އެލޯވެރާ އަކީ ވަރަށް ގިނައިން ގޭގޭގައި ހައްދާފައި ހުންނަ، އެތައް ފައިދާ ތަކެއް އޭގައި އެކުލެވޭ ގަހެކެވެ. އެގޮތުން، ޒަމާނުއްސުރެވެސް އިސްތަށިގަނޑާއި ހަންގަނޑަށް ކުރިމަތިވާ އެކިއެކި މައްސަލަތައް ހައްލުކުރުމަށް އެލޯވެރާ އަންނަނީ ބޭނުންކުރަމުންނެވެ. އަދި ހަންގަނޑާއި އިސްތަށިގަނޑަށް ފަރުވާ ކުރުމަށް ތައްޔާރު ކުރެވިފައި ހުންނަ ވަރަށް ގިނަ ޕްރޮޑަކްޓްސްތަކުގައި އެލޯވެރާ ހިމަނާފައި ހުރެއެވެ.

• އެލޯވެރާ ގަހުގެ ފަތަކީ 98 އިންސައްތަ ފެން އޭގައި ހިމެނޭ ފަތެކެވެ. އެހެން ކަމުން އެ ހަންގަނޑުގައި އުނގުޅުމުން ހަންގަނޑު ހިކުމުން ދުރުކޮށްދީ، މޮއިސްޗަރައިޒް ކޮށް ބެހެއްޓުމަށް އެހީވެދެއެވެ. 

• އެލޯވެރާ ޖެލްއަކީ ވިޓަމިން ސީ، ވިޓަމިން އީ އަދި ބީޓާ ކެރޮޓީން މާއްދާއިން މުއްސަނދިވެފައިވާ ޖެލް އެކެވެ. އޭގެ ސަބަބުން، އުމުރުން ދުވަސް ވުމުގެ ސަބަބުން ހަންގަނޑުގައި ޖެހޭ ރޫ ފިލުވައިދެއެވެ. އަދި ހަންގަނޑު ކަޅުވުމާއި، ހަންގަނޑުގައި ނަގާ ކަޅުކުލައިގެ ލަކުނުތައް ފިލުވުމަށްވެސް އެލޯވެރާ ޖެލް އެހީވެދެއެވެ. 

• ލޯ ކައިރި ކަޅުވުމަކީ ވަރަށް ގިނަ މީހުންނަށް ކުރިމަތިވާ ކަމެކެވެ. އެ މައްސަލަ ހައްލުކުރުމަށް ވެސް އެލޯވެރާ ޖެލް އަކީ ހަމަ ބަރާބަރު އެއްޗެކެވެ.

• އެލޯވެރާ އަކީ ހަންގަނޑު ރިޕެއަރ ކޮށްދޭ ގިނަ މާއްދާތަކެއް އޭގައި އެކުލެވޭ އެއްޗެކެވެ. އެގޮތުން ހަންގަނޑުގައި ހުންނަ ސެލްތައް އުފެދުން އަވަސްކޮށްދީ, ހަންގަނޑު ދުޅަވެ، ރަތް ވުމުން ސަލާމަތް ކޮށްދީ މޫނުގައި ނަގާ ބިހި ފިލުވުމަށް ވެސް އެފަތުން އެހީވެދެއެވެ. އެހެންކަމުން، އެއީ ލަކުނު ފިލުވުމަށާއި, ސްޓެރެޗް މާކް ފިލުވުމަށްވެސް ވަރަށް ރަނގަޅު އެއްޗެކެވެ. 

1) އެލޯވެރާ ފަތުގައި ހުންނަ ޖެލް އެއްވެސް އިތުރު އެއްޗަކާއި އެކުނުލަވައި މޫނު ގަޔާއި، ކަރުގައި އުނގުޅުން. 

2) ދެ މޭޒުމަތީ ސަމުސާ އެލޯވެރާ ޖެލްއަށް ކުޑަ ސީ ސޯލްޓް ކޮޅެއް އެޅުމަށްފަހު ރަނގަޅަށް އެކުލަވާލާށެވެ. ދެން އޭގެ ތެރެއަށް 1 މޭޒުމަތީ ސަމުސާ މާމުއި އެޅުމަށްފަހު އެކުލަވާށެވެ. މިއީ ބޮޑީ އެންޑް ފޭސް ސްކްރަބް އެއްގެ ގޮތުގައި މޫނާއި ގައިގައިވެސް އުނގުޅިދާނެއެވެ. މަޑުމަޑުން އުނގުޅާކުމަށްފަހު ތާފަނާ ފެނުން ހަންގަނޑު ދޮވެލާށެވެ. 

3) 1 މޭޒުމަތީ ސަމުސާ އެލޯވެރާ އާއި, 1 މޭޒުމަތީ ސަމުސާ މާމުއި އައި 2 މޭޒުމަތީ ސަމުސާ ރޯސްވޯޓާ އެކުލަވައިލާށެވެ. ރަނގަޅަށް ޕޭސްޓް އެއް ހެދުމުން މާސްކެއް ގޮތަށް މޫނުގައި އުނގުޅާލާފައި 20-10 މިނެޓް ވަންދެން ބަހައްޓާށެވެ. ދެން ތާފަނާ ފެނުން މުނު ދޮވެލާށެވެ. ލަކުނު ފިލުވަން ބޭނުންވާ ފަރާތްތަކުން މި ޕޭސްޓް ކޮންމެ ހަފުތާއަކު ވެސް އެކި ފަހަރުމަތިން ބޭނުން ކުރެވިދާނެއެވެ.