ރާއްޖޭގެ ސަރަހައްދުން ބައެއް ގެއްލޭގޮތަށް އެއްވެސް ނިންމުމެއް އަމިއްލަފުޅަށް ނިންމުމުގެ ބާރު ރައީސުލްޖުމްހޫރިއްޔާއަށް ލިބިވަޑައިގެންފައި ނުވާކަމަށް ރައްޔިތުންގެ މަޖިލީހުގެ ވިލިފުށީ ދާއިރާގެ މެމްބަރު ހަސަން އަފީފު ވިދާޅުވެއްޖެއެވެ.
އަފީފު މިފަދައިން ވިދާޅުވެފައިވަނީ ޗާގޯސް މައްސަލައާއި ގުޅިގެން މަޖިލީހަށް ހުށައަޅާފައިވާ ގަރާރަކަށް ވާހަކަދައްކަވަމުންނެވެ.
އެ ގަރާރަށް ވާހަކަދައްކަވަމުން އަފީފު ވިދާޅުވީ މިހާރު އުފެދިގެން މި އުޅޭ ބަހުސަކީ ޗާގޯސްއަކީ ރާއްޖޭގެ ސިޔާދަތު ހިނގާ ތަނެއްތޯ ނުވަތަ ނޫންތޯ ކުރެވޭ ބަހުސެއް ނޫންކަމަށެވެ. މައްސަލައަކީ ރާއްޖޭގެ ސަރަހައްދުން ބައެއް ގެއްލުމުގެ ފުރުސަތު އޮތް ގޮތަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ޗާގޯސް އަކީ މޮރިޝަސްގެ ސިޔާދަތު ހިނގާ ތަނެއްކަމަށް ގަބޫލުފުޅުކުރައްވާ ފޮނުވި ސިޓީފުޅުކަމަށް އޭނާ ވިދާޅުވިއެވެ.
އަފީފު ވިދާޅުވީ ރައީސުލްޖުމްހޫރިއްޔާގެ އެ ސިޓީފުޅަކީ ގާނޫނު އަސާސީގެ 3 ވަނަ މާއްދާއާއި ޚިލާފު ސިޓީފުޅެއްކަމަށެވެ. އެ މާއްދާގައި ބުނާ ގޮތުން ރާއްޖޭގެ ސަރަހައްދުން ބައެއް ދޫކޮށްލެވޭނީ ނޫނީ ބައެއް ގެއްލުމުގެ ފުރުސަތު އޮތް ކަމެއްވެސް ކުރެވޭނީ ރައްޔިތުނގެ މަޖިލީހުގެ ތިން ބައި ކުޅަ ދެބައިގެ އަގުލަބިއްޔަތުން ފާސްކޮށްގެންނެވެ.
"އަޅުގަނޑުމެންނަށް މިތާގައި އެބޮތް ތިންބައި ކުޅަ ދެބަޔަށް ވުރެ މާ ބޮޑު އަގުލަބިއްޔަތު، އަޅުގަނޑުގެ ހިތުގައި އުފެދޭ ސުވާލަކީ ކީއްވެގެންތޯ މި މައްސަލަ މިތަނަށް ހުށަނާޅާ އަމިއްލަ އަމިއްލައަށް ނިންމާލެވިފަ އެ ހުރީ. ކޮބައިތޯ މީގަ އޮތް ސިއްރަކީ؟"
ވިލިފުށީ ދާއިރާގެ މެމްބަރު ހަސަން އަފީފު
އަފީފު ވިދާޅުވީ ކޮންމެ ސަރުކާރެއްވެސް ނުވަތަ ކޮންމެ ރައީސަކުވެސް ހޮވަނީ ގާނޫނު އަސާސީ ނެގެހެއްޓުމަށްކަމަށެވެ. އެގޮތުން ރައީސުލްޖުމްހޫރިއްޔާ މަގާމަށް ވަޑައިގަންނަވަނީވެސް އެ ގާނޫނު އަސާސިއަށް ހުރުމަތްތެރިކޮށް ހިތުމަށް މާތްﷲ ގަންދީ ހުވާކޮށްގެކަމަށް އޭނާ ވިދާޅުވިއެވެ.
އެހެން ކަމުން ގާނޫނު އަސާސީގައި ބަޔާންކޮށްފައި އޮތް ކަމެއް އެހެން ގޮތަކަށް ގެންދިއުމަކީ އެއްވެސް މީހަކަށް ލިބެގެންވާ ހައްގެއް ނޫންކަމަށް އަފީފުގެ ވާހަކައިގައި ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
