ޕޯޗުގަލްގެ ގައުމީ ޓީމުގެ ކޯޗަކަށް ރޮބާޓޯ މާޓިނޭޒް ހަމަޖައްސައިފި އެވެ. އުމުރުން 49 އަހަރުގެ މާޓިނޭޒް އެންމެ ފަހުން މަސައްކަތްކޮށްފައި ވަނީ 2022 ވަނަ އަހަރު ޤަތަރުގައި ބޭއްވުނު ފީފާ ވޯލްޑް ކަޕްގައި ބެލްޖިއަމްގެ ޤައުމީ ޓީމާއެކުގައެވެ. 

2016 ވަނަ އަހަރުން ފެށިގެން ބެލްޖިއަމްގެ ކޯޗުގެ މަގާމުގައި 6 އަހަރު ހޭދަކުރުމަށް ފަހު މާޓީނޭޒް އެޓީމާއި ވަކިވީ ޤަތަރު ވޯލްޑް ކަޕްގެ ގުރޫޕް ސްޓޭޖުން ބެލްޖިއަމް ކަޓައިގެން ދިއުމާއެކު އެވެ. މާޓީނޭޒް ބުނީ އޭނާ ބެލްޖިއަމް ޓީމާއި ހަވާލުވީ 2018 ގެ ވޯލްޑްކަޕަށް އެޓީމު ކޮލިފައި ކޮއްދިނުމަށް ޓާގެޓުކޮށްގެން ކަމަށެވެ.  އަދި އޭނާގެ ކޯޗުކަމުގައި ބެލްޖިއަމް 2018 ވަނަ އަހަރުގެ ވޯލްޑް ކަޕް ތިން ވަނަ ހޯދުމުގެ އިތުރުން 2021 ވަނަ އަހަރު ބޭއްވުނު ޔޫރޯ ފުޓްބޯޅަ މުބާރާތުގެ ކުއާޓާ ފައިނަލުގައި އެޓީމު ކުޅެފައި ވެއެވެ. 

ޕޯޗުގަލްގެ ކުރީގެ ކޯޗު ފެނާންޑޯ ސަންޓޯސް މަގާމުން އިސްތިއުފާ ދިނީ ވޯލްޑް ފުޓްބޯޅަ މުބާރާތުގެ ކުއާޓާ ފައިނަލުގައި މޮރޮކޯ އަތުން ބަލިވެ މުބާރާތުން ޕޯޗުގަލް ކަޓައިގެން ދިއުމާއި ގުޅިގެންނެވެ. ސަންޓޯސްގެ ކޯޗުކަމުގައި ޕޯޗުގަލް އިން ވަނީ ޔޫރޯ ފުޓްބޯޅަ މުބާރާތުގެ އިތުރުން ޔުއެފާ ނެޝަނަލް ލީގު ކާމިޔާބުކޮއްފައެވެ.

މާޓިނޭޒް ބުނީ މިތަނަށް އާދެވުނީތީ ވަރަށް އުފާވާ ކަމަށެވެ. ދުނިޔޭގެ އެންމެ މޮޅު ހުނަރުވެރި އެއް ގައުމީ ޓީމު ތަމްސީލުކުރުމަކީ ވަރަށް އުފާކުރާ ކަމެއް ކަމަށެވެ. އަދި ޕޯޗުގަލް ފުޓްބޯޅަ ފެޑެރޭޝަންގެ ރައީސާ ވާހަކަ ދެއްކި ފުރަތަމަ ދުވަހުން ފެށިގެން މި ޓީމާއި އެކު މަސައްކަތްކުރުމުގެ ޝައުގުވެރިކަން އުފެދުނެވެ. އަހަރެންގެ އުންމީދަކީ ޕޯޗުގަލް ޓީމާއި އެކު ރަގަޅު ކާމިޔާބީތަކެއް ހޯދުން، އެކަން ހާސިލްކުރުމަށް ކުރެވެން ހުރި ހުރިހާ މަސައްކަތެއް ކުރާނެކަމަށެވެ.

ދުނިޔޭގެ ރޭންކިންގެ ނުވަ ވަނައިގައި މި ވަގުތު ޕޯޗުގަލް އޮތްއިރު، ކްރިސްޓިއާނޯ ރޮނާލްޑޯ، ބްރޫނޯ ފެނާންޑޭޒް އަދި ބާނާޑޯ ސިލްވާ ފަދަ ހުނަރުވެރި މާޝްހޫރު ގިނަ ކުޅުންތެރިންތަކެއް ޕޯޗުގަލް ޓީމުގައި ހިމެނެއެވެ.