އެމްޑީޕީގެ ރިޔާސީ ޕްރައިމަރީގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި ވާދަކުރައްވަން ނިކުމެވަޑައިގެން ހުންނެވި މަޖިލީހުގެ ރައީސް މުހައްމަދު ނަޝީދާއި އޭނާގެ ކެމްޕޭނު ޓީމުން އެންމެ ހަރު އަޑުން ދައްކަމުންދާ އެއް ވާހަކައަކީ ރައީސް ސޯލިހު ކަންކަމާއި ރިއެކްޓު ނުކުރައްވާ ވާހަކައެވެ. 

އެންމެ ގިނަ ފާޑުކިޔުއްތަކެއްވެސް ނަޝީދުގެ ޓީމުން އަމާޒުކުރަމުން ދިޔައީ ރައީސް ސޯލިހު ރިއެކްޓު ނުކުރައްވާތީއެވެ. އަދި އެހެން ނަހައްދަވާ ކަންކަމާއި ރިއެކްޓު ކުރެއްވުމަށް ނަޝީދު ވަނީ ރައީސް ސޯލިހަށް ގޮވާލައްވާފައެވެ. 

އެއާއެކު އެމަނިކުފާނު ރޭ އެމްޑީޕީގެ މައި ހަރުގޭގައި ބޭއްވި ޖަލްސާއެއްގައި ވަނީ ރިއެކްޓު ކުރައްވާފައެވެ. ހީކުރިވަރަށްވުރެ އެމަނިކުފާނުގެ ރިއެކްޝަން ރަނގަޅަށެވެ. ރިއެކްޓު ކުރައްވާ އެމްޑީޕީގެ ރިޔާސީ ޕްރައިމަރީގައި އެމަނިކުފާނާއި އިދިކޮޅު ކެންޑީޑޭޓު އަދި އެންމެ ގާތް އެކުވެރިޔާ މުހައްމަދު ނަޝީދަށް އަމާޒުކުރައްވާ ބަހުގެ ހޫނު ހަމަލާތަކެއްވެސް ވަނީ ރައްދުކުރައްވާފަ އެވެ. 

ރައީސް އިބްރާހިމް މުހައްމަދު ސޯލިހު އެމްޑީޕީގެ ހަރުގެ ޖަލްސާގައި ވާހަކަފުޅު ދައްކަވަން ފެއްޓެވީވެސް އެމަނިކުފާނުގެ ވާދަވެރި ކެންޑިޑޭޓަށް ދެއްވި ވަރުގަދަ ރައްދަކާއެކުގައެވެ. 

އެންމެ ފުރަތަމަވެސް ވިދާޅުވީ ފަސް އަހަރަށް އިންތިޚާބު ކުރީމާ ދެ އަހަރު ކޮށްފަ ވެރިކަން ދޫކޮށްލައްވާނެ ބޭފުޅަކަށް އެމަނިކުފާނު ނުވާނެ ވާހަކައެވެ. އަދި ކުރިމަތިވާ ޖޮންޖެހުންތަކާއެކު ދައުރު ފުރިހަމަ ކުރައްވާނެކަމުގެ ޔަގީންކަން ދެއްވިއެވެ. 

ޔަގީނުންވެސް މިއީ ނަޝީދަށް އަމާޒުކުރައްވާ އެއްލި ގާގަނޑެކެވެ. އެއީ ވެރިކަން ނަޝީދުގެ އަތުން ގެއްލިގެން ދިޔަގޮތުގެ ހަނދާންތައް ނަޝީދަށް އާވެގެންދާނެ ވާހަކަތަކެކެވެ. ޔަގީނުންވެސް މިހާތަނަށްވެސް ފަސޭހަނުވެ ހުރި ޒަހަމްތަކުގައި އިތުރަށް އެ ބަސްތަކާއެކު ފާވާން ފަށާނެކަން ޔަގީނެވެ. 

އެމްޑީޕީގެ ފުރަތަމަ ވެރިކަން ލިބިވަޑައިގަތީ ނަޝީދަށެވެ. އެހެން ނަމަވެސް ވެރިކަމަށް ވަޑައިގަތްތާ ދެ އަހަރު ބައި ތެރޭގައި އަމިއްލަފުޅަށް އިސްތިއުފާދެއްވީ އޭރު ކުރިމަތިވި ކަންކަމަށް ކެތްކޮށްލަން ނަޝީދަށް ކެރިވަޑައި ނުގަތުމުންކަމަށް ރައީސް ސޯލިހު ވަނީ ސިފަކުރައްވާފައެވެ. 

އަދި އެވަރުގެ ގޯހެއް ހައްދަވާނެ ބޭފުޅަކަށް ނުވާނެކަމުގެ ޔަގީންކަން ސޯލިހު ވަނީ ދެއްވާފައެވެ. 

ބުދަ ދުވަހުގެ ރޭ އެމްޑީޕީ ހަރުގޭގައި ބޭއްވި ޖަލްސާގައި ރައީސް ސޯލިހު ރިއެކްޓު ކުރައްވާ ވިދާޅުވި އެންމެ ވަރުގަދަ ބަސްފުޅަކީ އެއްވެސް މީހެއްގެ އަޅަކަށް ނުވާނެ ވާހަކަފުޅެވެ. 

މިއީ ސީދާ ރައީސް ނަޝީދަށް އަމާޒުކުރައްވާ ވިދާޅުވި ވާހަކައެކެވެ. މިއީ ރައީސް ސޯލިހު ވެރިކަމަށް ވަޑައިގަތީ ރައީސް ނަޝީދުގެ ފޮޓޯފުޅު ބޭނުންކުރައްވައިގެން ކަމަށާއި، ވެރިކަމަށް ވަޑައިގަތުމާއެކު ނަޝީދު އެއްފަރާތް ކުރުމަކީ ލަދުވެތިކަމެއްކަމަށް ނަޝީދުގެ ކެމްޕޭނު ޓީމުން ދައްކަމުންދާ ވާހަކަތަކަށް ދިން ރައްދެއްކަން އެނގެއެވެ. 

އެމަނިކުފާނު ވިދާޅުވީ އެމަނިކުފާނަކީ މަޝްވަރާއަށް ލޯބިކުރައްވާ ބޭފުޅެއްކަމަށެވެ. އަދި ދައްކާ ވާހަކަ އަޑުއައްސަވާނެ މީހެއްކަމަށެވެ. އެހެން ނަމަވެސް ދުވަހަކުވެސް މީހެއްގެ އަޅަކަށް ނުވާނެކަމަށް ރައީސް ސޯލިހު ވަނީ ވިދާޅުވެފައެވެ. 

ރައީސް އިބްރާހިމް މުހައްމަދު ސޯލިހަށް ކަންކަމުގައި ލަފާ ދެއްވި ނަމަވެސް އެ މަގަށް ކަންކަން ނުނިންމާވަކަށް ވިދާޅުވެ ނަޝީދު ދަނީ ބޮޑެތި ޝަކުވާތަކެއް އުފުލަމުންނެވެ. ނަޝީދުގެ އެ ވާހަކަތަކަށް ރިއެކްޓު ކުރައްވާ ރޭގެ ޖަލްސާގައި ރައީސް ސޯލިހު ވިދާޅުވީ އެއްވެސް މީހެއްގެ އަޅަކަށް ވެވަޑައިނުގަންނަވާނެ ކަމަށެވެ. 

ސަރުކާރު ސްލޯކަމުގެ ވާހަކައާއި ސަރުކާރަށް އެކަށީގެންވާ މިންވަރަށް މަޝްރޫއުތައް ނުހިންގޭކަމަށް ކުރިއަށް އޮތް ރިޔާސީ ޕްރައިމަރީގައި ރައީސް ސޯލިހުގެ ވާދަވެރި ކެންޑިޑޭޓް ރައީސް ނަޝީދު ގެންދަވަނީ ތަކުރާރުކޮށް ވިދާޅުވަމުންނެވެ. 

ނަޝީދުގެ އެ ވާހަކަތަކަށް ބުދަ ދުވަހުގެ ރޭގެ ޖަލްސާގައި ރައީސް ސޯލިހު ރިއެކްޓު ކުރެއްވިއެވެ. އެމްޑީޕީގެ ދެވެރިކަން އަޅާ ކިޔާލީ ތަފާސް ހިސާބުތަކުގެ އަލީގައެވެ. ރައްދު ދެއްވީ ނަންބަރުތަކުންނެެވެ. 

ރައީސް ސޯލިހު ވިދާޅުވީ އެމަނިކުފާނަށް ކަމެއް ކޮށްނުދެވޭކަމަށް ނަޝީދު ވިދާޅުވާއިރު، ނަޝީދުގެ ވެރިކަމުގައި ސޮއި ކުރުނީވެސް ފެނާއި ނަރުދަމާގެ އެންމެ މަޝްރޫއެއްގައިކަމަ ށެވެ.

އެހެން ނަމަވެސް، މި ވެރިކަމުގައި 100 އެތައް ރަށެއްގައި ފެނާ ނަރުދަމާގެ މަސައްކަތް ކުރަމުންދާކަމަށާއި، ދައުރު ނިމުމުގެ ކުރިން ރާއްޖޭގ ހުރިހާ ރަށެއްގައި ފެނާއި ނަރުދަމާގެ މަސައްކަތް ނިންމަވާދެއްވާނެ ކަމަށް ރައީސް ސޯލިހު ވިދާޅުވި އެވެ. 

ރައީސް ސޯލިހު ވިދާޅުވީ އެމްޑީޕީ މަގުމަތިވާން ދިމާވާ ސަބަބުތަކާއި ވެރިކަމަށް އާދެވޭ ގޮތްތަކަކީ ބަލާ ދިރާސާ ކުރަން ޖެހޭ ކަމެއްކަމަށެވެ. 

އެގޮތުން 2008 ވަނަ އަހަރު އެމްޑީޕީއަށް ވެރިކަމަށް އާދެވުނީ ކޯލިޝަނެއްގެ ތެރެއިންކަމަށް އެމަނިކުފާނު ވިދާޅުވިއެވެ. އަދި އެ އިންތިޚާބުގައި ރައީސް ނަޝީދު ގިނިކަންޏާއި ނުކުމެވަޑައިގަތުމުން ލިބުނީ އެންމެ 25 އިންސައްތަ ވޯޓުކަމަށް ރައީސް ސޯލިހު ވިދާޅުވިއެވެ. 

އެފަހުން ވެރިކަން ގެއްލިގެން ދިއުމުން ދެން އައި ރިޔާސީ އިންތިޚާބުގައި އެމްޑީީޕީއަށް ވެރިކަން ގެއްލުނީ ސިޔާސީ ގޮތުން ބައިވެރިވާނެ އެއްވެސް ބައިވަރު ނުލިބުމުންކަން ރައީސް ސޯލިހުވަނީ ހަނދުމަފުޅަށް ގެންނަވާފައެވެ. ކުޑަ ތަފާތަކުން އެ އިންތިޚާބުގައި އެމްޑީޕީ ބަލިވެގެން ދިޔައީ ރައީސް ނަޝީދާއި އެއްގަލަކަށް އަރައިގެން މަސައްކަތް ކުރާނެ ސިޔާސީ އެއްވެސް ޕާޓީއެއް ނެތުމުންކަމަށް ރައީސް ސޯލިހު ވިދާޅުވިއެވެ. 

އަދި ނިމިދިޔަ 2018 ވަނަ އަހަރުގެ ރިޔާސީ އިންތިޚާބު އެމްޑީޕީއަށް ކާމިޔާބު ކުރެވުނީވެސް ހަމަ ކޯލިޝަންއެއްގެ ތެރެއިންކަމަށް އެމަނިކުފާނު ވިދާޅުވިއެވެ. 

ރައީސް ސޯލިހު ވިދާޅުވީ އެމްޑީޕީއަށް ވެރިކަން ދެމެހެއްޓޭނެ ގޮތްތަކާއި ދޭތެރޭގައި ވިސްނަން ޖެހޭކަމަށެވެ. އެމަނިކުފާނާއި ވާދަކުރައްވަން ނިކުމެވަޑައިގެން ހުންނެވި ބޭފުޅާގެ އަތުގައި ހިފައިގެން އެހެން ސިޔާސީ ޕާޓީތަކުން އެމްޑީޕީއަށް ވެރިކަން ހޯދައިދޭން ނުދާނެކަމީ ފެންނަން އޮތް ހަގީގަތެއްގެ ގޮތުގައި ރައީސް ސޯލިހުގެ ވާހަކަފުޅުގައި ސިފަކުރެއްވި އެވެ. 

އެމްޑީޕީއަށް ވެރިކަން ދެމެހެއްޓޭނެ ގޮތާއި ގުޅޭގޮތުން ޕާޓީގެ ދެ ރައީސުންގެ ޚިޔާލުފުޅު ތަފާތުކަން އެ މައުލޫގައި ދައްކަވާ ވާހަކަތަކުން ސާފެއެވެ. 

ނަޝީދު ވިދާޅުވަނީ ރައީސް ސޯލިހު މިހާރު ޕާޓީ ހިންގަވަމުންދަނީ ޕާޓީގެ އަސްލާއި އުސޫލުތަކާއި ޚިލާފަށްކަމަށެވެ. އެކަމާއި ގުޅިގެން އެމްޑިޕީގެ އާންމު މެމްބަރުންގެ ނަފްތަރު ރައީސް ސޯލިހަށް ލިބެމުންދާކަމަށާއި، ނަތީޖާއެއްގެ ގޮތުން އެމްޑީޕީއަށް ރައްޔިތުން ކުރާ އިތުބާރު ގެއްލެމުންދާކަމަށް ނަޝީދު ވިދާޅުވިއެވެ. 

އަދި އެމަނިކުފާނު ޕްރައިމަރީއަށް ނިކުމެވަޑައިގެން ހުންނެވީ ނެތެމުންދާ އެމްޑީޕީ ފިކުރު ދިރުވާ، އެ ފިކުރު ކޮޅަށް ޖެއްސެވުމަށްކަމަށް ނަޝީދު ގެންދަވަނީ ވިދާޅުވަމުންނެވެ. 

ނަޝީދުގެ އެ ވާހަކަތަކަށް ރައްދުދެއްވާ ރައީސް ސޯލިހު ވިދާޅުވީ އިންތިޚާބުތައް ކާމިޔާބުކުރާނެ ފޯމިއުލާއާއި، ރައްޔިތުންގެ ވޯޓު ހޯއްދަވާނެ އުކުޅުތައް އެމަނިކުފާނަށް އެނގިލައްވާކަމަށެވެ. 

އެގޮތުން އެމަނިކުފާނު މިހާތަނަށް 6 އިންތިޚާބު ރައްޔިތުންގެ ވޯޓު ހޯއްދަވައިގެން ކާމިޔާބުކުރައްވާފައިވާކަމަށް ވިދާޅުވިއެވެ. 

ނުސީދާކޮށް އެމަނިކުފާނު އެ ވިދާޅުވީ އިންތިޚާބު ކާމިޔާބު ކުރަންވީ ގޮތް ބަޔަކު ވިދާޅުވެ ނުދެއްވި ނަމަވެސް އެކަން ކުރައްވަން އެނގިވަޑައިގަންނަވާ ކަމަށެވެ. އަދި އެމަނިކުފާނަކީ އިންތިޚާބުތަކަށް އާ ބޭފުޅެއް ނޫންކަމަށާއި، އިންތިޚާބުތައް ކާމިޔާބު ކުރުމުގެ ޓްރެކް ރިކޯޑެއް އޮތް ބޭފުޅެއްކަމަށެވެ. 

ރައީސް އިބްރާހިމް މުހައްމަދު ސޯލިހު ރިއެކްޓު ނުކުރައްވައިގެން ފާޑުކިޔާ ފަރާތްތަކަށް ހަރުޖެ ޖަލްސާގެ ތެރެއިން ދައްކާލީ ތަފާތު މަންޒަރެކެވެ. މަޑުމަޑުން ހުންނެވިއެއްކަމަކު އެއީ އެޅިހާ ބަޔަކަށް ރިހަ ކިޔައިގެން ހުންނާނެ ބޭފުޅެއް ނޫންކަން އެމަނިކުފާނު ރިއެކްޓު ނުކޮށްގެން ކަންބޮޑުވާ ފަރާތްތަކަށް ޖަލްސާއިން ފެނިގެންދާނެއެވެ. 

އެހުރިހާ ވާހަކަތަކަށް ފަހު މަޒާޖީ ގޮތަކަށް ރައީސް ސޯލިހު ދެން ވިދާޅުވީ އެމަނިކުފާނަކީ ހަގީގަތުގައިވެސް ކުއްލި ކުއްލިއަށް ރިއެކްޓު ކުރައްވާ ބޭފުޅެއް ނޫންކަމަށެވެ. އެހެން ނަމަވެސް އެއީ މައްސަލައެއްކަމަށް ދެކިވަޑައިގަންނަވާނަމަ މީގެ ފަހުން "ރެސްޕޯންޑު" ކުރައްވާނެކަމަށް ރައީސް ސޯލިހު ވިދާޅުވިއެވެ.