އަދާލަތުޕާޓީ އަކީ ސަރުކާރު ހިންގާ ކޯލިޝަންގައި ހިމެނޭ ޕާޓީއަކަށް ވާއިރު, ސަރުކާރު ހިންގުމުގައި އެ ޕާޓީ އޮތުމަކީ ޕާޓީގެ ބޮލުގައި އެޅިފައިވާ ވަރަށް ބޮޑު މަސްއޫލިއްޔަތެއް ކަމަށް ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ. 

ހަށިވިއްކުން ފަދަ ކަންކަން އާންމުވާއިރު، ސަރުކާރު ހިންގާ ކޯލިޝަންގައި ހިމެނޭ އަދާލަތު ޕާޓީގެ އިލްމުވެރިންގެ މަޖިލިސް ހިމޭނުން އޮންނާތީ ކަންބޮޑުވުން ފާޅުކޮށް ޝަހީމް ކުރެއްވި ޓްވީޓެއްގައި ވިދާޅުވީ، ހަށިވިއްކާ ތަންތަން ބަންދު ކުރުމަށް އަދާލަތު ޕާޓީގެ އިލްމުވެރިންގެ މަޖިލީހުން ކަމާބެހޭ އިދާރާތަކަށް ބާރު އަޅަންޖެހޭ ކަމަށެވެ. 

"ސަރުކަާރު ހިންގުމުގައި ޕާޓީއެއް އޮތުމަކީ ވަރަށް ބޮޑު މަސްއޫލިއްޔަތެއް" ޝަހީމް ވިދާޅުވިއެވެ. 

Advertisement

މިއާއެކު ޝަހީމް ވަނީ އަދާލަތު ޕާޓީ އެންމެ ކުރިން އުފެދިގެން އައި އިރު އޭރުގެ ރައީސް މައުމޫން އަބްދުލްގައްޔޫމާއެކު ބޭއްވި ފުރަތަމަ ބައްދަލުވުމުގައި ވެސް އެ ޕާޓީން މާލޭގައި ހުރި ހަށިވިއްކުމަށް މަގުފަހިވާ އެފަދަ ހުރިހާ ތަނެއް ބަންދުކޮށްދިނުމަށް އެދުނުކަން ފާހަގަކުރައްވާފައެވެ. 

އަދި އެ ޕާޓީގެ އެދުމާ އެއްގޮތަށް އޭރުގެ ރައީސް މައުމޫން އަބްދުލްގައްޔޫމް މާލޭގައި ހުރި އެފަދަ ތަންތަން ބަންދުކުރެއްވި ކަމަށްވެސް ޝަހީމް ވިދާޅުވިއެވެ. 

ސަރުކާރަށް ހަތަރު އަހަރު ފުރުމާ ގުޅިގެން އިއްޔެ ބޭއްވި ނޫސްވެރިންގެ ބައްދަލުވުމުގައި، ހޯމް މިނިސްޓަރު، އަދި އަދާލަތު ޕާޓީގެ ރައީސް އިމްރާން ވިދާޅުވީ ގޮތުގައި މަސާޖު ޕާލާތަކުގެ ނަމުގައި ހަށިވިއްކާ ތަންތަން ގިނަވަނީ ސޯޝަލް މީޑިއާގެ ސަބަބުންނާއި އަދި ކޮވިޑު-19 ގެ ބަލިމަޑުކަމުގެ ތެރޭގައި މުޅި ދުނިޔެ ބަންދުކޮށްފައި އޮތް އިރު ރާއްޖޭގެ ބޯޑަރު ހުޅުވާލާފައި އޮތުމަކީ "އެ ހަރަކާތްތައް ]ހަށިވިއްކުން] ފަސޭހަވެގެން ދިޔަ ސަބަބެއް" ކަމަށެވެ. 

އެހެންނަމަވެސް އެއަށްފަހު، މިހާރުވެސް އެފަދަ އެތައް ތަނެއް ހުރި އިރު، އެކަން ހުއްޓުވަން ސަރުކާރުން މާ ބޮޑު މަސައްކަތްތަކެއް ނުކުރާ ކަމަށް ގިނަ ބަޔަކު އަންނަނީ ބުނަމުންނެވެ.