ސްޕެނިޝް ލަލީގާގައި އަމިއްލަ ދަނޑުގައި އެސްޕަންޔޯލް އާއި ވާދަކުރި މެޗު 1-1 ން އެއްވަރުވެ ލީގު ތާވަލުގެ ކުރީގައި ދެ ޕޮއިންޓްގެ ލީޑެއް ނެގުމަށް ބަސެލޯނާއަށް ލިބުނު ފުރުސަތު އެޓީމުން ނަގާލައިފިއެވެ.

މެޗުގެ ފުރަތަމަ ހާފުގައި ގިނަވަގުތު ބޯޅަ ގެންގުޅެ މެޗު ޑޮމިނޭޓްކުރީ ބާސެލޯނާއިންނެވެ. މިހާފުގައި އެސްޕަންޔޯލް މުޅި ޓީމު ފަހަތައްޖެހި ޑިފެންސް ކުރަމުން ދިޔައިރު ބަސެލޯނާގެ ގޯލަށް އަމާޒުކޮށް އެޓީމަށް ފޮނުވާލެވުނީ އެންމެ ބޯޅައެކެވެ. ނަމަވެސް މެޗުގެ ވަރަށް ކުރީކޮޅު ބާސެލޯނާއިން ލަނޑެއްކާމިޔާބުކޮށް މެޗުގެ ލީޑު ހޯދިއެވެ.

އެސްޕަންޔޯލްއަށް މެޗުގެ ނަތީއްޖާ ހަމަހަމަކޮށްދިނީ ސްޕެއިންގެ ތަޖުރިބާކާރު ފޯވާޑް ޖޯސެލޫ ލަނޑު ޖެހުމަށް ފަހު އުފާ ފާޅުކުރަނީ

ފުރަތަމަ ހާފުގެ ހަތް ވަނަ މިނެޓްގައި ބާސެލޯނާއަށް ލީޑު ހޯދައިދިނީ މިސީޒަނުގައި އިގިރޭސި ކުލަބް ޗެލްސީ ދޫކޮށް އެޓީމާއި ގުޅުނު ސްޕެއިންގެ ޑިފެންޑަރ މާކޯސް އަލޮންސޯ އެވެ. މިއީ އެޓީމުގެ ޑެންމާކް ޑިފެންޑަރ އެންޑްރިއާސް ކްރިސްޓެންސަން ތަނަވަސްކޮށްދިން ފުރުސަތެއްގައި އަލޮންސޯ ކާމިޔާބުކުރި ލަނޑެކެވެ. މި ލަނޑާއެކު ފުރަތަމަ ހާފުގެ ކުޅުން ނިމިގެން ދިޔައީ 1-0 ން ބާސެލޯނާ ކުރީގައި އޮވެގެންނެވެ.

ދެވަނަ ހާފުގައިވެސް ގިނަ ވަގުތު ބޯޅަ ގެންގުޅެ މެޗު ޑޮމިނޭޓްކުރީ ބާސެލޯނާއިންނެވެ. ނަމަވެސް މިހާފުގައި ދޭތެރެ ދޭތެރެއިން އެސްޕަންޔޯގެ ކުޅުންތެރިން ކުރިއަށްޖެހި ބާސެލޯނާގެ ގޯލަށް ނުރައްކާކުރެވޭތޯ ކުރަމުން ދިޔަ މަސައްކަތުގެ ނަތީއްޖާއެއްގެ ގޮތުން ދެވަނަ ހާފުގެ 73 ވަނަ މިނެޓްގައި ބާސާގެ ޕެނަލްޓީ އޭރިއާތެރެއިން އެޓީމުގެ ޑިފެންޑަރ އަލޮންސޯ އެސްޕަންޔޯލްގެ ކުޅުންތެރިއަކަށް ކުރި ފައުލަކާއި ގުޅިގެން ރެފްރީވަނީ އެޓީމަށް ޕެނަލްޓީއެއް ދީފައެވެ.

މި ޕެނަލްޓީ ގޯލުތެރެއަށް ފޮނުވާލައިގެން އެސްޕަންޔޯލްއަށް މެޗުގެ ނަތީއްޖާ ހަމަހަމަކޮށްދިނީ ސްޕެއިންގެ ތަޖުރިބާކާރު ފޯވާޑް ޖޯސެލޫ އެވެ. މިރޭގެ މެޗުގައި 16 ރީނދޫ ކާޑާއި ދެ ރަތް ކާޑު ފެނިގެން ގޮސްފައިވާއިރު މެޗުގެ ފުރަތަމަ ރަތް ކާޑު ފަހު ހާފުގެ 78 ވަނަ މިނެޓްގައި ދެއްކީ ބާސެލޯނާގެ ޑިފެންޑަރ ޖޯޑީ އަލްބާ އަށެވެ. ދެ ރީނދޫ ކާޑާއެކު އަލްބާއަށް ރަތް ކާޑު ދެއްކިތާ ދެ މިނެޓް ފަހުން ރެފްރިވަނީ އެސްޕަންޔޯލްގެ ބްރެޒިލް މިޑްފީލްޑަރ ވިނީޝިއަސް ސޫޒާ އަށް ވެސް ދެވަނަ ރީނދޫ ކާޑާއެކު ރަތް ކާޑު ދައްކާ ދަނޑުން ފޮނުވާލާފައެވެ.

މިރޭގެ މެޗުން ލިބުނު ޕޮއިންޓާއެކު 15 މެޗުން ބާސެލޯނާއަށް 38 ޕޮއިންޓް ލިބިފައިވާއިރު، އެއް ވަނާގައި އޮތް ރެއާލް މެޑްރިޑަށް ވެސް 15 މެޗުން ލިބިފައިވަނީ 38 ޕޮއިންޓެވެ. ބާސެލޯނާގެ ފައިދާ ގޯލު އިތުރުވި ނަމަވެސް ރެއާލްއަށް ލީގުގެ ކުރި ލިބެނީ މި ދެޓީމު ރެއާލްގެ ދަނޑުގައި ކުޅުނު މެޗުން އެޓީމު މޮޅުވެފައި ވާތީއެވެ. ސްޕެނިޝް ލީގުގައި ޕޮއިންޓްގެ ގޮތުން ދެޓީމު އެއްވަރުވެއްޖެ ނަމަ ކުރި ލިބޭ ޓީމެއް ކަޑައަޅާނީ ހެޑް ޓޫ ހެޑް ގެ ނަތީއްޖާއަށް ބަލައިގެންނެވެ.

މި ސީޒަނުގެ ފުރަތަމަ އެލް ކުލަސިކޯ ރެއާލް މެޑްރިޑުން ކާމިޔާބުކޮއްފައި ވަތީ މިވަގުތު ހެޑް ޓޫ ހެޓްގެ ނަތީއްޖާއިން ކުރި ލިބެނީ ރެއާލް މެޑްރިޑަށެވެ.