ކުރީގެ ރައީސް ޔާމީން އަބްދުލްގައްޔޫމުގެ މައްޗަށް ވ އާރަށުގެ ޚިޔާނާތް ސާބިތުވާކަމަށް ކަނޑައަޅާ އިއްވި ހުކުމާއި، އެ މައްސަލަ ނިންމި ގޮތުގެ ރިޕޯޓުގައި އޮތް އެއްޗަކާ ދިމާނުވާކަމަށް އެމަނިކުފާނުގެ އިސް ގާނޫނީ ވަކީލު ޑރ. މުހައްމަދު ޖަމީލު އަހުމަދު ވިދާޅުވެއްޖެ އެވެ.
ޑރ ޖަމީލު މިފަދައިން ވިދާޅުވެފައިވަނީ ނޫސްވެރިންނަށް ދެއްވި ބަސްދީގަތުމެއްގައެވެ.
ޑރ ޖަމީލު ވިދާޅުވީ ރައީސް ޔާމީންގެ މައްސަލަ ހައިކޯޓުގައި އިސްތިއުނާފުކުރުމަށް ކުރަން ޖެހޭ ދިރާސާތައް މިހާރު ނިމިފައިވާކަމަށެވެ. އެގޮތުން ވ. އާރަށުގެ މައްސަލައާއި ގުޅިގެން މިދިޔަ ޑިސެމްބަރު މަހުގެ 25 ވަނަ ދުވަހު ކްރިމިނަލް ކޯޓުން އެމަނިކުފާނުގެ މައްޗަށް އިއްވި ހުކުމުގައި ނުހިމެނޭ އެތައް ކަމެއް ރިޕޯޓުގައި ހިމަނާފައިވާކަން ގާނޫނީ ޓީމަށް ފާހަގަކުރެވިފައިވާކަމަށް ޑރ ޖަމީލު ވިދާޅުވިއެވެ.
ވަކިން ޚާއްސަކޮށް އެ މައްސަލައިގައި ދައުލަތުގެ ފަރާތުން ހެކިބަސް ދެއްވި ހެކިންގެ ވާހަކަތަކަށް ވަރަށް ބޮޑެތި އުނިއިތުރުތައް ގެނެސްފައިވާކަން ގާނޫނީ ޓީމަށް ފާހަގަކުރެވިފައިވާކަމަށް ޑރ ޖަމީލު ވިދާޅުވި އެވެ.
"އަޅުގަނޑުމެންނަށް ފާހަގަވެގެން ދިޔަ ވަރަށް ބޮޑެތި ކަންތައްތަކެއް އެބަހުރި ރިޕޯޓުގައި އެކުލަވާލައްވާފަ ހެކިވެރިން ބުންޏޭ ކިޔާފަ.. ތިބޭފުޅުން ކުރިމަތީގައި ހެކިބަސް ދިނީ.. މިސާލަކަށް ފަސީހު ޒާހިރު މިވެނި ވާހަކައެއް ބުންޏޭ ބުނިއިރުގައި އެއީ އެއްވެސް ތަނެއްގައި އޭނާ ބުނި ވާހަކައެއް ނޫން"
ރައީސް ޔާމީންގެ އިސް ގާނޫނީ ވަކީލު ޑރ މުހައްމަދު ޖަމީލު އަހުމަދު
ގިނަ ދުވަސްތަކެއް ވަންދެން ޝަރުއީދާއިރާގައި މަސައްކަތްޕުޅު ކުރައްވާފައިވާ ޑރ ޖަމީލު ވިދާޅުވީ އެމަނިކުފާނުގެ ކެރިއަރުގައި ދުވަހަކުވެސް އެފަދަ ބޮޑެތި ގޯސްތަކެއް ހަދާފައިވާ ޝަރީއަތެއްވެސް އަދި މައްސަލަ ނިންމި ގޮތުގެ ރިޕޯޓެއްވެސް ދެކިވަޑައިގެންފައި ނުވާކަމަށެވެ.
އެހުރިހާ ދިރާސާތަކެއް ފުރިހަމަ ކުރުމަށްފަހު އަންނަ ހަފްތާގައި އެ މައްސަލަ އިސްތިއުނާފުކުރުމަށް ހައިކޯޓަށް ހުށައަޅާނެކަމަށް ޑރ. ޖަމީލު ވިދާޅުވިއެވެ. އަދި އެއާއެކު އެމަނިކުފާނު ވިދާޅުވީ ހައިކޯޓުން ރައީސް ޔާމީން މިނިވަންވެ ވަޑައިގަންނަވާނެ ކަމާމެދު ފުރިހަމަ ޔަގީންކަންވެސް އޮތްކަމަށެވެ.
Advertisement
This content is created and paid for by advertisers and does not involve Voice Journalists
