ރާއްޖެ ލަންކާގެ ހާލަތަށް ވައްޓާލުމަށް މަޖިލިސް ތެރެއިން ބަޔަކު މަސައްކަތް ކުރި ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހީމް ޝަރީފު (މަވޯޓާ) ވިދާޅުވެއްޖެއެވެ. 

އެމްޑީޕީގެ މެންބަރުންގެ ތެރެއިން ރައީސް އިބްރާހިމް މުހައްމަދު ޞާލިހު ގެ ފެކްޝަނުގައި ހިމެނިވަޑައިގަންނަވާ ޝަރީފު ކުރެއްވި ޓުވީޓެއްގައި ވިދާޅުވީ، ކޮންމެ ސިޔާސީ ލީޑަރަކަށްވެސް ޚިޔާލީ ވާހަކަ ދެއްކިދާނެ ކަމަށެވެ. 

"އެހެނަސް ރައީސް ޞާލިހު ރޭ ދެއްކެވީ ރައްޔިތުން ބަނޑަށް ޖެހުނަ ނުދީ ފާއިތުވި ތިން އަހަރު ގައުމު ސަލާމަތުގެ އައްސޭރިއަށް ގެންދެވިގޮތް. ޕާޓީގެ މަދު ބަޔަކު ގައުމު ބަނޑަށް ޖައްސަން ކެނޑިނޭޅި މަސައްކަތް ކުރެއްވި." ޝަރީފް ވިދާޅުވި އެވެ. 

މިއާއެކު ޝަރީފް ވިދާޅުވީ، ބަޔަކު ބޭނުންވި ގޮތަށް ގައުމު ބަނޑަށް ނުޖެހުނީ، ކެތްތެރިކަމާއި، މަޑުމައިތިރި ކަމާއި ވިސްނުންތެރި ކަމާއިއެކު ރައީސް ޞާލިހު އެޅުއްވި ހަރުދަނާ ފިޔަވަޅު ތަކުން ކަމަށެވެ. 

" މަޖިލިސް ތެރެއިން ބަޔަކު މަސައްކަތް ކުރި ގާނާ އާއި ސްރީލަންކާ ފަދަ ގައުމުތަކުގެ ހާލަތަށް ވައްޓާލަން." ޝަރީފް ވިދާޅުވި އެވެ. 

މީގެ އިތުރުން ޝަރީފް ވަނީ އިގްތިޞާދީ ގޮތުންނާއި ސަލާމަތީ ގޮތުން ސަރުކާރުން އަޅާ ބައެއް ފިޔަވަޅުތައް ހާމަ ނުކުރާ ނުކުރުން ވެސް ދިފާއު ކޮށް ޓުވިޓް ކުރައްވާފައެވެ.

އެގޮތުން ވިދާޅުވީ، ކޮންމެ ގައުމެއްގައި ވެސް އިގްތިސާދު ރައްކާތެރި ކުރުމާއި ގައުމީ ސަލާމަތާއި ގުޅުންހުރި ކަންކަން ހުންނާނެ ކަމަށެވެ. އަދި އެފަދަ ކަންކަމަކީ ރައްކާތެރި ކުރަންޖެހޭ ދައުލަތުގެ ސިއްރު ކަމަށްވެސް އޭނާ ވިދާޅުވި އެވެ.  

"އެކަން ބައެއް ބޭފުޅުން ސިޔާސީ މަންފާއަށް ހަނދާން ނައްތާލާކަމީ ހިތާމަ ހުރި ކަމެއް."  ޝަރީފް ވިދާޅުވި އެވެ.