މިހާރު ހުޅުމާލޭގެ މިސްކިތްތަކުން ބަންގީގެ އަޑާއި ނަމާދު ކުރާ އަޑު ބާރަށް ބޭރަށް އިވޭނެ ކަމަށް ހުޅުމާލޭ ދާއިރާގެ ކައުންސިލަރ އިބްރާހީމް ޝުޖާއު ވިދާޅުވެއްޖެއެވެ.
ހުޅުމާލެ ދާއިރާގެ ކައުންސިލަރ ޝުޖާއު ކުރެއްވި ޓްވީޓެއްގައި ވިދާޅުވެފައިވަނީ ހުޅުމާލޭގެ މަސްޖިދުލް ޢުމަރު ބިން ޚައްޠާބު މިސްކިތުގެ ސައުންޑު ސިސްޓަމް މިހާރު ވާނީ ރަނގަޅު ކޮށްފައި ކަމަށެވެ. ޝުޖާއު ވިދާޅުވީ މިސްކިތުގެ ބޭރާއި އެތެރޭގެ ސައުންޑަށް ދިމާވި މައްސަލަ އެއްކޮށްވާނީ ހައްލުކުރެވިފައި ކަމަށެވެ.
މީގެ އިތުރުން މިސްކިތްތަކަށް ދިމާވާ މައްސަލަ ތަކަކީ މާލޭސިޓީ ކައުންސިލާއި މާލޭގެ މޭޔަރު ޑރ. މުޙައްމަދު މުޢިއްޒު ޚާއްޞަ އިސްކަމެއް ދެއްވާ ކަންކަން ކަމަށްވެސް ޝުޖާއުގެ ޓްވީޓްގައި ވިދާޅުވެފައި ވެއެވެ.
ލާމަރުކަޒީ ޤާނޫނުގެ ދަށުން މާލޭސިޓީގެ މިސްކިތްތައް ހުޅުމާލެ އަދި ވިލިމާލެ ހިމެނޭހެން ބަލަހައްޓަމުން ގެންދަނީ މާލޭސިޓީ ކައުންސިލުންނެވެ. އެހެންނަމަވެސް އޭގެ ތެރެއިން ކިންގް ސަލްމާން މިސްކިތާއި، އިސްލާމީ މަރުކަޒު ފަދަ ބައެއް މިސްކިތްތައް ބަލަހައްޓަމުން ގެންދަނީ އިސްލާމިކް މިނިސްޓްރީ އިންނެވެ.
މާލޭސިޓީ ކައުންސިލްގެ ހަތަރުވަނަ ދައުރުގައި މާލެ ސަރަޙައްދުގެ ހުރިހާ މިސްކިތެއްގައި ސީސީޓީވީ ކެމެރާ ހަރުކޮށް 24 ގަޑިއިރު މިސްކިތްތައް ބެލެހެއްޓޭނެ ނިޒާމު މިހާރު ވަނީ ޤާއިމު ކޮށްފައެވެ. އަދި ޚާޢްޞަ އިސްކަމެއްދެއްވައިގެން ކޮންމެ ދުވަހަކުވެސް މިސްކިތްތައް ކުނިކަހާ ސާފުކުރުމުގެ މަސައްކަތްތައްވެސް މާލެ ސިޓީކައުންސިލުން ދަނީ ކުރަމުންނެވެ.
Advertisement
This content is created and paid for by advertisers and does not involve Voice Journalists
