ވިލިމާލެއިން ތެޔޮ ބޯޓެއްގައިފުރި ފަހުން ގެއްލިގެން ފުލުހުންނަށް ރިޕޯޓް ކުރި ދިވެހި މީހާ މާލޭގައި ހުންނަ ގެސްޓް ހައުސް އަކުން ކަމަށް ފެނިފައިވާ ކަމަށް ފުލުހުން ބުނެފިއެވެ.
ތެޔޮ ބޯޓުން ފުރި ފަހުން ޚަބަރެއް ނުވެގެން، ގެއްލިގެން ހޯދަމުންދިޔައީ ގދ. ތިނަދޫ / މަނާރު، މުޙައްމަދު ނިޡާމް (45އ) އަދި ބަނގްލަދޭޝް ރައްޔިތެއް ކަމުގައިވާ މޮހައްމަދު ލިޓަން (35އ) އެވެ.
އެ ދެ މީހުން ވިލިމާލެ އިން ފުރާފައިވަނީ ޑިސެމްބަރ 28 ވަނަ ދުވަހުގެ ރޭ ގައި ކަމަށް ފުލުހުން ބުނެފައިވާއިރު އެ މީހުންގެ ޚަބަރެއް ނުވެގެން ފުލުހުންނަށް ރިޕޯޓުކޮށްފައިވަނީ ޑިސެމްބަރު 29 ވަނަ ދުވަހުގެ ވަގުތެއްގައި ކަމަށްވެސް މީގެ ކުރިން ފުލުހުން ބުނެފައިވެއެވެ.
އެހެން ނަމަވެސް، އެ ދިވެހި މީހާ އިއްޔެ ގެސް މާލެ އިން ފެނިގެން އެކަން މީސްމީޑިއާގައި މީހަކު އާއްމު ކޮށްފައިވާއިރު، އެކަމާއި ގުޅިގެން މިއަދު ފުލުހުން ބުނީ، ތެޔޮ ބޯޓުން ގެއްލިގެން ހޯދަމުންދިޔަ މުޙައްމަދު ނިޡާމް މިއަދު މާލޭގައި ހުންނަ ގެސްޓް ހައުސް އަކުން ފެނިފައިވާ ކަމަށެވެ.
އަދި އެ މީހާގެ ހާލު ރަނގަޅު ކަމަށާ، އެކަމާއި ގުޅޭ އިތުރު މައުލޫމާތު ފަހުން ހިއްސާ ކުރާނެ ކަމަށްވެސް ފުލުހުން ބުނެފައިވެއެވެ.
ތެޔޮ ބޯޓުން ގެއްލުނު ދިވެހި މީހާ ފެނުނުއިރު, އެ ބޯޓުން ގެއްލުނު ބިދޭސީ މީހާ ފެނުނު ކަމެއް ނުވަތަ ނުފެންނަ ކަމެއްވެސް ފުލުހުން ހާމަކޮށްފައެއް ނުވެއެވެ.
Advertisement
This content is created and paid for by advertisers and does not involve Voice Journalists
