ހދ. ނޮޅިވަރަމުގައި ނިޔާވެފައި އޮއްވާ ފެނުނު ނިޝާމާ މުހައްމަދުގެ ހަށިގަނޑު ޕޯސްޓްމޯޓަމް ހެދުމަށް މާލެ ގެނެސްފައިވާ ކަމަށް ފުލުހުން ބުނެފިއެވެ.
ނިޝާމާ އޭނާ ދިރިއުޅޭ ގޭގެ ކޮޓަރިތެރޭގައި ޚަބަރު ހުސްވެފައި އޮއްވާ ޢާއިލާއަށް ފެނުނީ މިދިޔަ ހޮނިހިރު ދުވަހު މެންދުރު ގެ ވަގުތެއްގައެވެ.
އެ މައްސަލަ އާއި ގުޅިގެން ފުލުހުން އެދުވަހު ބުނީ، ނޮޅިވަރަމްގައި މީހަކު މަރާލައިގެން އުޅޭ ކަމަށް ބުނެ، އެދުވަހު މެންދުރު 12:30 ހާއިރު ފުލުހުންނަށް ރިޕޯޓް ކޮށްފައިވާ ކަމަށެވެ.
އަދި އެ މައުލޫމާތު ލިބުމާއި އެކު ފުލުހުން، އެ ސީން އަށް އެޓެންޑްވެ ހޭނެތިފައި އޮތް މީހަކު، ފުލުހުންގެ އެހީތެރިކަމާއެކު އެ ރަށު ހެލްތު ސެންޓަރަށް ގެންގޮސްފައިވާ ކަމަށްވެސް ފުލުހުން ބުނެފައިވެއެވެ.
އަދި އެއީ 28 އަހަރުގެ ދިވެހި އަންހެނެއް ކަމަށާ، އެ މީހާ ހެލްތު ސެންޓަރ އަށް ގެންދިޔަ އިރުވެސް ނިޔާވެފައިވާ ކަމަށް، ޑޮކްޓަރުން ފުލުހުންނަށް މައުލޫމާތު ދީފައިވާ ކަމަށް ފުލުހުން ބުނެފައިވެއެވެ.
އެކަމާއި ގުޅިގެން މައުލޫމާތު ދެމުން މިއަދު ފުލުހުން ބުނީ، ޕޯސްޓްމޯޓަމް ހެދުމަށް ނިޝާމާގެ ހަށިގަނޑު މިހާރު މާލެ ގެނެވިފައިވާ ކަމަށާ، އެކަމަށްޓަކައި ކުރަންޖެހޭ ކަންކަން މިހާރު ކުރަމުން އަންނަ ކަމަށެވެ.
ނިޝާމާގެ މަރާއި ގުޅިގެން ފުލުހުން ހައްޔަރު ކޮށްފައި ވަނީ އޭނާގެ ފިރިމީހާ އެވެ. އޭނާގެ ބަންދާއި މެދު ގޮތެއް ނިންމުމަށް ކޯޓަށް ހާޒިރު ކުރުމުން އޭނާގެ ބަންދަށް ކޯޓުން 15 ދުވަސް ޖަހާދީފައިވާ ކަމަށް ފުލުހުން ރޭ ބުނެފައި ވެއެވެ.
Advertisement
This content is created and paid for by advertisers and does not involve Voice Journalists
