މިނިސްޓްރީ އޮފް ހެލްތަށް 13 ސްޕީޑު ބޯޓު ގަތުމަށް ގަލްފް ކްރާފްޓް މޯލްޑިވްސް އާއެކު ސޮއި ކުރައްވައިފި އެވެ.

މި އެއްބަސްވުމުގައި މިނިސްޓްރީ އޮފް ހެލްތުގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ފޮރ ހެލްތު އަޙުމަދު އާދިލްއެވެ. އަދި ގަލްފް ކްރާފް މޯލްޑިވްސްގެ ފަރާތުން ސޮއި ކުރެއްވީ ޕްރޮޑަކްޝަން ޖެނެރަލް މެނޭޖަރ ކޯސްޓާސް އެލިއޯޕްލަސްއެވެ. 

ހެލްތު މިނިސްޓްރީން ބުނީ، ވަރލްޑް ބޭންކް އަދި އޭޝިއަން އިންފްރާސްޓްރަކްޗަރ އިންވެސްޓްމަންޓް ބޭންކުގެ އެހީގައި ކުރިއަށް ގެންދާ މޯލްޑިވްސް ކޮވިޑް-19 އިމަރޖެންސީ ރެސްޕޮންސް އެންޑް ހެލްތު ސިސްޓަމްސް ޕްރެޕެއަރޑްނަސް ޕްރޮޖެކްޓުން 13 ސްޕީޑް ބޯޓް ގަތުމަށް ގަލްފް ކްރާފްޓް މޯލްޑިވްސްއާއި އެކު 31 މިލިއަން ރުފިޔާއަށް އެއްބަސްވުމެއްގައިވަނީ ސޮއިކޮށްފައިވާ ކަމަށެވެ. 

އަދު އެ އެއްބަސްވުމުގަމެ ދަށުން ސްޕީޑް ބޯޑްތައް މިނިސްޓްރީއަށް ފޯރުކޮށްދިނުމަށް އެއްބަސްވެފައިވަނީ 1 އަހަރު ދުވަހުގެ ތެރޭގައި ކަމަަށް ވެސް މިނިސްޓްރީން ބުނެއެވެ. 

މީގެ އިތުރުން މިނިސްޓްރީން ބުނީ، މި ސްޕީޑް ބޯޓްތައް ބޭނުންކުރުމަށް ހަމަޖެހިފައިވަނީ ލެބޯޓްރީ ސާމްޕަލް ގެން ދިއުމަށާއި އައުޓްރީޗް ޕްރޮގްރާމް ހިންގުމަށް އަދި އިމަރޖެންސީ ޙާލަތުގައި ބަލިމީހުން އުފުލުމަށް ކަމަށެވެ. 

މި ކަމުގެ ސަބަބުން މިވަގުތު ލެބޯރޓްރީ ނެތް ރަށްރަށުންނާއި ބައެއް ޓެސްޓްތައް ނެހެދޭ ލެބޯރޓްރީތަކުން ސާމްޕަލް އުފުލުމަށް އިތުރަށް ފަސޭހަވެ އަދި ރީޖަނަލް ހޮސްޕިޓަލް ނުވަތަ އަތޮޅު ހޮސްޕިޓަލް މެދުވެރިކޮށް ސްޕެޝަލިސްޓުންގެ ޚިދުމަތާއި އަދި އެނޫންވެސް ޙިދުމަތްތަކާއިއެކު އައުޓް ރީޗް ޕްރޮގްރާމްތައް އެއަތޮޅެއްގެ ރަށްތަކަށް ހިންގުމަށް ފަސޭހަވެގެންދާނެ ކަމަށް މިނިސްޓްރީން ވަނީ ފާހަގަކޮށްފައެވެ.