މެލޭޝިޔާގައި އިއްޔެ ކުރިއަށްދިޔަ އާންމު އިންތިހާބުން އެ ޤައުމުގެ ކުރީގެ ބޮޑުވަޒީރު، އަދި ސިޔާސީ މައިދާނުގައި އެންމެ ދިގު މުއްދަތަކަށް ޚިދުމަތް ކުރެއްވި އެއް ޝަޚުޞިއްޔަތު، ޑރ.މުހައްމަދު މަހާތީރު މުހައްމަދު ނާކާމިޔާބީއާއި ކުރިމަތިލައްވަންޖެހިއްޖެއެވެ. 

އުމުރުން 97 އަހަރުގެ މަހާތީރު ކުރިމަތިލެއްވީ މެލޭޝިޔާގެ ލަންކާވީގެ ގޮނޑިއަށެވެ. އެ ގޮނޑިއަށް ޖުމުލަ ފަސް މީހުން ކުރިމަތިލިއިރު މަހާތީރަށް ލިބިލެއްވީ 4566 ވޯޓެވެ. އޭއާއެކު އޭނާ ހިމެނެނީ އެ ގޮނޑިއަށް ކުރިމަތިލީ މީހުންގެ ތެރެއިން ދެވަނައަށް އެންމެ މަދުން ވޯޓު ލިބުނު މީހާއަށެވެ.  ޖުމްލަ 47500 މީހުންނަށް އެ ފޮއްޓަށް ވޯޓުލެވެއެވެ. އެ ގޮނޑި ލިބިފައިވަނީ ޕެރިކަޓަން ނޭޝަނަލް ކޯލިޝަންގެ ކެނޑިޑޭޓަށެވެ.

މަހާތީރަށް އެ އިންތިޚާބުގައި ކާމިޔާބީ ލިބިފައި ނުވާއިރު، އޭނާ ނިސްބަތްވާ ޕާޓީއަށްވެސް މެލޭޝިޔާގެ އާއްމު އިންތިހާބުން އެއްވެސް ގޮނޑިއެއް ލިބިފައެއް ނުވެއެވެ. 

Advertisement

މަހާތީރަކީ މެލޭޝިޔާގައި އެންމެ ގިނަ ދުވަހު ވެރިކަންކުރެއްވި ބޮޑުވަޒީރެވެ. އެގޮތުން 1981 ވަނަ އަހަރުން ފެށިގެން 2003 ވަނަ އަހަރާއި ހަމައަށް، 22 އަހަރު ވަންދެން އޭނާ ވަނީ އެގައުމުގެ ވެރިކަން ކުރައްވާފައެވެ. 

ސިޔާސީ މައިދާނާއި ދުރުގައި ހުންނެވުމަށްފަހު މަހާތީރު އެނބުރި ސިޔާސީ މައިދާނަށް ވަޑައިގަތީ 2018 ވަނަ އަހަރުގައެވެ. އެއަށްފަހު، އޭރު ބޮޑުވަޒީރަކަށް ހުންނެވި ނަޖީބް ރައްޒާކުގެ ވެރިކަން ނިމުމަކަށް ގެނައުމުގެ މަސައްކަތް ފަށައި، މެލޭޝިޔާގެ ބޮޑުވަޒީރުކަމަށް އެތައް އަހަރަކަށްފަހު އަލުން ވަޑައިގެންނެވިއެވެ. އެހެން ނަމަވެސް 2020 ވަނަ އަހަރު ޤާނޫނު ހަދާ މަޖިލީހުގެ އަގުލަބިއްޔަތު ގެއްލި މަހާތީރުގެ ސަރުކާރު ނިމުމަކަށް އައެވެ.