ހދ ނޮޅިވަރަމުގައި ނިޔާވި ޒުވާން އަންހެނަކު މަރާލާފައިވާ ކަމުގެ ތުހުމަތު ކޮށްފި އެވެ.

ފުލުހުން ބުނީ، ނޮޅިވަރަމްގައި މީހަކު މަރާލައިގެން އުޅޭ ކަމަށް ބުނެ، މިއަދު މެންދުރު 12:30 ހާއިރު ފުލުހުންނަށް ރިޕޯޓް ކޮށްފައިވާ ކަމަށެވެ. 

އަދި އެ މައުލޫމާތު ލިބުމާއި އެކު ފުލުހުން، އެ ސީން އަށް އެޓެންޑްވެ ހޭނެތިފައި އޮތް މީހަކު، ފުލުހުންގެ އެހީތެރިކަމާއެކު އެ ރަށު ހެލްތު ސެންޓަރަށް ގެންގޮސްފައިވާ ކަމަށްވެސް ފުލުހުން ބުނެފައިވެއެވެ. 

Advertisement

އަދި އެއީ 28 އަހަރުގެ ދިވެހި އަންހެނެއް ކަމަށާ، އެ މީހާ ހެލްތު ސެންޓަރ އަށް ގެންދިޔަ އިރުވެސް ނިޔާވެފައިވާ ކަމަށް، ޑޮކްޓަރުން ފުލުހުންނަށް މައުލޫމާތު ދީފައިވާ ކަމަށް ފުލުހުން ބުނެފައިވެއެވެ. 

އަންހެން މީހާ ފެނުނު އިރު ޒަޚަމްތަކެއް ގައިގައި ހުރި ކަމަށް އެރަށުގެ ބައެއް މީހުން ބުނެފައިވީ ނަމަވެސް، އެކަމާއި ގުޅިގެން ފުލުހުން މިހާތަނަށް ވަކި އެއްޗެއް ބުނެފައެއް ނުވެއެވެ.

މި މައްސަލާގައި ރަށު މީހުން ތުހުމަތުކުރަނީ އަންހެން މީހާގެ ފިރިމީހާއަށެވެ.

ނޮޅިވަރަމް ފެނަކަ އޮފީހުގައި މަސައްކަތް ކުރާ ފިރިމީހާ ރަށުގައިނެތް ކަމަށާއި، އޭނާ އަކީ މަސްތުވާތަކެތީގެ ރެކޯޑް އޮންނަ މީހެއްކަމަށް ރަށުން ވާހަކަދެއްކި ފަރާތްތަކުން މައުލޫމާތު ދީފައިވެއެވެ. ނަމަވެސް ފުލުހުންގެ ފަރާތުން މި މައްސަލާގައި ވަކި ގޮތެއް ނިންމާފައި ނުވާއިރު، އަންހެން މީހާގެ މަރާ ގުޅިގެންވެސް އެއްވެސް ގޮތެއް ނުނިންމަފައެވެ.