މެލޭޝިއާގެ 10 ވަނަ ބޮޑުވަޒީރަކަށް އަންވަރު އިބުރާހިމް ވެވަޑައިގެންފިއެވެ. 

ފާއިތުވެދިޔަ ހަފްތާ ބަންދުގައި މެލޭޝިއާގައި ބޭއްވުނު އާންމު އިންތިޚާބުގައި ގާނޫނުހަދާ މަޖިލީހުގެ އެންމެ ގިނަ ގޮނޑި ކާމިޔާބު ކޮށްފައިވަނީ އަންވަރު އިބުރާހިމްގެ ޕަކަތަން ހަރަޕަން (PH) ކޯލިޝަން އަށް ކަމަށް ވީނަމަވެސް އެ އިންތިޚާބުގައި ވަކި އެއްވެސް ޕާޓީއަކަށް ގާނޫނުހަދާ މަޖިލިހުގެ މެޖޯރިޓީ ހޯދިފައެއް ނުވެއެވެ. 

އެހެން ކަމުން މެލޭޝިއާގެ ރަސްގެފާނު، ކިންގް ސުލްތާން އަހުމަދު ޝާހު ވަނީ އަންވަރު އިބުރާހިމް އާއި އިންތިހާބުގައި ދެވަނަ އަށް އެންމެ ގިނަ ގޮނޑި ކާމިޔާބު މެލޭ-މުސްލިމް ޕެރިކަތަން ނޭޝަނަލް (PN)ގެ ލީޑަރ އަދި  ކުރި ކުރީގެ ބޮޑުވަޒީރު މުހުޔިއްދީން ޔާސިންއާއި މަޝްވަރާ ކުރައްވާފައެވެ.

އެ މަޝްވަރާތަކަށްފަހު، މިއަދު ރަސްގެފާނު އިއުލާން ކުރައްވާފައިވަނީ، އާ ސަރުކާރެއް އުފެއްދުމުގެ ފުސަތު ދެއްވާނީ، ގާނޫނުހަދާ މަޖިލިހުގައި އެންމެ ގިނަ ގޮނޑި ކާމިޔާބުކުރި އަންވަރު އިބުރާހިމްގެ ކޯލިޝަނަށް ކަމުގައެވެ. އެހެން ކަމުން މިއަދު ހަވީރު މެލޭޝިއާގެ ގަޑިން 5:00 ގައި އާ ބޮޑުވަޒީރު އަންވަރު އިބުރާހިމް އަށް އައްޔަންކޮށް މަގާމުގެ ހުވާ ކުރައްވާނެ ކަމުގައި ރަސްގެފާނު ވިދާޅުވިއެވެ.

އަންވަރު އިބުރާހިމް އޭނާގެ ސިޔާސީ ހަޔާތް ފައްޓަވާފައިވަނީ 1971 ވަނަ އަހަރު އޭނާ އުފެއްދެވި މުސްލިމް ޔޫތު މޫވްމަންޓް އޮފް މެލޭޝިއާއިންނެވެ. 

އަދި 90ގެ އަހަރުތަކުގައި އައި އޭޝިއަން ފައިނޭޝަލް ކްރައިސިއްގައި، އޭރުގެ ބޮޑުވަޒީރު މަހާތީރު ވަނީ އޭނާއަށްފަހު ބޮޑުވަޒީރުކަމަށް ވަޑައިގަންނަވާނެކަމަށް ބެލެވެމުން އައި އަންވަރު މަގާމުން ދުރުކޮށް، ނަހަމަ ގޮތުގައި ޖިންސީ ގުޅުން ހިންގުމާއި އަދި ކޮރަޕްޝަންގެ ތުހުމަތުގައި 1998 ވަނައަހަރު އޭނާ ޖަލަށް ލައްވާފައެވެ.

އެއަށްފަހު އަންވަރުވަނީ 10 އަހަރު ޖަލުގައި ހޭދަ ކުރެއްވުމަށްފަހު އޭނާ ޖަލުން މިނިވަން ކޮށްފައިވަނީ 2018ވަނަ އަހަރުގެ އާންމު އިންތިޚާބުގައި، އިދިކޮޅު ފަރާތްތަކަށް އިންތިޚާބު ކާމިޔާބު ކުރެވުމާއި ގުޅިގެންނެވެ.