ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ތާއީދު ނުލިބުނު ނަމަ ޕީޕީއެމްގެ ރައީސް ޔާމީން އަބްދުލްގައްޔޫމަށް ވެރިކަމަށް ނާދެވުނިސްކަމަށް ސްޓޭޓް މިނިސްޓަރު އަދި ޖޭޕީގެ ކައުންސިލް މެމްބަރު ހަސަން މުގުނީ ވިދާޅުވެއްޖެއެވެ. 

މުގުނީ މިފަދައިން ވިދާޅުވެފައިވަނީ 2019 ވަނަ އަހަރުގެ މަޖިލީސް އިންތިޚާބުގައި ޕީޕީއެމްއަށް ގިނަ ގޮނޑިތަކެއް ގެއްލުނީ ޖުމްހޫރީ ޕާޓީގެ ސަބަބުންކަމަށް ވާދަވެރި ސިޔާސީ ލީޑަރު ރައީސް ޔާމީން ތަކުރާރުކޮށް ވިދާޅުވަމުން ގެންދަވާ ވާހަކަތަކަށް ޓްވީޓާގައި ރައްދުދެއްވަމުންނެވެ. 

އެގޮތުން މުގުނީ ވިދާޅުވީ ޕީޕީއެމްއަށް މަޖިލިސް ނުލިބުނީ ރައީސް ޔާމީން ވެރިކަން ކުރެއްވި ގޮތުގެ ސަބަބުންނެވެ. 

Advertisement

2013 ވަނަ އަހަރު ރައީސް ޔާމީންއަށް އެއްބުރުން ލިބިލެއްވި ވޯޓުން އެމަނިކުފާނަށް އޮތް ތާއީދު ފެނިގެންދާނެކަމަށް މުގުނީ ވިދާޅުވިއެވެ. އަދި އެ އިންތިޚާބު އެމަނިކުފާނަށް ކާމިޔާބުވީ، ގާސިމް އިބްރާހިމް ތާއީދުކުރެއްވުމުންކަމަށްވެސް ވިދާޅުވިއެވެ. 

މުގުނީ ވިދާޅުވީ ގާސިމްގެ ތާއީދާއި ނުލާ ރައީސް ޔާމީންއަށް ވެރިކަން ލިބިވަޑައިނުގެންނެވީސް ކަމަށެވެ. އަދި ގާސިމް ތާއީދު ނުކުރެއްވިނަމަ ރައީސް ޔާމީން މިއަދުވެސް ހުންނަވާނީ އެމަނިކުފާނު އުފެއްދެވި ސިޔާސީ ޕާޓީ "ޕީއޭ" ގައި ކަމަށެވެ. އެއީވެސް ރައްޔިތުންގެ ތާއީދު އޮތް ޕާޓީއެއް ނޫންކަމަށް މުގުނީ ވަނީ ސިފަކުރައްވާފައެވެ. 

2013 ވަނަ އަހރުގެ އިންތިޚާބު ރައީސް ޔާމީން ކާމިޔާބުކުރެއްވީ ކޯލިޝަންއެއްގެ ތެރެއިން ނަމަވެސް އެމަނިކުފާނަށް އޮތް ތާއީދު އެފަހުން އެތައް ގުނައެއް އިތުރުވެފައިވާކަން 2018 ވަނަ އަހަރުގެ އިންތިޚާބުގެ ނަތީޖާއިން ހާމަވެގެންދެއެވެ. 

ރައީސް ޔާމީންއަކީ މިއަދު އެންމެ ތާއީދު ބޮޑު ސިޔާސީ ލީޑަރުކަމަށް އިދިކޮޅުގެ ފަރާތްތައް ގެންދަނީ ބުނަމުންނެވެ. އަދި ކުރިއަށް އޮތް ރިޔާސީ އިންތިޚާބު ޕީޕީއެމް އެއްބުރުން ކާމިޔާބު ކުރުމަށް މަސައްކަތްތައް ކުރަމުންދާކަންވެސް އެ ޕާޓީއިން ފާހަގަކުރެއެވެ.