މިމަހު 10 ވަނަ ދުވަހު ހދ. ނޮޅިވަރަމުގައި ނިޔާވެފައި އޮއްވާ ފެނުނު ނިޝާމާ މުހައްމަދު، މަރާލާފައިވަނީ ނޭވާހާސްކޮށްގެން ކަމަށް އޭނާގެ ޕޯސްޓްމޯޓަމް ރިޕޯޓުން ދައްކާ ކަމަށް ފުލުހުން ބުނެފިއެވެ. 

ނިޝާމާ އޭނާ ދިރިއުޅޭ ގޭގެ ކޮޓަރިތެރޭގައި ޚަބަރު ހުސްވެފައި އޮއްވާ ޢާއިލާއަށް ފެނުމާއި ގުޅިގެން ފުލުހުންނަށް ރިޕޯޓް ކޮށް އޭނާ ނޮޅިވަރަމް ސިއްހީ މަރުކަޒަށް ގެންގޮސްފައިވާ އިރު، ގެންދިޔައިރުވެސް އޭނާ ނިޔާވެފައިވާ ކަމަށް، ޑޮކްޓަރުން ފުލުހުންނަށް މައުލޫމާތު ދީފައިވާ ކަމަށް ފުލުހުން ބުނެފައިވެއެވެ. 

ނިޝާމާގެ މަރާއި ގުޅިގެން ފުލުހުން ހައްޔަރުކުރީ އޭނާގެ ފިރިމީހާ، އަބޫބަކުރު ފައިސަލް، (32)އެވެ. އޭނާ ބަންދުކޮށް ފުލުހުންގެ ބެލުމުގެ ދަށުގައި ހުއްޓާ ދަންޖެހުމާއި ގުޅިގެން ކުޅުދުއްފުށީ ރީޖަނަލް ހޮސްޕިޓަލުގެ އައިސީޔޫގައި ފަރުވާ ދެމުން ދަނިކޮށް މިމަހު 19 ވަނަ ދުވަހު ވަނީ ނިޔާވެފައެވެ.

Advertisement

ނިޝާމާގެ މަރާއި ގުޅިގެން ފުލުހުން އޭނާގެ ހަށިގަނޑުގެ ޕޯސްޓްމޯޓަމް ހަދާފައިވާއިރު، ޕޯސްޓްމޯޓަމްގެ ވަގުތީ ނަތީޖާއިން ދައްކާ ގޮތުގައި ނިޝާމާ މަރާލާފައިވަނީ ކަރުގައި އެއްޗެއް އަޅައި ނޭވާ ހާސްކޮށްލައިގެން ކަމަށް ފުލުހުން ބުނެއެވެ.  

ޕޯސްޓްމޯޓަމްގެ ރިޕޯޓާއި ގުޅޭގޮތުން އިތުރު ތަފްސީލެއް ފުލުހުން ދީފައެއް ނުވެއެވެ.