މި އަހަރަކީ ހުރިޔާ ރައްޔިތުންވެސް ޑިމޮކްރަސީ ހަރުދަނާކުރުމަށް އަޒުމު ކަނޑައަޅާ އަހަރުކަމުގައި ހައްދަވާދެއްވުމަށް ޖުމްހޫރީ ޕާޓީގެ ލީޑަރު އަދި މަޖިލީހުގެ މާމިގިލީ ދާއިރާގެ މެމްބަރު ގާސިމް އިބްރާހިމް އެދިވަޑައިގެންފި އެވެ.
އެމަނިކުފާނު މިފަދައިން އެދިވަޑައިގެންފައިވަނީ އާ އަހަރުގެ ތަހުނިޔާ ރައްޔިތުންނަށް އަރިސްކުރައްވާ ކުރެއްވި ޓްވީޓެއްގައެވެ.
އެ ޓްވީޓުގައި ގާސިމް ވަނީ މި އަހަރަކީ ގައުމު ތަރައްގޫކޮށް ގާނޫނީ ވެރިކަން ދަމަހައްޓާ ޑިމޮކްރަސީ ހަރުދަނާކުރުމަށް މަސައްކަތް ކުރާނެ އަހަރެއްކަމުގައި ކަނޑައެޅުމަށް އެދިލައްވާފައެވެ.
އަދި އިންސާނީ ހައްގުތަކަށް ރައްކާތެރިވެ ހަމަހަމަ ކަމާއި އަދުލުވެރިކަން މަތީ ދެމި ތިބުމުގެ އަޒުމު އާލާކުރުމަށްވެސް ގާސިމް ވަނީ އެދިވަޑައިގެންފައެވެ.
"އާ އަހަރުގެ ތަޙްނިޔާ ލޮބުވެތި ރައްޔިތުންނަށް އަރިސް ކުރަން. މިފެށޭ އާ އަހަރަކީ ޤައުމު ތަރައްޤީކޮށް، ޤާނޫނުގެ ވެރިކަން ދަމަހައްޓައި، ޑިމޮކްރަސީ ހަރުދަނާ ކޮށް، އިންސާނީ ހައްޤުތަކާއި، ހަމަހަމަކަމާއި، ޢަދުލުވެރިކަންމަތީ ދެމިތިބުމުގެ ޢަޒުމު އާލާކުރާނޭ އަހަރެއްކަމުގައި ލައްވާށިއެވެ"
ޖުމްހޫރީ ޕާޓީގެ ލީޑަރު ގާސިމް އިބްރާހިމް
ގާސިމް މި ފަދައިން އެދިލައްވާފައިވާއިރު މި އަހަރަކީ ރިޔާސީ އިންތިޚާބު އޮންނަ އަހަރެވެ. މި އިންތިޚާބުގެ ފޯރި މިހާރުވެސް ވަރުގަދަ ވެފައިވާއިރު ޖުމްހޫރީ ޕާޓީއިންވެސް ވަނީ ރިޔާސީ އިންތިޚާބުގައި ވާދަކުރަން ނިންމާފައެވެ.
އެހެން ނަމަވެސް އިންތިޚާބުގައި ވާދަކުރާނީ ވަކި ޕާޓީއެއްގެ ގޮތުގައިކަމެއް ނުވަތަ ކޯލިޝަން ހަދައިގެންކަމެއް އަދި މިހާތަނަށް ޖުމްހޫރީ ޕާޓީއިން އިއުލާނުކޮށްފައެއް ނުވެއެވެ.
އޭގެ އިތުރުން ޖުމްހޫރީ ޕާޓީއަކީ މި ސަރުކާރަށް ވަފާތެރި ހިއްސާދާރެއްކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
