ދިވެހިރާއްޖޭގައި އަރަބި ތައުލީމު ކިޔަވައިދޭ ހަމައެކަނި ސުކޫލުކަމަށްވާ އަރަބިއްޔާ ސުކޫލުގެ އިމާރާތް ހެދުމަށް އަންނަ އަހަރަށް ލަފާކޮށް ހުށައަޅާފައިވާ ބަޖެޓުގައި ހިމަނާފައި ނުވާކަމަށް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ވިދާޅުވެއްޖެއެވެ. 

ތާރިގު މިފަދައިން ވިދާޅުވެފައިވަނީ އަންނަ އަހަރުގެ ބަޖެޓުގައި ހިމަނާފައިވާ އުމްރާނީ ބައެއް މަސައްކަތްތަކުގެ ތަފްސީލު ހިއްސާކުރައްވާ ކުރެއްވި ޓްވީޓެއްގައެވެ. 

އަންނަ އަހަރުގެ ބަޖެޓުގައި ތައުލީމީ ދާއިރާއަށް ބޮޑު ހޭދައެއް ކުރުމަށް ސަރުކާރުން ވަނީ ނިންމާފައެވެ. 

އެގޮތުން ތައުލީމީ ދާއިރާގެ އިމާރާތާއި ވަސީލަތްތައް ގާއިމްކުރުމަށް 142 ރަށެއްގައި 195 މަޝްރޫއެއް 2023 ވަނަ އަހަރު ހިންގުމަށް ވަނީ ހަމަޖެހިފައެވެ. އަދި 21 ރަށެއްގައި ސުކޫލު އިމާރާތާއި ވަސީލަތްތައް ގާއިމުކުރުމަށް ބަޖެޓުގައި ވަނީ ހިމަނާފައެވެ. 

އެހެން ނަމަވެސް އަންނަ އަހަރުގެ ބަޖެޓުގއި އަރަބިއްޔާ ސުކޫލުގެ އިމާރާތް ހެދުމަށް ހިމަނާފައި ނުވާކަން ތާރިގު ވަނީ ސަމާލުކަމަށް ގެނެސްފައެވެ. އަދި އެކަން އޭނާ ސިފަކުރެއްވީ އެއީ އަރބިއްޔާ ސުކޫލު ވުޖޫދުން ފޮހެލުމަށް މަސައްކަތްކުރުން ކަމަށެވެ. އެކަމާއި ހިތާމަކުރައްވާކަމަށްވެސް ތާރިގު ވަނީ ވިދާޅުވެފައެވެ. 

އަރަބިއްޔާ ސުކޫލުގެ އާ އިމާރާތް ހެދުމަށް ބާ ޖަމާލުއްދީން ސަރަހައްދު ސަރުކާރުން ކަނޑައަޅާފައި ވީނަމަވެސް، އިމާރާތައް ގެނެވުނު ބަދަލާއެކު އަރަބިއްޔާއަށް ކަނޑައެޅި ޖާގަ ކުޑަވެފައިވާކަން ފާހަގަކޮށް އަރަބިއްޔާ ސުކޫލުގެ ބެލެވެރިން ގެންދަނީ ކަންބޮޑުވުން ފާލުކުރަމުންނެވެ. 

އަރަބިއްޔާގެ ދަރިވަރުން އެތައް ޚިދުމަތަކުން މަހުރޫމްކޮށްގެން މިހާރުވެސް ވަގުތީ ސުކޫލެއްގައި ކިޔަވައިދެމުންދާއިރު، ދާއިމީ ހިޔާވައްސެއް ފޯރުކޮށްދިނުމަށް ބެލެނިވެރިން ގެންދަނީ ކެނޑިނޭޅި އާދޭސްކުރަމުންނެވެ. 

އަރަބިއްޔާގެ އާ އިމާރާތް މި ދައުރު ނިމެންވާއިރަށް ނިންމާނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެފއި ވީނަމަވެސް އެ މަސައްކަތް ކުރިއަށް ގެންދިއުމުގައި ސަރުކާރުގެ ދުވެހި ހުރި ހިސާބަށް ބަލާއިރު ދައުރު ނިމެންވާއިރަށް ސުކޫލު އިމާރާތް ނިންމާލެވޭނެކަމާމެދު ބެލެނިވެރިން ގެންދަނީ ސުވާލުވެސް އުފައްދަމުންނެވެ.