ނިމިދިޔަ ހަފްތާގެ ހޮނިހިރު ދުވަހު ހދ. ނޮޅިވަރަމުގައި ނިޔާވެފައި އޮއްވާ ފެނުނު ނިޝާމާ މުހައްމަދު، ނިޔާވިތާ ހަފްތާއެއް ވެފައިވާއިރު ވެސް ޕޯސްޓްމޯޓަމް ނުހަދާތީ ޢާއިލާއިން ކަންބޮޑުވުން ފާޅުކޮށްފިއެވެ.
މިމަހު 10 ވަނަ ދުވަހު ނިޔާވި ނިޝާމާގެ ޕޯސްޓްމޯޓަމް ހެދުމަށް އޭނާގެ ހަށިގަނޑު މާލެ ގެނެވުނީވެސް މިމަހުގެ 12 ވަނަ ދުވަހުއެވެ.
އެއަށްފަހު ފުލުހުން ބުނީ، އޭނާގެ ހަށިގަނޑުގެ ޕޯސްޓްމޯޓަމް ހެދުމަށް ކުރަންޖެހޭ ކަންކަން ކުރަމުންދާ ކަމަށެވެ. އެހެންނަމަވެސް އަދިވެސް ޕޯސްޓްމޯޓަމް ހެދުމަށް އޭނާގެ ހަށިގަނޑު ފޮނުވިފައި ނުވާއިރު، އެކަމާއި ގުޅިގެން މިއަދުވެސް ފުލުހުންގެ މީޑިއާ އޮފިޝަލް 'ވޮއިސް' އަށް މައުލޫމާތު ދެއްވަމުން ވިދާޅުވީ، ހަމަ އެފަދައިންނެވެ.
"ނިޝާމާގެ ހަށިގަނޑު ޕޯސްޓްމޯޓަމް ހެދުމަށް ކުރަންޖެހޭ ކަންކަން ކުރަމުންދަނީ" ފުލުހުންގެ މީޑިއާ އޮފިޝަލް ވިދާޅުވިއެވެ.
ފުލުހުން މިފަދައިން ވިދާޅުވެފައިވާއިރު, ނިޝާމާގެ ޖަނާޒާގެ ކަންކަން ކުރިއަށް ނުގެންދެވޭތީ އޭނާގެ އާއިލާއިން އަންނަނީ ކަންބޮޑުވުން ފާޅުކުރަމުންނެވެ. ޢާއިލާއިން ވޭހާވެސް އަވަހަށް ޖަނާޒާގެ ކަންކަން ކުރަން ބޭނުންވާއިރު، އެކަން ކުރެވެން އޮތީ ޕޯސްޓުމޯޓަމަށް ފަހުގައެވެ.
އެހެންކަމުން، ޢާއިލާއިން މިހާރުވެސް އެދެމުންދަނީ ވޭހާވެސް އަވަހަށް ޕޯސްޓްމޯޓަމް ގެ ކަންކަން ނިންމުމަށްފަހު ނިޝާމާގެ ހަށިގަނޑު ޢާއިލާ އާއި ހަވާލުކުރުމެވެ.
Advertisement
This content is created and paid for by advertisers and does not involve Voice Journalists
