ބަނާނާ ބްރެޑަކީ ތައްޔާރު ކޮށްލަން ވަރަށް ފަސޭހަ، އަނގަޔަށް ވެސް އެހާމެ މީރު އެއްޗެކެވެ. ހެނދުނު ތެދުވެ ތައްޔާރު ކުރާނެ ވަގުތު ނުވާނަމަ ރޭގަނޑު ވެސް، ނޫނީ އެއްދުވަސް ކުރިންވެސް ތައްޔާރު ކޮށްލާފަ ބެހެއްޓިދާނެއެވެ. ހަލާކެއް ނުވާނެއެވެ. އެހެންކަމުން، ބުރަ ކޮށް އުޅޭ ފަރާތްތަށް ވެސް ހެނދުނު ނާސްތާއަށް ތައްޔާރު ކޮށްލަން މިއީ ވަރަށް ކަމުދާނެ އެއްޗެއް ކަމަށް އުއްމީދު ކުރަމެވެ. 

3 ވަރަށް ދޮން، ބޮޑު ދޮންކެޔޮ

8 މޭޒުމަތީ ސަމުސާ އަން-ސޯލްޓެޑް ބަޓަރ (މަޑުކޮށްފައި)

3/4 ޖޯޑު ހަކުރު

2 ބިސް

1 1/2 ޖޯޑު ފުށް

1 މޭޒުމަތީ ސަމުސާ ބޭކިންގ ޕައުޑަރ

1/2 ސައި ސަމުސާ ލޮނު

1/2 ސައި ސަމުސާ ވެނީލާ އެސެންސް

1/2 ޖޯޑު ރެއިޒިން ނުވަތަ ޗޮކްލެޓް ޗިޕްސް

1) ހޭންޑް މިކްސަރަކުން ބަޓަރ ކޮޅާއި ހަކުރު އެންމެ ކުރިން ރަނގަޅަށް އެކުލަވާލާށެވެ.

2) އުލަކުން ވަކި ތައްޓެއްގައި ދޮންކެޔޮ ޗިސް ކޮށްލާށެވެ. ދެން ބަޓަރ އާއި ހަކުރު މިކްސްޗަރ ގެ ތެރެއަށް ޗިސްކުރި ދޮންކެޔޮ އަދި ބިސް އެޅުމަށްފަހުވެސް ރަނގަޅަށް ހޭންޑު މިކްސަރުން އެކުލަވަމުން ދާށެވެ. 

3) ވަކި ތަށްޓެއްގައި ފުށާއި ބޭކިންގ ޕައުޑަރ އަދި ލޮނު އެކުލަވާލިމަށްފަހު އެވެސް މަޑުމަޑުން ކުރިން ތައްޔާރު ކުރި މިކްސްޗަރ އަށް އަޅަމުންދާށެވެ. ފުށް މިކްސްޗަރ އެއްކޮށް އަޅައި އެކުލަވައި ނިމުމުން ވެނީލާ އެސެންސް އެޅުމަށްފަހުވެސް އެކުލަވާލާށެވެ. 

4) ދެން ޗޮކޮލެޓް ޗިޕްސް ނުވަތަ ރެއިޒިން އެޅުމަށްފަހު ސަމުސަލަކުން އެކުލަވާލާށެވެ. 

5) އެއަށްފަހު ޕާން ފިހާ ޓްރޭއެއްގައި ރަނގަޅަށް ބަޓަރ ކޮޅެއް އުނގުޅާލުމަށްފަހު، އެއްކުރި މިކްސްޗަރ އަޅާލާށެވެ. ދެން 175 ޑިގްރީއަށް 10 މިނެޓް ވަންދެން އަވަން ޕްރީ ހީޓް ކުރުމަށްފަހު، 50 ވަރަކަށް މިނެޓް ވަންދެން ބަނާނާ ބްރެޑް ފިހެލާށެވެ. އިލޮއްޓެއް ބްރެޑް ތެރެއަށް ހަރާލުމަށްފަހު ނަގާއިރު އޭގައި އެއްވެސް އެއްޗެއް ތަތް ނުލާނަމަ އެހުރީ ބަނާނާ ބްރެޑް ފިހެވިފައެވެ.