ފީފާގެ މުބާރާތްތަކުގެ ހިއްސާ ވިޔަފާރިތަކަށް ވިއްކާލަން އުޅުނު މައްސަލައަާ ގުޅިގެން ޔުއެފާގެ ވަރުގަދަ އިންޒާރެއް ފީފާގެ ރައީސް ޖިއާނީ އިންފަންޓީނޯއަށް ދީފިއެވެ. 

މި މައްސަލައާ ގުޅިގެން ޔުއެފާއިން ވަނީ އިންފަންޓީނޯއާ ދެކޮޅަށް ޤާނޫނީ ފިޔަވަޅު އެޅުމާއި އާބިޓްރޭޝަނާ މެދު ވިސްނަމުންދާ ކަމަށް ބުނެ ސިޓީއެއް ފޮނުވާފައެވެ. އަދި މިކަމުގައި މިހާތަނަށް ކުރެވުނު ހުރިހާ މުއާމަލާތްތަކަކަށް ރައްކާތެރިވުމަށް ޔުއެފާއިން ވަނީ ބުނެފައެވެ. އެގޮތުްނ ފީފާގެ މުއާމަލާތްތައް ވިޔަފާރިތަކަށް ވިއްކާލުމަށް ކުރެވިގެންދިޔަ އެންމެހާ މުއާމަލާތްތައް ރައްކާތެރިކަމާއެކު ބެހެއްޓުމަށް ޔުއެފާއިން ވަނީ ބުނެފައެވެ. އޭގެ ތެރޭގައި މެއިލްތަކާއި، ވަތްސްއަޕް އަދި ސިގްނަލް މެދުވެރިކޮށް ފޮނުވި މެސެޖްތައް ހިމެނެއެވެ. 

އިންފަންޓީނޯ އާއި ފީފާ އިން ރާވާފައި އޮތީ ވޯލްޑް ކަޕް ހިމެނޭ ގޮތުން ފީފާގެ ބޮޑެތި މުބާރާތްތައް ހިންގުމަށް ވިޔަފާރީ ސަބްސިޑިއަރީ ކުންފުންޏެއް އުފައްދައި "ފީފާ ފޯވާޑް އެންޓާޕްރައިޒް" (އެފްއެފްއީ) ގެ ނަމުގައި އެ ކުންފުނީގެ މައިނޯރިޓީ ހިއްސާ ބޭރު ފަރާތްތަކަށް ވިއްކާލުމެވެ. އެ އިންވެސްޓާ ގްރޫޕުގެ އިސް ބައިވެރިއަކީ ޖޮޝުއާ ކުޝްނާ އުފެއްދި "ތްރައިވް އެޓާނަލް" ކިޔާ އެމެރިކާގެ ވެންޗާ ކެޕިޓަލް ކުންފުންޏެކެވެ. ޖޮޝުއާ ކުޝްނާ އަކީ އެމެރިކާގެ ރައީސް ޑޮނަލްޑް ޓްރަމްޕުގެ ޅީދަރި ޖެރެޑް ކުޝްނާގެ ކޮއްކޮއެވެ.

މި މައްސަލަ ހޫނުވެފައިވާއިރު، ގިނަ ޤައުމުތަކެއްގެ ފުޓްބޯޅައާ ބެހޭ އިދާރާތަކުން މިހާރު ގެންދަނީ އިންފަންޓީނޯއަށް ކުރި ތާއީދު އަނބުރާ ގެންދަމުންނެވެ. އެގޮތުން އެންމެފަހުން ވޭލްސްއިްނ ވަނީ އިންފަންޓީނޯއަށް ކުރި ތާއީދު އަނބުރާ ގެންދިޔަކަން ހާމަކޮށްފައެވެ. ވޭލްސްގެ އެ ނިންމުމަށް އިނގިރޭސި އެފްއޭއިންވެސް ތަދައްހުލްވާން އުޅޭކަމަށް އިނގިރޭސި ނޫސްތަކުން ވަނީ ބުނެފައެވެ. 

މީޑިއާގެ ބައެއް ރިޕޯޓްތައް ބުނާގޮތުގައި ވިލާތުގެ ބައެއް ޤައުމުތަކުން ވަނީ އިންފަންޓީނޯ މަގާމުން ވަކުކުރުމުގެ މަސައްކަތްވެސް ފަށާފައެވެ. ނަމަވެސް މިހާތަނަށް އިންފަންޓީނޯ މަގާމުން އިސްތިއުފާ ދިނުމުގެ އެއްވެސް އިޝާރާތެއް ދީފައެއް ނުވެއެވެ. އޭގެ ބަދަލުގައި އޭނާ ގެންދަވަނީ އެފްރިކާ، އޭޝިއާ އަދި ދެކުނު އެމެރިކާގެ ބައެއް ގައުމުތަކުގެ އެހީތެރިކަމާއެކު އޭނާގެ މަގާމު ދިފާއުކުރުމަށް މަސައްކަތް ކުރައްވަމުންނެވެ.

މި ދަނޑިވަޅުގައި އޭނާ މަގާމުގައި ދެމިހުރި ކަމުގައި ވިޔަސް، އަންނަ މާރިޗު މަހު މޮރޮކޯގައި ބޭއްވުމަށް ހަމަޖެހިފައިވާ ފީފާގެ ރިޔާސީ އިންތިޚާބުގައި އޭނާއާ ވާދަކުރާނެ ކެންޑިޑޭޓަކު ނިކުންނާނެކަން މިހާރު ވަނީ ގާތްގަނޑަކަށް ކަށަވަރުވެފައެވެ.