ރާއްޖޭގެ ރަށްތައް ދަތުރުފަތުރުގެ ނިޒާމުން ގުޅާލުމަށް ސަރުކާރުން ފަށާފައިވާ "އިންޓަގްރޭޓެޑް ނެޝެނަލް ޕަބްލިކް ފެރީ ނެޓްވޯކް" ގެ ދަށުން ފެށި "ރާއްޖެ ޓްރާންސްޕޯޓް ލިންކް" (އާރުޓީއެލް)ގެ ހިދުމަތް ޅ. އަތޮޅަށް ދޭން ފަށައިފިއެވެ.

ޕްލޭނިންގ މިނިސްޓްރީން ކުރި ޓްވީޓެއްގައި ބުނެފައި ވަނީ ޅ. އަތޮޅަށް އާރްޓީއެލް ފެރީގެ ހިދުމަތަށް އަހުލުވެރި ކުރުމުގެ ގޮތުން ދަތުރުތައް އިއްޔެ ފަށާފައިވާ ކަމަށެެވެ. އަދި މިހާރު ކުރިއަށްދާ ދަތުރު ތަކަށް އެއްވެސް އަގެއް ނުނަގާނެ ކަމަށްވެސް އެ މިނިސްޓްރީން ބުނެފައިވެއެވެ. 

"ތިން ރޫޓަކުން އަހުލުވެރި ކުރުމުގެ ދަތުރުތައް ކުރިއަށްދާއިރު، މި ދަތުރުތަކަށް އެއްވެސް އަގެއް ނުނަގާނެ" މިނިސްޓްރީގެ ޓްވީޓްގައި ވެއެވެ.

ފެރީ ދަތުރުތައް ޅ.އަތޮޅުގެ ހުރިހާ ރަށްތަކަށް ދަތުރުކުރާ އިރު ޖުމުލަ ތިން ރޫޓަކުން ދަތުރު ކުރުމަށް ވަނީ ހަމަޖެހިފައެވެ. އެގޮތުން ދަތުރުކުރާ ޅ އަތޮޅުގެ ރަށް ރަށުން ޅ. މަޑިވަރުގައި ގާއިމްކޮށްފައިވާ އެއާޕޯޓްއަށް ވެސް އާރްޓީއެލް ފެރީގެ ދަތުރުތައް ކުރާނެއެވެ.

ޅ. އަތޮޅުގައި ފެރީގެ އަގުތައް ކޮޅަކަށް އުޅެނީ 35 ރުފިޔާއިން ފެށިގެން 105 ރުފިޔާއާ ދެމެދު އެވެ.

އާރްޓީއެލް ފެރީގެ ހިދުމަތް ރަސްމީކޮށް ޖޫން 12 ގައި ފެށި އިރު، ފުރަތަމަ ފެށީ ޒޯން 1 ގައި ހިމެނޭ އަތޮޅުތަކުގެ ތެރެއިން ހއ. އަތޮޅުންނެވެ. އޭގެ ފަހުން ހދ.، އަދި ށ. އަތޮޅަށް ފެރީގެ ދަތުރުތައް ވަނީ ފަށައިފަ އެވެ.