ހދ. ނޮޅިވަރަމުގައި ނިޔާވެފައި އޮއްވާ ފެނުނު ނިޝާމާ މުހައްމަދު މަރާލި ކަމަށް ތުހުމަތު ކުރެވޭ އޭނާގެ ފިރިމީހާ، އަބޫބަކުރު ފައިސަލް، (32) ނިޔާވެއްޖެއެވެ.
ފުލުހުންގެ މީޑިއާ އޮފިޝަލް ދާދި ދެންމެއަކު ވިދާޅުވީ، ފައިސަލް އަށް ފަރުވާ ދެމުން ދަނިކޮށް މިއަދު ހެނދުނު 8:28 ގައި އޭނާ ނިޔާވެފައިވާ ކަމަށް ކުޅުދުއްފުށީ ރީޖަނަލް ހޮސްޕިޓަލުން ފުލުހުންނަށް މައުލޫމާތު ދީފައިވާ ކަމަށެވެ. ފައިސަލަށް ފަރުވާދެމުން ދިޔައީ ވެންޓިލޭޓަރުގެ އެހީގައި އައިސީޔޫގަ އެވެ.
ނިޝާމާގެ މަރުގެ މައްސަލައިގައި ހައްޔަރުކޮށްފައިވާ ފައިސަލް، ބަންދުކޮށްފައި ހުރި ތަނުގައި ދަންޖެހެން މަސައްކަތް ކުރަނިކޮށް ފުލުހުންނަށް ފެނިފައިވަނީ މިމަހު 12 ވަނަ ދުވަހުގެ ރޭ 23:15 ހާއިރު ކަމަށް ފުލުހުން ބުނެފައިވެއެވެ.
މިކަމާއި ގުޅިގެން ބަލަންޖެހޭ ކަންކަން އެޗްއާރުސީއެމް އާއި އެންއައިސީ އަށް ހުށަހަޅައިގެން ބަލަމުންދާކަމަށް ފުލުހުން ވަނީ ވިދާޅުވެފައެވެ.
ނޮޅިވަރަމް ފެނަކަ އޮފީހުގައި މަސައްކަތް ކުރަމުންދިޔަ ފައިސަލް، ނިޝާމާ ނިޔާވި ހާދިސާއާއި އެކު އެރަށުން ފުރައިގެން ކުޅުދުއްފުށްޓަށް ވަނީ ގޮސްފައެވެ. ފުލުހުން އޭނާ ހައްޔަރު ކުރީ ވެސް އެރަށުންނެވެ. އަދި އޭނާ ބަންދުގައި ހުރީ ވެސް އެރަށު ޕޮލިސް ސްޓޭޝަނުގެ ބެލުމުގެ ދަށުގައެވެ.
ފައިސަލް އަކީ މަސްތުވާތަކެތީގެ ރެކޯޑް އޮންނަ މީހެއްކަމަށް އެ ރަށު މީހުން ތުހުމަތު ކުރާ އިރު، އޭނާގެ ކުރީގެ އަނބިމީހާ އަށްވެސް އަދި ނިޝާމާ އަށްވެސް އޭނާ އަނިޔާކުރި ކަމަށް ތުހުމަތު ކުރެވެއެވެ.
Advertisement
This content is created and paid for by advertisers and does not involve Voice Journalists
