށާއި، އެމީހުން މަސައްކަތް ކުރަންވާނީ ގަވައިދާއި އެއްގޮތްވާ ގޮތުގެ މަތިން ރައްޔިތުންނަށް އެންމެ މަންފާކުރަނިވި ގޮތަށްކަމަށެވެ. އަދި ވަކި ކުންފުންޏެއް ބޭނުންވާހާ ގޮތަކަށް އެމީހުން ގަވައިދުތައް ހަދައިގެން ނުވާނެކަމަށް ޝިޔާމު ވިދާޅުވިއެވެ.
ޝިޔާމުގެ އިތުރުންވެސް މަޖިލީހުގެ ގިނަ މެމްބަރުން ވަނީ ބްރޯޑްކޮމް ގެ އެ ގަވައިދާއި ދެކޮޅުކަން ފާހަގަކުރައްވާފައެވެ. އަދި އެ ގަވައިދަކީ ގާނޫނާއި ޚިލާފު ގަވައިދެއްގެ ގޮތުގައި ގިނަ މެމްބަރުން އިއްތިފާގުވެއެވެ.
Advertisement
This content is created and paid for by advertisers and does not involve Voice Journalists
